راهێنه‌رێ زاخۆ هۆژداری دایه یاریزانێن خوه
ئه‌ڤرۆ، عه‌لی حاجی
د داخویانیه‌كێدا ئه‌ندامێ ده‌سته‌كا كارگێریا یانا زاخۆ یا وه‌رزشی دیاركر كو پشتی ئیمزاكرنا گرێبه‌ستا شه‌ش یاریزانێن پیشه‌كار هاتیه كرن بڕیار هاتیه دان كه‌مپه‌كێ راهێنانێ بۆ ماوێ دو حه‌فتیان بۆ تیما مه یا ته‌پا پێی ل هه‌ولێرا پایته‌خت بهێته ئه‌نجامدان خوه به‌رهه‌ڤكرن بۆ وه‌رزێ نوو یێ خولا پلا نایابا ئیراقێ.
زێده‌تر شڤان عه‌بدی بۆ رۆژناما ئه‌ڤرۆ گوت: لدویڤ داخازیا راهێنه‌رێ تیمێ عه‌بدولوه‌هاب ئه‌بولهێل پێكهاتیێ تیمێ هاتیه دروستكرن و شه‌ش پیشه‌كار هاتینه دناڤ رێزێن تیما مه یا ته‌پا پێی دا ژبۆ باشترین به‌رهه‌ڤی بۆ خولا پلا نایابا ئیراقێ و دانانا كه‌مپێ راهێنانێ ل باژێرێ شه‌قلاوه ژبه‌ر گه‌ش و سه‌قایێ وێ یێ گۆنجایی بۆ خوه به‌رهه‌ڤكرنێ و دیسا هه‌بوونا چه‌ند یانێن ئیراقێ لڤێ ده‌رڤه‌ی ده‌لیڤه‌كا دیه كو یاریێن هه‌ڤالینی ئه‌نجامبده‌ین، له‌ورا بریاره بۆ ماوێ 12 رۆژان كه‌مپێ راهێنانێ لدویڤ پلانا كادرێ راهێنانێ بهێته كو دێ دناڤ كه‌مپی دا چار یاریێن هه‌ڤالینی ل گه‌ل هه‌ر ئێك ژ یانێن، سامرا، شورته، نه‌فتا به‌سرا و هه‌ولێر بكه‌ین له‌ورا دێ به‌رهه‌ڤیێن جودا بین و گرنگیه‌كا باش مه دایێ تایبه‌ت پشتی راهێنه‌رێ جه‌سته‌یی كار لسه‌ر باشتكرن و به‌رهه‌ڤكرنا یاریزان بشێوێ له‌ش سڤكیێ كو مفایه‌كێ باش بهێته وه‌رگرتن.
ژلایه‌كێ دیڤه ناڤهاتی ئه‌وچه‌نده ژی دیاركر كو راهێنه‌رێ تیمێ هوژداری دایه یاریزانێن پشكدار د كه‌مپێ راهێنانێ دا هه‌كه لدیڤ پلان و ئاستێ پێدڤی نه‌بن ئه‌و دێ ده‌ستبه‌رداری ئه‌وی یاریزانی بیت له‌ورا دڤێت یێ به‌رهه‌ڤ بیت و گوت: بۆ وه‌رزێ نوو ئیمزاكرنا یاریزانا ب كۆژمه‌كێ كێمتر بوو ژ وه‌رزێ بوری و گه‌شبینم دێ تیمه‌كا رێكخستی و به‌رهه‌ڤ هه‌بیت و ئه‌م چاڤه‌رێ پشته‌ڤانیا دارایی یا حوكمه‌تێ نه بۆ رێڤه‌برنا كارێن خوه.
