راهێنەرێن تەناهی و شێلادزێ دخوازن دێربییەكێ جوان بیت و هیڤیێن دەربازبوونێ هەنە
دهێتە چاڤەڕێ كرن ئەڤرۆ دو یانە پلێتا دەربازبوونێ بۆ پلا ئێكا كوردستانێ یا تەپا پێی ئێكلا بكەن ئەوا ل سەرجەمێ شەش یانەیان پێنچ یانە هیڤیێن پلێتا دەربازبوونێ ماینە، ژ وانا هەردو یانەیێن پارێزگەها دهۆكێ تەناهی و شێلادزێ و ئەڤرۆ دێ د دیاریا دێربیێ پارێزگەهێ دا شەڕی بۆ سەركەفتنێ كەن و چاڤەڕێ ئەنجامێن یانەیێن دی یێن هەڤڕك بن ژبۆ مسۆگەركرنا پلێتەكا دەربازبوونێ.
بڕیارە ئەڤرۆ ل دەمژمێر پێنجی ئێڤاری یاریگەها زانكویا دهۆك دێ پەردێ ل دووماهی یارییا هەردو یانەیێن پارێزگەهێ د خولێ دا ئینت دەمێ هەردو یانەیێن تەناهی و شێلادزێ د دێربیێ پارێزگەهێ دا بەرانبەری ئێك بن ژ چارچووڤەیێ گەڕا پێنجێ و دووماهیێ یا خولا پلا دویێ ژ قۆناغا دەربازبوون بەر ب پلا ئێكا كوردستانێ، تیما تەناهی ئەوا ب شەش خالان رێزا سێیێ دهێت چاڤ ل سەركەفتنێ یە ژبۆ دەربازبوونێ بێ چاڤەڕێ ئەنجامێن یاریێن دی بیت، ژبەر هەردو یانەیێن رێزێن ئێكێ و دویێ دێ بەرانبەر ئێكبن، پەروەردە خودانا هەشت خالان رێزا ل ئێكێ و هەلەبجەیا شەهید ب حەفت خالان رێزا دویێ دهێت، ژلایێ خوەڤە یانەیا شێلادزێ دێ شەڕی بۆ هیڤییەكا لاواز كەت ئەوا چار خال كۆمكرین رێزا پێنجێ دهێت، ب سەركەڤیت و بەختیار دگەل مەخمۆر و هەلەبچە دگەل پەروەردە خوسارەتبن هەتا دەربازبوونێ مسۆگەر بكەت.
بەرەڤان خالد راهێنەرێ گەنج یێ یانەیا تەناهی بۆ رۆژنامەیا ئەڤرۆ گۆت: بەرهەڤیێن مە گەهشتینە ئاستەكێ گەلەك باش و ئارمانجێن مە دەربازبوونە بۆ پلا ئێك، هەرچەندە یاری ب سانەهی نابیت لێ دێ بۆ سەركەفتنێ یاریێ كەین، جۆدا ژ هەمی تیمێن دی یانەیا تەناهی ب یاریزانێن پارێزگەهێ یاریێ دكەت، یا گرنگ دێربییەكێ جوان بیت.
ژلایێ خوەڤە تارق تعێمە راهێنەرێ شێلادزێ گۆت: هەرچەندە د ماوەیێ خولێ دا ئەم تووشی گەلەك ئاستەنگ و ئاریشەیان بووین ژ وانا ئەنجامدانا یاریێن خوە ل دهۆكێ كو دەمژمێرەك و نیڤا ژ باژێرێ مە دوورە ژبەر بڕیارا فیدراسیۆنا تەپاپێی یا كوردستانێ كو ل یاریگەها خوە یا شێلادزێ ناكەین، لێ ئەم ب هیڤی نە سەركەفتنێ ل سەر تەناهی بینن و هیڤیێن دەربازبوونێ پەیدابن، هەروەسان ب هیڤی نە یارییەكا جوان ب تاما دێربیێ پارێزگەهێ بیت.
