راهێنەرەكێ دهۆكێ پشكداری خولەكا نێڤدەولەتی بوو
ئەڤرۆ
د داخویانیەكێ دا سەرۆكێ ئێكەتیا باسكێت بۆلا پارێزگەها دهۆكێ بۆ رۆژناما ئەڤرۆ دیار كر میقداد رەعدی راهێنەرێ تیما یانەیا دهۆك بۆ ژیێن جۆدا پشكداری خولا نێڤدەولەتی بوویە ئەوا ژلایێ ئێكەتیا باسكێت بۆلا ئیراقێ ب هەڤكاری دگەل یا ئاسیا ل هۆلا گرتی یا شەعب پایتەختێ بەغدا هاتیە رێكخستن.
زێدەتر د. جەلال كەمال گۆت: میقداد رەعدی وەكو نوونەرێ پارێزگەهێ پشكداری كریە كو دهێتە هژمارتن ئەڤ خولە یا باوەرپێكری ژلایێ ئێكەتیا ئاسیا ل سەر ئاستێ ئێكێ بۆ ژیێن جۆدا هەتا حەفتێ ڤێ هەیڤێ دێ بەردەوام بیت ئەوا ژلایێ وانەبێژێ نێڤدەولەتی یێ تۆنسی مونیر بن سەلمان ڤە ب شێوەیێ تیۆری و پراكتیكی هێتە گۆتن و باوەرنامەیێن فەرمی هێنە بەلاڤكرن.
هەروەسان ناڤهاتی گۆت: هەرچەندە مە بزاڤ دكرن زێدەتر ژ راهێنەرەكی پشكداربیت لێ ژبەركو ئەڤ خولە بتنێ بۆ یانەیێن پلا نایاب بوو و پشكداریا راهێنەرەكێ پارێزگەهێ پشتی چەندین دووڤچوون و داخوازی هاتینە كرن، لێ بۆ داهاتیەكێ نێزكی دبیت پشتی دو هەیڤێن دی خولەكا بەرفرەه یا راهێنانێ ل پارێزگەهێ بهێتە دانان.
ل دووماهیێ سەرۆكێ ئێكەتیێ ئەوچەندە ژی دیاركر ئەوان پێنگاڤ و پلانێن باش هەنە پشتی ل هەیڤا بۆری شیاین سێ قارەمانیێن جودا ب سەركەفتیانە رێكبێخن و گۆت: گرنگیا مە بۆ پێشكەفتن و ڤەگەڕاندنا یاریا باسكێت بۆلێ یە ب شێوەكێ ئەكادیمی و بهێز و هەر پێنگاڤەكا هەبیت بۆ پێشئێخستنا ڤێ وەرزشی ئەم دێ كار ل سەر كەین.
