راوه‌ستانه‌ك بۆ ئۆپه‌راسیۆنا رزگاركرنا مووسلێ
“ئه‌گه‌ر قه‌ره‌چى ئێڤارى ته‌دبیر نه‌كر، ئه‌وى سپێدێ مال بارنه‌كر” گۆتنا مه‌زنان
مووسل وه‌ك باژێر و ده‌وروبه‌ر ل سه‌ر ئاخا كوردستانێ دهێته هژمارتن، لێ درێژبوونا ده‌مێ داگیركاریێ ل سه‌ر كوردستانێ كه‌فتیه‌به‌ر نه‌خشێ ته‌عریبكرنێ و ل سه‌ر ده‌مێ ئۆسمانیان ژى بڕه‌كا باش یا توركان ب هێجه‌تا كارى لێ بنه‌جهكرن و بزاڤا ب تورككرنێ كر، لێ ڤێ بزاڤێ سه‌رنه‌گرت ب سه‌ده‌مێ دووریا وێ ژ ناڤه‌ندا توركا؛ لێ سیاسه‌تا ته‌عریبێ سه‌رگرت و نوكه بوویه ناڤه‌ندا ده‌مارگیریا عه‌ره‌بى و ب تایبه‌ت یا سوننا.
مخابن سه‌ركرداتیا كوردى ل ڤى سه‌رده‌مى ده‌ست ژ كوردستانیا ڤى باژێرى به‌ردایه، هه‌رچه‌نده ل سه‌ره‌مێ شۆره‌شێن به‌درخانیان و شێخ عوبه‌یدولایێ نه‌هرى بزاڤا رزگاركرنا ڤى باژێرى كربوون و ب پایته‌خێ كوردستانێ ناڤ دكر؛ ئانكو ل سه‌رده‌مێ ده‌ستپێكیا هه‌ستا نه‌ته‌وى مووسل وه‌ك باژێره‌ك كوردستانى لێ دهاته ته‌ماشه‌كرن. ژبه‌رهندێ كێش و بێشێن مووسلێ كنجا خوه ل سه‌ر كوردستانێ دهێلن.
كه‌فتنا باژێرێ مووسل د ده‌ستێ داعشێ وه‌سا ب ساناهى و بێى كو مووسلیێن عه‌ره‌ب به‌رخوه‌دانه‌كێ بكه‌ن به‌لكو داكه‌فتنه سه‌ر جادان و دیلان گێراندن. دهاته خواستن رایه‌دارێن حكوومه‌تا هه‌رێمێ و ناڤه‌ندێن لێكۆلینێن ستراتیجیك ل سه‌ر ڤێ دیاردێ راوه‌ستابانه و شرۆڤه كربانه چونكو نه‌به‌ر عاقله باژێرێ مرۆڤى ژ لایێ دڕنده‌ترین رێكخراوه‌كا تیرۆرستى(داعش) ڤه بهێته داگیركرن و تو ب ده‌ست قوتان ڤه پێشوازیێ لێ بكه‌ى!! گه‌له‌ك وه‌سا هزر دكه‌ن سه‌ده‌م حكوومه‌تا عیراقێ یه كو ب تائیفه‌گه‌رى دهێته تاوانباركرن و وان ئه‌ڤ باژێره ب هه‌روه راده‌ستى (داعش) كر، دبیت راستیه‌ك تێدا هه‌بیت، لێ راستیا وێ ب دیتنا من ئه‌ڤه‌یه: بلندبوونا پێگه‌هێ كوردان ل سه‌ر ئاستێ جیهانێ و پێشكه‌فتنا هه‌رێما كوردستانێ د هه‌ر بیاڤه‌كى دا و داجریانا سه‌رمایێ بیانى بۆ بازارێن هه‌رێمێ وه‌ك مێرگه‌كا ئارام ل رۆژهه‌لاتا ناڤین و دیاربوونا كوردستانێ وه‌ك ده‌وله‌ته‌كا دیفاكتۆ، ترس ئێخسته دلێ عه‌ره‌بێن شۆفینى و ب تایبه‌ت مووسلیان كو كورد بزاڤێ بكه‌ن ڤى باژێرى ڤه‌گه‌ریننه سه‌ر هه‌رێما كوردستانێ كو د هه‌موو دیكۆمێنتێن دیرۆكى دا باژێره‌كێ كوردستانی یه، ژبه‌ر ڤێ چه‌ندێ وان داعش هه‌لبژارت. ئاها د ڤێ خالێ ڕا دڤێت ئه‌م ل كێشا ئۆپه‌راسیۆنا رزگاركرنا مووسلێ مێزه بكه‌ین و سه‌ره‌ده‌ریێ دگه‌ل بكه‌ین.
ئه‌ڤرۆ به‌ره‌یه‌كێ ناڤنه‌ته‌وى بۆ نه‌هێلانا ڤێ رێكخراوا تیرۆرستى و رزگاركرنا مووسلێ هه‌یه و رۆلێ كوردان ژى هاتیه دیاركرن، به‌لێ پا پشتى رزگاركرنێ كانێ دێ چ گه‌هیته كوردان، به‌لى نینه و رایه‌دارێن مه ژى خوه ب سه‌رڤه نابه‌ن و بۆ خه‌لكێ هه‌رێما كوردستانێ دیار ناكه‌ن، كانێ ل پشت كولیسان چ بۆ وان هاتیه گۆتن و دێ چ هێته شكه‌فا كوردى!! یا گرنگ ل ده‌ف رایه‌دارێن مه ئه‌وه كو پشكداریێ د ئۆپه‌راسیۆنێ دا بكه‌ن و به‌س. كا پشتى هینگێ چ دقه‌ومیت، نه‌گرنگه.
ل گۆڕه‌ى ده‌زگه‌هێن راگه‌هاندنێ ده‌مێ ده‌ستپێكا ئۆپه‌راسیۆنا مووسل یا نێزیك دبیت، ترسه‌كا مه‌زن یا كه‌فتیه ناڤ باژێرى و پێلا ئاواره‌یێن وێ به‌رێ خوه دده‌نه كوردستانێ و رۆژ بۆ رۆژێ زێده دبن. فه‌ره مرۆڤ ڤه‌كرى بێژیت: هه‌رێما كوردستانێ شیانێن حه‌واندنا ڤێ گرسا ئاواره‌یان نینه ژبه‌ر گه‌له‌ك سه‌ده‌مان و یێن هه‌رى بالكێش پرسا ئاسایشێ و قه‌یرانا ئابووریا كوردستانێ نه. بۆ پرسا ئێكێ دبیت دگه‌ل ئاواره‌یان بڕه‌كا باشا تیرۆرستێن داعش بهێن و د پاشه‌رۆژێ دا دێ بنه بۆمبێن ده‌مكرى و دێ بنه ئاریشه بۆ ئاسایشا هه‌رێمێ و ئه‌و شاشیا حكوومه‌تا ئه‌لمانى كه‌فتیێ نابیت هه‌رێما كوردستانێ بكه‌ڤیتێ و ئوبالێ وه‌رگرتنا وان دڤێت بێخته ستۆیێ یۆئێنێ و نابیت خوه تالۆقه‌ى وان بكه‌ت. بۆ پرسا دویێ ژى قه‌یرانا ئابوورى ل كوردستانێ هندى وێڤه‌تر دچیت یا كه‌مباختر لێ دهێت و ئاسوویێن ده‌ربازبوونێ دیار نینن و وه‌رگرتنا ئاواره‌یان (كو حكوومه‌تا هه‌رێما د ڤێ سیاسه‌تێ دا شكه‌ستن ئینایه و نه‌شیایه وه‌كو توركیا بازارى پێ بكه‌ت) دێ بارگرانیێ بۆ حكوومه‌تێ چێ كه‌ت.
ده‌م هاتیه حكوومه‌تا هه‌رێمێ ب چاڤه‌كێ ریالستانه ل كێشان مێزه بكه‌ت و سه‌ره‌ده‌ریێ دگه‌ل بكه‌ت، چونكو ئه‌ڤه سه‌رده‌مێ به‌رژه‌وه‌ندانه نه‌ك یێ هه‌ستانه. ب پلان و ل گۆڕ به‌رژه‌وه‌ندا هه‌رێما كوردستانێ دڤێت سه‌ره‌ده‌رى ل گه‌ل ئۆپه‌راسیۆنا رزگاركرنا مووسلێ بهێته كرن و چ ئه‌جندایێن دى نه‌په‌ژرینیت.
