راوه‌ستیانه‌ك ل ده‌ف تابلۆیێن (ئه‌حمه‌د مشه‌ختى)
عه‌بدولره‌حمان بامه‌رنى
ئێك ژ برگێن ل ده‌ستپێكا پرانیا هه‌لكه‌فت و ئاهه‌نگ و كۆنگران دهێته نیشادان، برگه‌كا هونه‌ری یه و پرانیا جاران ژى تابلۆیه‌كێ هونه‌ریێ سه‌مایێ دهێته نیشادان. ئه‌ڤا من مه‌به‌ست پێ باژێرێ دهۆكێ یه زێده‌تر، كو ڤان تابلۆیان تایبه‌تمه‌ندیه‌كا خوه هه‌یه و پارێزگه‌ها دهۆكێ زێده‌تر ژ پارێزگه‌هێن دیێن هه‌رێما كوردستانێ، چه‌ندین نه‌ته‌وه و ئۆل كلتۆرێن جودا لێ دژین و پێكڤه‌ژیانا ڤان هه‌مى جوداهیان، تابلۆیه‌كێ خورستى په‌یداكریه و دا كو ئه‌ڤ تابلۆیێ هه‌نێ ژ بلنداهیا خوه بكه‌ڤیته به‌رچاڤێن خه‌لكى و كه‌توارێ دروستێ پێكڤه‌ژیانا ل ڤێ پارێزگه‌هێ نیشابده‌ت، دڤێت به‌هره‌مه‌نده‌ك هه‌بیت و بزانیت، دێ چاوا گیانى ب ڤى تابلۆى په‌خشیت و په‌خشینا گیانى ژى، وه‌ك هونه‌ر و ئه‌ده‌ب ئه‌ز دبێژم، دڤێت هونه‌رمه‌ند و ئه‌دیبێن هزر ڤه‌كرى و بیر تیژ هه‌بن و خولقێنه‌رێ تشتێن نوو بن.
مشه‌ختى وه‌ك نموونه
ب ڤى ره‌نگى من دڤێت به‌حس ل تابلۆیێن سه‌مایێ، ئه‌ڤێن ژلایێ هونه‌رمه‌ند (ئه‌حمه‌د مشه‌ختى)ڤه دهێنه دروستكرن بكه‌م. یا راستى بیت من ناڤێ مشه‌ختى به‌رى دیتنا وى گوهلێ ببوو و ئه‌ڤه ژى ژ سه‌رسۆرمانیا من ب وان تابلۆیانڤه، ئه‌ڤێن د ڤان هه‌لكه‌فتان دا دهاتنه نیشادان، كو یا راستى بیت نه بتنێ سه‌رنجا من رادكێشان، به‌لكو ئه‌ز ئێك ژ وان هه‌مى بینه‌ران بووم، ئه‌ڤێن مه ته‌ماشا دكر و ئه‌م ب له‌یزتن و لڤینێن خوه‌ڤه حێبه‌تی دكرین، ئه‌ز ناڤه‌شێرم گه‌له‌ك جاران من دڤیا ژ نێزیك من ئه‌و كه‌سێ هه‌نێ ناسكربایه، بۆ من گرنگ نه‌بوو، ئه‌و چ كه‌س بیت و چ ره‌نگ بكه‌ته به‌ر خوه و ب چ ده‌ڤۆك باخڤیت، لێ یا گرنگ، ئه‌ڤه ئێك ژ به‌رهره‌مه‌ندێن باژێرێ منه و بۆ من خۆشه ئه‌ز هه‌مى وان كه‌سان ژ نێزیك ناس بكه‌م، یێن شوون تلێن خوه هه‌ین، هه‌تا رۆژه‌كێ و د هه‌لكه‌فته‌كا رۆژنامه‌ڤانیدا، كو ئه‌ڤێن پرتووكێن رۆژنامه‌ڤانى هه‌ین، دوان رێ و ره‌سماندا په‌رتووكێن خوه پیشانددان و بۆ ئاماده‌بوویان ئیمزا دكرن و ئه‌ز ژى ئێك ژوان كه‌سان بووم یێن خودان پرتووك، ئه‌حمه‌د مشه‌ختى هاته هنداڤ سه‌رێ من، ده‌ما ئه‌ز ل سه‌ر مێزێ و ب كارێ ئیمزاكرنا پرتووكێن خوه‌ڤه مژوول و ده‌ما بوویه دوورا وى، من گۆتێ، ناڤێ ته دا ل سه‌ر پرتووكێ بنڤیسم و بۆ ته بكه‌مه دیارى، پرسا من ژ ناڤێ وى و ده‌ما ناڤێ خوه گوتى، راستى من نه‌زانى ده‌ستێ وى بگڤێشم ژبه‌ر كارێن ویێن هونه‌رى یان ژى به‌رده‌وام بم ل سه‌ر ئیمزاكرنا په‌تووكا خوه و ناڤێ وى ل سه‌ر بنڤیسم. هه‌ر چاوا بیت، وێنێ وى و دێمێ وى و كارێ ویێ دروستكرنا تابلۆیان ژ سه‌رێ من نه‌هاتنه ده‌ر و راستى ژى بیت، هه‌ر چه‌نده ئه‌و ل سه‌ر ده‌پێ شانوویێ نا ده‌ركه‌ڤیت ژى، لێ ئه‌و هژیانێ دئێخیته هۆلێ هه‌میێ و ئاماده‌بوویان بكارێن خوه‌ڤه سه‌رسۆرمان دكه‌ت، دووماهى كارێ وى ژى من دیتى، ل حه‌فته‌مین فلمه فێستیڤالا دهۆك یا نێڤده‌وله‌تى بوو و ئه‌ڤ تابلۆیه ژى به‌رهه‌مێ تیپا دهۆكێ یا هونه‌رێ مللى بوو، كو تابلۆیێ پێكڤه ژیانێ بوو.
بۆچى تابلۆ
ره‌نگه گه‌له‌ك كه‌س هزر بكه‌ن، ئه‌ڤ تابلویێن هونه‌رى و برگێن هونه‌رى یێن د رێوره‌سمێن پرانیا ڤان بونان دا دهێنه گێران، ب تنێ ده‌ڤ شرین كرنه‌ك بیت ژ بۆچوونا ناڤا روودانه‌كێ، چ فلمه فێستیڤال بیت یان د هه‌ر واره‌كێ دیدا بیت، كو پێشده‌م كار ژ بۆ هاتیه‌كرن و خه‌لك بۆ هاتیه داخوازكرن، ب هزرا من هه‌كه وه‌سا ژى بیت، لێ دڤێت ئه‌م ل سه‌ر وان برگه‌یان رابوه‌ستین و مافێ وانه ئه‌م ده‌ستخۆشیێ ژى لێبكه‌ین، ژ به‌ركو ئه‌و یێ نوونه‌راتیا ڤى باژێرى ب هه‌مى كه‌لتۆرێن خوه یێن جودا ڤه‌دكه‌ن، هه‌كه برگه‌كا لاواز بهێته نیشادان و ئه‌و تابلۆیێ دهێته نمایشكرن ل ئاستێ پێدڤى نه‌بیت، ره‌نگه هه‌ر ل ده‌ستپێكێ وێنه‌كێ نه دروست د چاڤێن ئاماده‌بوویاندا دروست بیت و تایبه‌ت ژى، هه‌كه مێهڤان ژ پارێزگه‌هێن دى یان وه‌لاتین دى د وێ هه‌لكه‌فتێ دا د ئاماده بن، بوویه ئه‌ز ب شانازیڤه دبێژم، ئه‌م ل پارێزگه‌ها دهۆكێ شانازیێ ب كارێن (مشه‌ختى) دبه‌ین و هیڤیخوازین، ئه‌و د كارێ خوه دا داهێنانێن جوانتر بكه‌ت و روویه‌كێ جوانتر بده‌ته پارێزگه‌ها مه.
