راپرسیێن هەتا نها د بەرژەوەندیا کلچدار ئۆغلۆی دانە
ئەڤرۆ
رۆژنامەیەکا ئەلمانی دیار دکەت، رەوشا ساخلەمیێ یا ئەردۆغانی یا باش نینە، ژ بەر هندێ ژی ئەو یەک دێ کاریگەریێ ل دەنگدەرێن هەڤپەیمانیا جمهور کەت، ل ئالیێ دی رێژا پشتەڤانیا وەلاتیێن تورکیا بۆ کەمال کلچدار ئوغلۆی د زێدە بوونێ دایە، ژ بەر هندێ ژی هەلبژارتنێن ڤێجارێ ل تورکیا دێ د جودا بن.
چەندین کومپانیێن راپرسیان ل تورکیا دوهی ئەنجامێ راپرسیێن خوە بۆ رایا گشتی ئاشکرا کرن و ل گۆر ئەنجامێن راپرسیان هەلبژارتنێن سەرۆک کۆماریێ د گەرا ئێکێ دا ئێکلا نابیت، چونکی چو بەربژارەک نەشێت پتر ژ ٥٠% دەنگدان بدەستڤە بینیت و دێ هەلبژارتن چیتە گەرا دویێ و شانسێ ئەردۆغانێ ڤێجارێ گەلەک کێمە و هەکە هەڤپەیمانیا مللەت یا ب سەرۆکاتیا کەمال کلچدار ئوغلۆی چو شاشیێن مەزن نەکەن دێ ڤێجارێ ئەردۆغان ژ دەستهەلاتێ هێتە دوورخستن.
چاڤدێرێن سیاسی ل تورکیا دیار دکەن، هەرچەندە شانسێ ئەردۆغانی گەلەک کێمە لێ هێشتا ژی کەس نەشێت بێژیت دێ ئەردۆغان نەبیتە سەرۆک کۆمار، چونکی د سیاسەتێ دا گەلەک روودان دبنە ئەگەرێ گوهۆرینا نێرینا دەنگدەران، نها ئەردۆغان ژی یێ دەست ب گەلەک بزاڤان کریە دا بۆ خەلکێ تورکیا بسەلمینیت کو کەمال کلچدار ئوغلۆ ئەو شیان نینن دا تورکیا برێڤە ببەت، نها دەزگەهێن راگەهاندنا ئاکپارتیێ دەست ب ئێرشێن مەزن ل سەر کلچدار ئوغلۆی کرینە و وەسا دیار دکەن هەکە کلچدار ئوغلۆ ببیتە سەرۆک کۆمارێ تورکیا دێ گەلەک ئاریشێن مەزن روو دەن.
ل گۆر باوەریا چاڤدێرێن سیاسی نها مەرال ئاکشەنەر سەرۆکا پارتیا (ئی) ب رەنگەکێ باش شیایە کاریگەریێ ل دەنگێ نەتەوەپەرستان بکەت، ژ بەر هندێ ژی د هەلبژارتنێن ڤێجارێ دا دێ رێژەکا مەزن ژ دەنگێن نەتەوەپەرستان ژی بۆ کلچدار ئوغلۆی چن، ئەو یەک دێ کارتێکرنەکا خوە یا مەزن هەبیت، هەروەسا ڤێجارێ کورد ژی وەکو پێدڤی پشتەڤانیێ ل ئەردۆغانی ناکەن، چونکی ئەردۆغانی بەری نها گەلەک سۆز داینە کوردان و سۆزێن خوە بجه نەئیناینە، ڤێجارێ هەدەپێ ژی ب فەرمی پشتەڤانیا خوە بۆ کلچدار ئوغلۆی دیار کریە، ئەو یەک ژی شانسێ ئەردۆغانی بۆ سەرکەفتنێ گەلەک کێم دکەت و د هەمان دەمی دا شانسێ کلچدار ئوغلۆی ڤێجارێ گەلەک زێدەیە و کلچدار ئوغلۆ دشێت دووماهیێ ب دەستهەلاتا ئەردۆغانی و ئاکپارتیێ بینیت.
