راپرسیێن ڤێجارێ هەموو د بەرژەوەندیا ئەردۆغانی دانە
ئەڤرۆ
ئەڤرۆکە ل تورکیا دێ گەڕا دویێ یا هەلبژارتنێن سەرۆک کۆماریێ هێنە کرن، د گەڕا ئێکێ یا هەلبژارتنان دا رەجەب تەیب ئەردۆغانی شیا رێژەکا مەزن ژ دەنگدان بدەستڤە بینیت، لێ چو بەربژارەکێ نەشیا رێژەیا قانوونی ئانکۆ ٥٠+١% دەنگان بدەستڤە بینیت و ژ بەر هندێ ژی هەلبژارتنێن سەرۆک کۆمارێ چوونە گەڕا دویێ، پڕانیا کۆمپانیێن راپرسیان ژی دیار دکەن، شانسێ ئەردۆغانی زێدەترە.
ئەڤرۆکە گەلێ تورکیا دێ بۆ هەلبژارتنێن سەرۆک کۆماریێ جارەکا دی چنە سەر سندوقێن دەنگدانێ، د گەڕا ئێکێ یا هەلبژارتنان دا، کو ل رۆژا ١٤ ڤێ مەهێ هاتنە کرن، رەجەب تەیب ئەردۆغانێ سەرۆک کۆمارێ نها یێ تورکیا 49.54% و کەمال کلچدار ئۆغلۆ بەربژارێ هەڤپەیمانیا مللەت ژی 44.90% دەنگان بدەستڤە ئینان و ل گۆر قانوونێن تورکیا چو بەربژارەکێ نەشیا دەنگێن پێدڤی بدەستڤە بینیت و ژ بەر هندێ ژی هەلبژارتن چوونە گەڕا دویێ.
عەلی یامان چاڤدێرێ سیاسی ل باکورێ کوردستانێ ژی راگەهاند، هەرچەندە هەدەپێ پشتەڤانیا خوە بۆ کەمال کلچدار ئۆغلۆیی دیار کریە، لێ ئەو یەک رامانا هندێ نادەت دێ هەموو کورد ل تورکیا و باکورێ کوردستانێ دەنگێن خوە دەنە کەمال کلچدار ئۆغلۆیی، راستە د گەڕا ئێکێ دا ل گەلەک باژێرێن باکورێ کوردستانێ رێژەیا دەنگێن کلچدار ئۆغلۆیی باشتر بوون، لێ ڤێجارێ رەوش ب تەمامی جودایە، چونکی د هەلبژارتنێن پەرلەمانی دا ئۆپۆزسیۆنا تورکیا تووشی شکەستنەکا مەزن بوو، ژ بەر هندێ ژی ئەو سۆزێن وان دابوونە خەلکی نەشێن بجه بینن، یا هەری گرنگ وان سۆز دابوو خەلکی دێ جارەکا دی سیستەمێ تورکیا کەنە پەرلەمانی، لێ نها پڕانیا پەرلەمانی کەفتە دەستێ هەڤپەیمانیا جمهور یا ب سەرۆکاتیا ئەردۆغانی، ژ بەر هندێ ژی ئۆپۆزسیۆنا تورکیا نەشێت ل پەرلەمانی چ کارەکێ وەسا مەزن بکەت، ئەو یەک دێ کاریگەریا خوە ل دەنگێن وەلاتیێن تورکیا ب تایبەتی ژی یێن کورد کەت و گۆت: (ئەز پێشبینی دکەم د گەڕا دویێ دا رێژەیا دەنگێن ئەردۆغانی بگەهنە پتر ژ 53% و دێ جارەکا دی بیتە سەرۆک کۆمارێ تورکیا، چونکی ئۆپۆزسیۆنا تورکیا ژ بۆ چارەسەرکرنا پرسا کوردی و پرسێن دی یێن تورکیا خوەدان چو پرۆژە نینە، هەروەسا کەمال کلچدار ئۆغلۆ ژی ئەو کەسە نینە کو بشێت تورکیا برێڤە ببەت، ئەو یەک ژی دێ کاریگەریا خوە ل نێرینا وەلاتیان کەت، ژ بەر هندێ ژی گەلەک زەحمەتە کلچدار ئۆغلۆ بشێت 48% دەنگان ژی بدەستڤە بینیت، چونکی کلچدار ئۆغلۆ د گەڕا ئێکێ دا تووشی شکەستنێ بوو).
ل ئالیێ کۆمپانیێن راپرسیان ل تورکیا ژی چەند رۆژن ئەنجامێن راپرسیێن خوە بەلاڤ دکەن و ل گۆر ئەنجامێن پرانیا کۆمپانیان د گەڕا دویێ یا هەلبژارتنێن سەرۆک کۆماریێ دا رەجەب تەیب ئەردۆغان دێ شێت پتر ژ 52% دەنگان بدەستڤە بینیت و دێ بیتە سەرۆک کۆمارێ تورکیا، شانسێ کەمال کلچدار ئۆغلۆیی گەلەک کێمە.
چاڤدێرێن سیاسی ل تورکیا و باکورێ کوردستانێ ژی دیار دکەن، د گەڕا ئێکێ یا هەلبژارتنان دا هەڤپەیمانیا مللەت وەکو پێدڤی پشتەڤانی ل کلچدار ئۆغلۆیی نەکرن، پارتیا (ئی) یا ب سەرۆکاتیا مەرال ئاکشەنەرێ سۆزێن خوە بجه نەئینان و رێژەکا مەزن ژ دەنگدەرێن وێ پارتیێ دەنگێن خوە نەدانە کلچدار ئۆغلۆیی، ل ئالیێ دی نها سینان ئۆغان ژی بریار دایە پشتەڤانیێ ل ئەردۆغانی بکەت، بێگومان ئەو یەک دێ بیتە ئەگەر هەر چ نەبیت 4% ژ دەنگێن ئەردۆغانی زێدەتر لێ بهێن، ژ بەر ڤان ئەگەران ژی ڤێجارێ شانسێ ئەردۆغانی گەلەک زێدەترە و گەلەک یا ب زەحمەتە کەمال کلچدار ئۆغلۆ ببیتە سەرۆک کۆمارێ تورکیا.
ل گۆر باوەریا چاڤدێرێن سیاسی هەرچەندە هەدەپێ بریار دا جارەکا دی پشتەڤانیی ل کلچدار ئۆغلۆیی بکەت، لێ ئەو یەک رامانا هندێ نادەت دێ هەموو دەنگدەرێن هەدەپێ دەنگێن خوە دەنە کلچدار ئۆغلۆیی، چونکی ل باکورێ کوردستانێ گەلەک ژ وەلاتیێن کورد ژ سیاسەتا پارتیا کلچدار ئۆغلۆیی سەبارەت ب کوردان توورە نە و زەحمەتە ڤێجارێ وەکو گەڕا ئێکێ ژی کورد ل باکورێ کوردستانێ پشتەڤانیێ ل کلچدار ئۆغلۆیی بکەن.
ئەو یەک د دەمەکێ دایە دوهی رەجەب تەیب ئەردۆغانێ سەرۆک کۆمارێ تورکیا راگەهاند، پارتیا کۆماریا گەل یا کو نها کەمال کلچدار ئۆغلۆ سەرۆکاتیا وێ دکەت هەبوونا کوردان قەبوول ناکەت، لێ ئاکپارتیێ هەتا نها گەلەک خزمەتا کوردان کریە و کورد پشکەکن ژ خێزانا مەزن یا تورکیا و کەس نەشێت کوردان و تورکان ژێک جودا بکەت.
ئەو یەک د دەمەکێ دایە کو بەری چەند رۆژان گالیب ئەنساری ئۆغلۆ سەرکەفتیێ ئاکپارتیێ بۆ پەرلەمانێ تورکیا ژی راگەهاند، ئاکپارتی بەرهەڤیان بۆ دستوورەکێ نوو دکەت و بێگومان پرسا کوردی دێ د چارچۆڤێ دستوورێ نوو و دیموکراتی ل تورکیا دا هێتە چارەسەرکرن، ئەو یەک ژی نیشا ددەت ئاکپارتی ب هەموو رەنگەکێ کار بۆ چارەسەرکرنا هەموو پرسێن تورکیا ب تایبەتی ژی پرسا کوردی دکەت، لێ پارتیا کۆماریا گەل چو پرۆژە بۆ چارەسەرکرنا پرسێن تورکیا و ب تایبەتی ژی پرسا کوردی نینە.
