راپه‌ره‌كێ ئه‌لمانى كۆنسێرته‌ك ل دهۆكێ گێرا
ئه‌ڤرۆ نیۆز، رێوار مزیرى:
رێڤه‌به‌ریا گشتى یا ره‌وه‌شنبیرى و هونه‌رى ل دهۆكێ، رێڤه‌به‌ریا هونه‌رێ مۆزیكێ ل دهۆكێ ب هه‌ڤكارى ل گه‌ل په‌یمانگه‌ها گۆدێ یا ئه‌لمانى كۆنسێرته‌ك ئه‌ڤرۆ رۆژا سێشه‌مبى 21/12/2015 ل ده‌مژمێر 6 ى شه‌ڤ بۆ راپه‌رێ ئه‌لمانى (AMEWU) ل هولا چالاكیێن قوتابخانا ل دهۆكێ گێرا.
سه‌مه‌دار محه‌مه‌د ته‌ها، رێڤه‌به‌رێ هونه‌رێ مۆزیكێ ل دهۆكێ بۆ ئه‌ڤرۆ نیۆز ئاشكرا كر كو به‌رى نوكه راپه‌رێ ناڤهاتى كۆنسێرته‌ك ل باژێرێن (هه‌ولێر و سلێمانیێ) گێرابوون و ئه‌ڤرۆ ژى ئه‌ڤ كۆنسێرته ل باژێرێ دهۆكێ گێرا و گۆت: “ب گێرانا ڤان جۆره كۆنسێرتان بلا بۆ نه‌حه‌زێن ملله‌تێ كورد یا ئاشكرا بیت كو كوردستان هه‌موو ده‌مان یا ئارامه و كه‌س نه‌شێت ئارامیا ل كوردستانێ هه‌ى تێكبده‌ت ”
د لایه‌كێ دى دا ناڤهاتى ئاماژه دا وێ چه‌ندێ كو ره‌نگه گێرانا ڤان جۆره كۆنسێرتان ل دهۆكێ كاره‌كێ نوو نه‌بیت و به‌رى نوكه كۆنسێرتێن ب ڤى ره‌نگى هاتبنه گێران، به‌لێ دێ هه‌ر د به‌ر ده‌وام بین ل سه‌ر گێرانا ڤان جۆره كۆنسێرتان، چونكى گه‌نجێن مه حه‌ز ژ ستایلێن نوو یێن مۆزیك و سترانگۆتنێ دكه‌ن و گۆت: “هه‌تا نوكه نه‌هاتیه زانین كا دێ AMEWU كۆنسێرتان ل قه‌زا و ناحیێن سه‌ر ب پارێزگه‌ها دهۆكێ ڤه گێریت یان نه”.
