راپۆرتەکا نەتەوەیێن ئێکگرتی دبیتە جهێ نەرازیبوونا ئیرانێ
کۆمسیۆنا مافێن مرۆڤی یا سەر ب نەتەوەیێن ئێکگرتی راپۆرتەک سەبارەت ب چاوانیا کوشتنا کچا کورد ژینا ئەمینی بەلاڤکر و د راپۆرتێ دا هاتیە دیار کرن، پشتی ڤەکۆلینێن دەمدرێژ و کۆمکرنا گەلەک بەلگەیان هاتە سەلماندن، کو دەمێ ژینا ئەمینی هاتیە دەستەسەرکرن ل ناڤەندا پۆلیسان هاتیە ئەشکەنجەدان و ژ بەر وان ئەشکەنجەیان ژی جانێ خوە ژ دەست دایە.
د راپۆرتێ دا ئەو یەک ژی هاتیە دیار کرن کو دەولەتا ئیرانێ بەرپرسە ژ کوشتنا ژینا ئەمینی و دڤێت ب فەرمی ژی بەرپرسیاریا خوە ل هەمبەر کوشتنا ژینا ئەمینی قەبوول بکەت.
د ڤێ دەربارێ دا دوهی وەزارەتا دەرڤە یا ئیرانێ ژی دیار کر، راپۆرتا نەتەوەیێن ئێکگرتی سیاسیە، چونکی بەری نها ئالیێن پەیوەندیدار ل ئیرانێ سەبارەت ب مرنا ژینا ئەمینی هەموو راستیێن هەی بۆ رایا گشتی ئاشکرا کرینە، راپۆرتا نها یا نەتەوەیێن ئێکگرتی د جهێ خوە دا نینە.
