راچێتا خالهتا عهیشێ
ئهم ههمى پێدڤى ب نۆشداران دبین، ئهڤجا نزا نۆشدار ب شارهزایا خوه یان ژى باوهر ناكهت كو مرۆڤ یێ پێدڤى وی یه دێ رابیت راچێتهكێ ب ناڤێن حهبك و دهرمان و دهرزیكان پر كهت، ب مهرهما چارهسهریێ، مرۆڤ ژى ژبێ چارهیى و مهجبورى دێ قهستا دهرمانخانهكێ كهت ژبۆ ب دهستڤهئینانا چارهسهریا خوه، دهرمانساز ژى وژدانا خوه دێ بهایێ وان دهرمانان ل هژمێرا ل بهر سینگێ خوه دهت و ئهنجامى بێژته مرۆڤى، ب مهجبورى و بێى هیچ ئاخفتنهكێ دێ پارێ خوه دهى و دهركهڤى و تو یێ مهمنون، ل ڤێره من دڤێت ئاماژێ ب تشتهكى بدهم كو مرۆڤ دهمێ تشتهكى بكریت چ كهلوپهلێن خوارنێ، یێن كارهبێ یان یێن ناڤمالێ بن تا دووماهیك ههناسه دێ بازارى كهت و پاشی كریت، بۆ نموونه: ئێڤاریهكێ چوومه جههكێ فرۆشتنا زهرزهواتى داكو هندهك زهرزهواتى بۆ مال بكرم، ژنهكا دانعهمر پرسیارا بهایێ باجانان دكر و خودانى ژى بهرسڤ دا كو كیلو ب (750) دینارانه ئینا ژنكێ گۆتێ بۆچى دایوووو ما خهلایه؟ ئینا زهلامى گۆتێ بۆ خوه ب (500) ببه تا نها من ب ڤى بهاى نهفرۆتینه، ههروهسا رۆژهكێ دگهل ههڤالهكى چوومه بازارى داكو بۆ خوه ئامیرهكێ كارهبێ بكریت، وى ههڤالى ل بازارى ههمیێ گێراندم و ههر دوكانهكا ئامیرێ وى مهرهم پێ ددیت دا بازار كهت و جره برێ دگهل خودانى كهت تاكو گههشتیه بهایهكێ گونجاى و ئامیره ژنوو كرى، مهرم ب ڤان ههردو نموونا ئهوه كو مرۆڤ بازارى تا دووماهیك ههناسه دكهت ل سهر تشتێ بڤێت و پاشی دكریت، ب تنێ كرینا دهرمانا ل دهرمانخانێ بێ بازاره، كهواته ئهو ژنكا دانعهمر یاكو بازارێ كیلویا باجانان كرى یان ههڤالێ من ئهوێ جره برهك كرى تا ئامیرێ ڤیاى بدهستڤه هاتى، خودێ نهكهت ههكه پێدڤى نۆشدار و چارهسهرى و دهرمانخانا ببان دا بازارى كهن؟ بێگومان نه، سهر ڤێ چهندێ ههمیێ ژى دهرمان بێی چاڤدێریا بازرگانی یه و ههر دهرمانخانهیهك دهرمانێن خوه ب بهایهكى دفرۆشیت، رۆژهكێ پێدڤى ب دهرمانخانا بووم ژبۆ كرینا قهترهكى و ل چهندین دهرمانخانان گهریام داكو بهاى بزانم ههر ئیكى ب
بهایهكى گۆوت، دووماهییێ چوومه دهرمانخانهكێ و من لێ پرسى گۆته من ب (11) هزاران، بهرى باخڤم خالهتا عهیشێ راچێتا خوه دا دهستێ دهرمانسازى و گۆتێ: بێ زهحمهت سهحكه ڤێ راچێتێ كا بهایێ دهرمانێ دێ بیته چهند؟ پشتى دهرمانسازى بها ل هژمێرێ داین بهرسڤا وێ دا، خالهتا عهیشێ تهماشهى پارێن خوه كر و دهركهفت، من گۆتێ برا ههمى گاڤا ڤى قهترێ ب (8) هزاران دكرم بۆچى گران بوویه؟ ئینا گۆت وهلا هوسا هاتینه بهاكرن (تسعیره) كرن بهس پا ئاریشه نینه بلا بۆته ب (9) هزاران بیت من ژى پارێ خوه دایێ و دهركهتم، ل ڤێره دیار دبیت كو چ چاڤدێرى و دویفچوون ل سهر بهایێ دهرمانان نینه، لهو خوزى حكوومهتێ و وزارهتا ساخلهمیێ و رێڤهبهریا گشتى یا ساخلهمیێ ل پارێزگههێ دیفچوونا ڤى بابهتى كربا و هندهك بهایێن گونجاى ل سهر دهرمانان دانابان، چونكی گهلهكێن وهك من رۆژانه پێدڤى ب دهرمانان ههیه و ههروهسا دا خالهتا عهیشێ ژى بێ ترس و شهرم دهرمانێن خوه جارهكا دى بكریت چونكی گهلهك خالهتێن وهكى عهیشێ د ڤى وهلاتى دا ههنه!.
