راگرێ کۆلیژا کارگێری و ئابووری ھاتە گوھاڕتن
ئه‌ڤرۆ نيوز، ره‌مه‌زان رێكانى:
د رێوەسمەکی دا ب ئامادەبوونا ھاریکارێ سەرۆکێ زانکۆیا دھۆک بۆ کاروبارێن کارگێری و دارایی ئەڤرۆ 13/12/2015 پێرابوونێن رادەستکرنا راگریا کۆلیژا کارگێری و ئابووری ھاتنە کرن و دکتۆر رێبەر فەتاح وەکو راگرێ نوو یێ کۆلیژا کارگێری و ئابووری ب وەکالەت ل جھێ دکتۆر محەمەد شەعبان ھاتە دانان.
د. جەمال عەلی حەسەن ھاریکارێ سەرۆکێ زانکۆیا دھۆک بۆ کاروبارێن کارگێری و دارایی د پەیڤەکی دا دیارکر کو وەکو نەریتەکا دیموکراتی ل زانکۆیێ دھێتە کرن ھەر چار سالان جارەکی راگرێن کۆلیژان دھێنە گوھۆرین و ھیڤی خاست کو ئەڤ نەریتە بەلاڤ ببیتە ھەمی دەزگەھێن حکومەتێ چونکو گوھۆرین پێنگاڤەکە بەر ب پێش چوونێ و دەست خوشی ل راگرێ بەرێ د. محەمەد شەعبان کر بۆ وی کارێ ھەتا نوکە کری و داخوازا سەرکەفتنێ بۆ د. رێبەر فەتاح خواست و پشتەڤانیا سەرۆکاتیا زانکۆیا دھۆک ژی بۆ دیارکر.
د. محەمەد شەعبان ژی خۆشحالیا خۆ ب ڤان گوھۆرینان دیارکر و گۆت ھەر پۆستەکێ تێدا بیت دێ ھەر خزمەتا کۆلیژا کارگێری و ئابووری کەت، و پشتەڤانیا خۆ بۆ دکتۆر رێبەری دیارکر، ژ لایێ خۆ ڤە راگرێ نوو د. رێبەر فەتاح سوپاسیا راگرێ بەرێ یێ کۆلیژا کارگێری و ئابووری کر بۆ وی کارێ ھەتا نوکە کری و دیارکر کو دێ بەردەوامیێ دەتە ئەو کارێ ھەتا نوکە ھاتیە کرن و تەمام نەبووی، ھەروەسا ژ سەرۆکاتیا زانکۆیا دھۆک و جڤاتا کۆلیژێ ژی خواست کو پشتەڤان بن بۆ کارێ وی داکو کارێ وان ب سەرکەفتیانە بھێتە ئەنجام دان.
