راگه‌هاندنا جیهانی:ئیران ته‌نگاڤه و چو به‌رنامێن وێ بۆ چاره‌سه‌ریا قه‌یرانێن نها نینه
ئه‌ڤرۆ:
ده‌زگه‌هێن راگه‌هاندنا جیهانی ئاماژه ب خوه‌نیشادان و مانگرتنێن ڤێ دووماهیێ ل ئیرانێ دكه‌ن و دیار دكه‌ن كو ده‌نگێن نه‌رازیبوونێ ل دژی ده‌ستهه‌لاتێ زێده‌تر لێ هاتینه و ده‌ستهه‌لاتا نها گه‌له‌ك ته‌نگاڤ بوویه لێ د هه‌مان ده‌می دا وان چو به‌رنامه بۆ چاره‌سه‌ریێ ژی نینن.
رۆژناما گاردیه‌ن د راپۆرته‌كێ دا ئاماژه ب هندێ كریه كو به‌رپرسێن ئیرانێ وه‌سا هزر دكرن كو دێ خوه‌نیشادان ب دووماهی هێن لێ سێ رۆژن مانگرتن و خوه‌نیشادان ل ئیرانێ به‌رفره‌هتر لێ هاتینه، نها كرێكار و خوه‌دانكار ژی پشته‌ڤانیێ ل داخوازیێن خه‌لكی دكه‌ن، ره‌وشا نها نیشا دده‌ت كو ده‌ستهه‌لاتا ئیرانێ گه‌له‌ك ته‌نگاڤ بوویه، چونكی ل هه‌موو ده‌ڤه‌رێن ئیرانێ مانگرتن و خوه‌نیشادان هه‌نه لێ د هه‌مان ده‌می دا ده‌ستهه‌لاتا ئیرانێ هه‌تا نها ژی راستیێن هه‌ی قه‌بوول نه‌كریه و چو به‌رنامێن وان بۆ چاره‌سه‌ركرنا قه‌یرانا نها نینه.
رۆژناما نیویورك تایمز ژی د راپۆرته‌كێ دا دیار كریه كو هه‌رچه‌نده به‌ری نها سه‌رۆكێ دادگه‌ها بلند یا ئیرانێ راگه‌هاندبوو پۆلیسێن ره‌وشتی نه‌ماینه و ره‌نگه هنده‌ك گوهۆرین ژی سه‌باره‌ت ب حیجابا نه‌چاری بهێنه كرن، لێ هه‌تا نها ئه‌و یه‌ك ب فه‌رمی نه‌هاتیه راگه‌هاندن، هه‌ر چاوا بیت ره‌وشا نها نیشا دده‌ت كو خه‌لك د رژدن و خوه‌نیشادان ژی به‌رده‌وامن، ل ئالیێ دی ده‌ستهه‌لات ژی ب هه‌موو ره‌نگه‌كێ دڤێت خه‌لكی سه‌ركوت بكه‌ت، هه‌رچه‌نده هه‌تا نها نێزیكی ٥٠٠ كه‌س هاتینه كوشتن لێ مانگرتن و خوه‌نیشادان ل هه‌موو باژێرێن ئیرانێ به‌لاڤ بووینه و ئه‌و یه‌ك ژی نیشا دده‌ت كو خه‌لك ل سه‌ر داخوازیێن خوه د رژدن و د هه‌مان ده‌می دا ده‌ستهه‌لاتێ ژی هه‌تا نها نه‌رماتی ل هه‌مبه‌ر داخوازیێن خوه‌نیشاده‌ران نیشا نه‌دایه و تشتێ دیار دكه‌ت دێ ره‌وشا نها یا ئالۆز ل ئیرانێ به‌رده‌وام بیت.
رۆژناما وول ستریت جۆرنال ژی به‌حسێ هندێ كریه كو به‌رپرسێن ئیرانێ باوه‌ر نه‌دكرن دێ خوه‌نیشادان وه‌سا به‌رفره‌ه لێ هێن، ژ به‌ر هندێ ژی به‌رپرسێن ئیرانێ بۆ پاراستنا ده‌ستهه‌لاتا خوه دخوازن هنده‌ك گوهۆرینان بكه‌ن، هه‌كه خوه‌نیشادانێن ل ئیرانێ بۆ ده‌مه‌كێ دی ژی به‌رده‌وام بن ده‌ستهه‌لات دێ نه‌چار بیت ده‌ست ب هنده‌ك گوهۆرینان بكه‌ت، لێ هه‌تا نها ده‌ستهه‌لاتا ئیرانێ چو به‌رنامه بۆ چاره‌سه‌ریا قه‌یرانا نها نینن و دیاره ده‌ستهه‌لاتێ دڤێت وه‌كو سالێن بۆری ب توندوتیژی و سه‌ركوتكرنێ خه‌لكی بێده‌نگ بكه‌ت.
گه‌له‌ك ژ رۆژنامه و مالپه‌رێن دی یێن ئۆرۆپی و ئه‌مریكی ژی دیار دكه‌ن كو ژ به‌ر مانگرتن و خوه‌نیشادانان ره‌وشا ئابووری یا ئیرانێ ژی گه‌له‌ك خراب بوویه و پارێ ئیرانێ ل هه‌مبه‌ر دۆلاری و پارێن دی رۆژ ب رۆژێ بهایێ خوه ژ ده‌ست دده‌ت، هه‌كه ره‌وش وه‌كو نها به‌رده‌وام بیت دێ گه‌له‌ك گوهۆرین ل ئیرانێ روو ده‌ن.
