راگه‌هاندنه‌ك ژ رێڤه‌به‌ريا گشتيا كاروبارێن ئێزديان
ئه‌ڤرۆ نيوز:
رێڤه‌به‌ريا گشتيا كاروبارێن ئێزديان ل وه‌زاره‌تا ئه‌وقاف كاروبارێن ئاينى ل هه‌رێما كوردستانێ داخوازێ دكه‌ت كار ل سه‌ر چێكرنا قوبان ل شنگال بهێته راوه‌ستاندن و ب گۆره‌يى ئاينێ ئێزديان نابيت هه‌ر لايه‌نه‌ك ب كه‌يفا خوه قوبانا چێكه‌ت.
د ڤێ راگه‌هاندنێ دا، كو نڤيسينگه‌ها رێڤه‌به‌رێ گشتيێ كاروبارێن ئێزديان ل وه‌زاره‌تا ئه‌وقاف و كاروبارێن ئاينى ل هه‌رێما كوردستانێ دانه‌ك بۆ ئه‌ڤرۆ نيوز ره‌وانه‌كريه، هاتيه: ب گۆره‌يى ئاينێ ئێزديان نابيت ل هه‌ر جهـ و ده‌مه‌كێ هه‌بيت جهێن په‌رستنێ و قوبه بهێنه چێكرن”.
هاتيه ژى: “ئه‌ڤا نوكه لايه‌نه‌كێ سياسى يێ ده‌ستنيشانكرى ل شنگال دكه‌ت ب چێكرنا دو قوبان ل نێزێك مه‌زارێ شيبل نه‌يا دروسته و وه‌سان هزر دكه‌ين ئه‌ڤه بۆ راكێشانا وه‌لاتيانه ب خوه ڤه”.
رێڤه‌به‌ريا گشتيا كاروبارێن ئێزديان ل وه‌زاره‌تا ئه‌وقاف كاروبارێن ئاينى ل هه‌رێما كوردستانێ داخواز دكه‌ت كو ب له‌ز كار د چێكرنا ڤان قوبان دا بهێته راوه‌ستاندن و ژ جڤاتا بلندا ئێزديان ژى خواستيه ل سه‌ر ڤى بابه‌تى بهێنه ده‌نگ.