راگه‌هاندنێ به‌رێ خوه دایه تورێن جڤاكی
دهۆك، نه‌وزاد هلۆری:
سه‌عه‌د عاسف، میدیاكاره‌كێ ده‌ڤه‌را ئاكرێ یه، نوكه وه‌كو په‌یامنێر ل ئاژانسا خانی كار دكه‌ت، د دیداره‌كێ دا بۆ رۆژناما ئه‌ڤرۆ دیاركر كو د نوكه دا كه‌نال و ده‌زگه‌هێن راگه‌هاندنێ هاتینه دناڤ تورێن جڤاكی دا.
ئه‌و دبێژیت: راگه‌هاندنا كوردستانێ ب گشتی و پارێزگه‌ها دهۆكێ قوناغێن باش برینه و پێنگاڤێن هه‌ره باش هاڤێتینه، ئه‌ڤه ژی بۆ وێ چه‌ندێ دزڤریت كو كه‌نال و ده‌زگه‌هێن راگه‌هاندنێ سایت و تورێن جڤاكی یێن تایبه‌ت ب خوڤه چێكرینه و ده‌لیڤه‌یێن كاری بۆ چه‌ندین رۆژنامه‌ڤان و میدیاكاران په‌یدا كرینه و
نوكه ده‌م ده‌مێ گه‌هاندنا هه‌وال و پێزانینێن بله‌زه و دڤێت ب زووترین ده‌م ده‌زگه‌ه هه‌ر تشتی بگه‌هینیته خوانده‌ڤان و بینه‌ران ژبه‌ركو ئه‌گه‌ر راگه‌هاندن ب شێوازه‌كێ راست و دروست و بله‌ز نه‌گه‌هینیت، ل وی ده‌می تورێن جڤاكی دێ ب شێوازه‌كێ دی به‌لاڤ كه ن و د نوكه دا پشكه‌ك ژ رۆژنامه‌ڤانان كاری ل سه‌ر وان روودان و پێشهاتان دكه‌ن كو ل تورێن جڤاكی به‌لاڤ دكه‌ن، به‌لێ ب شێوازه‌كێ دی و پری پێزانین.
سه‌عه‌د كو ل سالا 1997 ژ دایكبوویه و ل كومه‌لگه‌ها خه‌لیكان یا سه‌ر ب قه‌زا ئاكرێ دژیت و قوتابیه ل زانكۆیێ گۆت: پێدڤی یه راگه‌هاندنا كوردستانێ ژ بلی سه‌رڤه و ئالیه‌تا ته‌كنیكی گرنگی ب ناڤه‌رۆكا نووچه و پێزانینان ژی بده‌ت، ب تایبه‌تی كار ل سه‌ر پێگه‌هاندنا تاكێن جڤاكی بده‌ت ل سه‌ر بنه‌مایێ نه‌ته‌وه‌ی و نیشتمانی.
