راگه‌هاندن ب زمانه‌كێ دی
كارێ راگه‌هاندنێ كۆمكرن و گه‌هاندنا ده‌نگوباس و روودانان و شرۆڤه‌كرن و پشتراستكرن و نیشادانا كه‌تواری یه و كارتێكرنه‌كا راسته‌وخوه ل رایا گشتی دكه‌ت و ل گه‌له‌ك وه‌ڵاتێن جیهانێ بوویه ده‌سهه‌لاتا چارێ، ل هه‌رێما كوردستانێ ژی مه چه‌ندین كه‌نالێن راگه‌هاندنێ هه‌نه ب هه‌می جۆرێن خوه‌ڤه بوَ نیشادانا كه‌توارێ مه و گه‌هاندنا ده‌نگوباسان، لێ ژ به‌ر كو هه‌می ب زمانێ كوردینه ده‌نگی وان ژ ناڤ كوردستانێ نا ده‌ركه‌ڤیت و ژ به‌ر هه‌بوونا زاراڤێن جودا جودا ده‌نگێ وان ناگه‌هیته هه‌می كوردستانێ ژی و مایه د بازنه‌یه‌كێ به‌رته‌نگ دا، به‌لی ئه‌ڤرۆ هه‌كه ئه‌م ته‌ماشه بكه‌ین دێ بینی كو پرانیا وه‌لاتێن جیهانێ یێن دوور و نێزیك كه‌نالێن راگه‌هاندنێ ب زمانێ عه‌ره‌بی ڤه‌كرینه ژ وه‌لاتێن ئه‌ورۆپی و رۆسیا و چین و هه‌تا توركیا و ئیرانی ژی بۆ گه‌هاندنا راستیا خوه و نیشادانا سیاسه‌ت و ره‌وشه‌نبیریا خوه، بۆ تاكێ عه‌ره‌ب و ناڤا جڤاكێن وان تاكو بشێن كارتێكرنێ ل رایا گشتی یا عه‌ره‌بی بكه‌ن و وه‌كی دیار ژی هه‌ر ئێك ژ وه‌لاتێن ناڤبری جه‌ماوه‌ر و كارتێكرنا خوه هه‌یه، ئه‌ڤجا نزانم نه‌بوونا كه‌ناله‌كێ تیله‌ڤزیونی یێ كوردی ب زمانێ عه‌ره‌بی بۆ چ ڤه‌دگه‌ریت؟ كو ئه‌م كورد ل دو وه‌لاتان ل گه‌ل عه‌ره‌بان دژین و ل هه‌ردو وه‌ڵاتێن دیتر ژی ژبه‌ركو موسلمانن زمانێ عه‌ره‌بی گرنگی، زێده‌باری لایه‌نێن ئاینی و ره‌وشه‌نبیری و جڤاكی و زانستی كو گه‌له‌ك ژ وان ئه‌م د هه‌ڤپشكین ل گه‌ل عه‌ره‌بان.
ژبه‌ر كو ئه‌م خه‌لكێ هه‌رێما كوردستانا عیراقی د وه‌لاته‌كێ هه‌ڤپشك دا دژین ل گه‌ل عه‌ره‌بان و یا دیاره رژێمێن عیراقی یێن ل دووڤ ئێك و باوه‌رنه‌كه‌م رژێما سووری كێمتر تاوان كربن ژ یا عیراقی هه‌تا ئه‌ڤرۆ رۆژ رابووینه ب شه‌ڕ و دوژمناتی و وێرانكرنا كوردستانێ، نوكه ژی شه‌ڕێ مه دكه‌ن ب رێیا چێكرنا قه‌یران و ئاسته‌نگان به‌رامبه‌ر هه‌ر پێشكه‌فتنه‌كا ل هه‌رێما كوردستانێ د هه‌ر بیاڤه‌كی دا نه‌خاسم ئابووری، به‌لێ تاكێ عه‌ره‌ب یان تاكێ عیراقی ڤێ چه‌ندێ نزانیت به‌لكو گه‌له‌ك ژ وان نزانن كورد كینه و چ دڤیت و چ ماف هه‌نه هه‌می ژبه‌ر كو راگه‌هاندنا كوردی ب زمانێ وان نینه هه‌تاكو راستیێ بگه‌هینیتێ و وێ باوه‌ریێ بۆ دروست بكه‌ت كو ئه‌ڤه وه‌ڵاتێ كوردانه و یێ جودایه ژ وه‌لاتێ عه‌ره‌بان و خه‌لكه‌كێ دیتر ژی ل عیراقێ هه‌یه نه ب تنێ عه‌ره‌ب.
عیراق ئه‌ڤرۆ ل دووماهیا رێزبه‌ندێن جیهانی یه بۆ هه‌می ئاراسته‌یێن گه‌شه‌پێدان و پیشكه‌فتنێ ب تنێ د وارێن پیسبوونێ و مه‌ترسیا ژیانێ و كوشتنا خه‌لكێ سڤیل یا ئێكه‌مه، به‌لێ كوردستان راسته پشكه‌كه ژ عیراقێ لێ یا جودایه ژ هه‌می ئالیه‌كی ڤه وه‌ك ئاسایش و خزمه‌تگوزاری و چاوانیا ژیانی و پێڤه‌رێن نێڤده‌ولی لێ ژبه‌ركو ئه‌ڤ راستیه ناگه‌هیته ژده‌رڤه‌ی كوردستانێ و پتریا خه‌لكێ جیهانێ هزردكه‌ن كوردستان ژی وه‌كی عیراقێ یه.
هێرشێن تیرۆرستێن داعش و هه‌ڤالێن وان ل سه‌ر كوردستانێ و نیشادانا خوراگری و سه‌ركه‌فتنێن پێشمه‌رگه‌ی و توماركرنا ب سه‌دان داستانێن قاره‌مانیێ ل دژی تیرۆرستان و ره‌فتارا جوانا پێشمه‌رگه‌ی ل گه‌ل په‌نابه‌ر و خه‌لكێ سڤیل و قورتالكرنا وان ب هه‌می شێوه‌یان و حه‌واندنا ڤێ هژمارا مه‌زنا په‌نابه‌ران یێن بیانی و خویانی و هه‌بوونا پێكڤه‌ژیانا نه‌ته‌وه‌یی و ئایینی ل هه‌رێما كوردستانێ، نیشادانا نه هامه‌تیێن كوردان یێن هه‌می پارچان و گه‌هاندنا ده‌نگێ وان بۆ جیهانێ، نیشادانا نه‌خۆشیێن گه‌لی مه یێن كه‌ڤن و نوو و هاریكاریكرنا گه‌لێ مه بۆ گه‌لێن دیتر، دژایه‌تیكرن و سه‌پاندنا قه‌یرانا ئابووری یا به‌غدا ل دژی هه‌رێما كوردستانێ و برینا بودجه و مووچان، ئه‌ڤه هه‌می پێدڤی ب راگه‌هاندنه‌كا كاریگه‌رن تاكو ئه‌ڤ په‌یامه بگه‌هنه هه‌می جیهانی و هه‌ر چاوا بیت زمانێ عه‌ره‌بی پتر كارتێكرنا خوه هه‌یه و ب ساناهیتره بۆ خه‌لكێ بیانی ژ زمانێ كوردی.
یا فه‌ره حوكمه‌تا هه‌رێمێ كه‌نالان ب زمانێن عه‌ره‌بی و ئنگلیزی ڤه‌كه‌ت و هه‌می چالاكی و خزمه‌تێن خوه و هه‌ر كێشه و ئازارێن بۆری و نوكه یێن خه‌لكێ كوردستانێ بۆ رایا گشتی یا عه‌ره‌بی و جیهانێ دیار بكه‌ت، یا فه‌ره وه‌لاتیێ ساده ئه‌وێ ل عیراقێ دژیت بزانیت هه‌رێما كوردستانێ د چ سه‌روبه‌ر دا دژیت، ژبه‌ر كو خه‌لكێ كورد نه دنیاسین و چ پێزانین ل سه‌ر خه‌لكێ كوردستانێ و دۆزا وی نینن و نزانن ئه‌ڤ وه‌ڵاته نه ب ساناهی به‌لكو به‌لكو ب خوینا هزاره‌هان شه‌هیدان هاتیه ئاڤاكرن و خوه‌راگریا پێشمه‌رگێن قاره‌مان یێ پاراستیه له‌وا دی بینن گه‌له‌ك جاران وه‌لاتیێن عه‌ره‌ب هزر دكه‌ن ئه‌وا سه‌دامی كری و ئه‌وا داعش و هه‌ڤالێن وێ دكه‌ن و ئه‌وا هه‌ر حوكمه‌ته‌كا عه‌ره‌بی و هه‌ر تاكه‌كێ عه‌ره‌ب دژی هه‌رێما كوردستانێ دكه‌ت یا ره‌وایه.
دیاركرنا دیرۆك و جوگرافیا كوردستانێ و سروشتێ ژیانێ و ره‌وشتوتیتالێن جڤاكێ كوردی و ئه‌و پێكڤه‌ژیانا هه‌ی و ئه‌و پێشكه‌فتنا گه‌هشتیێ پێدڤی ب رێیه‌كا راگه‌هاندنێ نه بۆ گه‌هاندنا وان بۆ هه‌می جیهانێ هه‌تا ببیته ئالاڤه‌ك بۆ راكێشانا گه‌شتیاران ژی ل پاشه‌رۆژێ، نه‌كو خه‌رجكرنا پاره‌كێ مه‌زن بۆ ئینانا هنده‌ك هونه‌رمه‌ندێن عه‌ره‌ب بۆ هه‌رێما كوردستانێ بۆ گێرانا هنده‌ك ئاهه‌نگان بۆ چه‌ند ده‌مژمێره‌كان وه‌كی ل ڤێ هه‌یاما چوویی.
