راگەهاندنا تورکیا: کلچدار ئۆغلۆ ل ژێر فشارەکا مەزن دایە
رۆژناما مللیەت یا تورکیا د راپۆرتەکێ دا دیار کریە، پشتی شکەستا ڤێ دووماهیێ یا پارتیا کۆماریا گەل د هەلبژارتنان دا، هژمارەک زێدە ژ ئەندامێن سەرکردایەتیا جەهەپێ داخواز ژ کەمال کلچدار ئۆغلۆ سەرۆکێ وێ پارتیێ کرینە، کو دەست ژ سەرۆکاتیا جەهەپێ بەردەت، چونکی کلچدار ئۆغلۆ نەشێت چو گوهۆرینان بکەت و دڤێت کەسەکێ دی ببیتە سەرۆکێ جەهەپێ.
رۆژناما حوڕییەت ژی دیار کریە، نها گەلەک ژ ئەندامێن سەرکردایەتیا جەهەپێ داخواز دکەن کو ئەکرەم ئیمام ئۆغلۆ سەرۆکێ باژێرڤانیا مەزن یا ئستەنبۆلێ ل جهێ کلچدار ئۆغلۆ ببیتە سەرۆکێ پارتیا کۆماریا گەل (جەهەپێ)، چونکی ئیمام ئۆغلۆ کەسەک خوەدان شیانە و دشێت گەلەک گوهۆڕینێن مەزن د ناڤ پارتیا کۆماریا گەل دا بکەت، ژ بەر هندێ ژی دڤێت کەمال کلچدار ئۆغلۆ د زووترین دەم دا دەست ژ سەرۆکاتیا جەهەپێ بەردەت.
چاڤدێرێن سیاسی ل تورکیا ژی دیار دکەن، نها کەمال کلچدار ئۆغلۆ گەلەک تەنگاڤ بوویە، چونکی پارتیێن ئۆپۆزسیۆنێ خوە بۆ هەلبژارتنێن باژێرڤانیان یێن سالا ٢٠٢٤ بەرهەڤ دکەن، پارتیێن ئۆپۆزسیۆنێ دخوازن ڤێجارێ ب رەنگەکێ نوو پشکداریێ د هەلبژارتنان دا بکەن، دا بشێن شکەستا د هەلبژارتنێن پەرلەمانێ تورکیا دا قەرەبۆ بکەن، ژ بەر هندێ ژی هەبوونا کەمال کلچدار ئۆغلۆی وەکو سەرۆکێ جەهەپێ ئاستەنگیان ل هەمبەر پرۆژێ پارتیێن دی یێن ئۆپۆزسیۆنێ دروست دکەت، ئەو یەک ژی بوویە ئەگەر نها گەلەک ژ ئەندامێن سەرکردایەتیا جەهەپێ خوە ژ کلچدار ئۆغلۆی دوور کرینە و داخوازا گوهۆڕینان دکەن، رەوشا ناڤخوەیی یا جەهەپێ ژی باش نینە و هەکە کلچدار ئۆغلۆ ل سەر هەلوەستێ خوە بەردەوام بیت، رەنگە ئالۆزیێن مەزن ژی دروست ببن.
