راگەهاندنا كوردی تاما بەرێ نەمایە
دلڤین رەشید:
مەدیاكار (ویداد ئەمین ئەحمەد) د دیدارەكێ دا بۆ رۆژناما ئەڤرۆ دیاركر كو ئەو خەلكا قەزا بەردەرەشە و بۆ ماوێ دەه سالانە دبۆارێ راگەهاندنێ دا كار دكەت، دەستپێكا كارێ ژ رادیۆیێ بوویە، پاشان وەك پێشكێشكار ل كەنالەكێ لۆكالی كاركریە و ئەڤە چارسالن پەیامنێرا ئاژانسا خانی یە و ئێكەم كچە ل قەزا شێخان و دەوربەران وەك پەیامنێرا مەیدانی كار دكەت.
ناڤهاتیێ گۆت: كارێ پەیامنێریێ بۆ كچان ل دەڤەرەكا وەكو شێخان و دەوربەران گەلەگ یا ب زەحمەتە، چنكو هێشتا ئەڤ دەڤەرە د ژینگەهەكا عەشیرەتگەری دا دژین، بەلێ ب هاریكاریا خێزان و هەڤژینێ من من شیا ئاستەنگان نەهێلم و ب سەركەفتیانە بەردەوامیێ ب كارێ خوە یێ راگەهاندنێ بدەم و راستە راگەهاندنا كوردی هەتا رادەیەكی بەرب پێشڤچوویە، بەلێ ئەو تام وچێژا جاران نەمایە، ئەگەر ژی ڤەدگەرن ژبۆ دورست بكارنەئینانا سۆشیال میدیایێ، چنكو زێدەتر بۆ لایك و كومێنتان كار دكەن و نە خزمەتا خەلكی دكەن، ئەڤە ژی مەترسیە ل سەرجفاكێ مە یێ كوردی. و د بەلاڤكرنا پەیاما میدیایێ دا جڤاكێ مە بەرچاڤ بهێتە وەرگرتن، شونا بەلاڤكرنا نووچەیێن نە راست و رەشبین كو كارتێكرنەكا ئێكسەر ل سەر دەروونێ تاكی هەیە، ل جهێ وان كاری ل سەر دیمەنێن جوان و پێكڤەژیانێ و ئاشتی و ئارامیێ بكەن.
