راگەهاندن بوویە پشكەكا سەرەكی د ژیانا وی دا
دلڤین رەشید:
رۆژنامەڤان (مازن خودێدا) د دیدارەكێ دا بۆ رۆژناما ئەڤرۆ دیاركر كو دژیەكێ بچووكدا حەزا كاركرنێ دبۆارێ راگەهاندنێ دا ل دەف وی هەبوویە، ل سالا 2011 ئێكەم ویستگەها وی وەك پێشكێشكار ل رادیۆیا چیا ل شنگالێ دەستپێكریە، پشتی هێرشێن داعش ل سەر شنگالێ و ئاوەرە بووی بزاڤكرن ل كەنالەكێ تەلەفزیۆنی كار بكەت، لەورا وەكو پەیامنێر ل كەنالێ knn دەستپێكر و بەردەوام بووم تا كو چەندین كارێن دی یێن راگەهاندنێ ل ویب سایتان ژی ئەنجام داینە.
ناڤهاتی گۆت: راگەهاندن بتنێ ل دەف من نە كارە، بەلكو نوكە بوویە پشكەكا سەرەكی د ژیانا من دا و هەتا وی رادەی پێڤە هاتیمە گرێدان هەكە كارەكێ فەر نەبیت حەز ناكەم خۆ مۆلەتێ ژی وەربگرم و راستە راگەهاندنا كوردی هێشتا ل قوناغا لۆكالی دایە، بەلێ دخوازم ئەم وەك راگەهاندنكار پتر كار ل سەر هندێ بكەین كو راگەهاندنا خوە پتر بەر ب پێشڤە ببەین و ژ چارچۆڤێ ناڤخۆی دەركەڤین و بەر ب میدیا یا جیهانی ڤە بچین، بۆ زانین نێزیكی دو سالانە وەكو پەیامنێر ل ناڤەندا دەزگەهێ وێب تیڤی یا گاڤ ل دهۆكێ كاردكەم، ئەڤ بەردەوامی و هێزا من بەرهەمێ پشتەڤانیا بەردەوام یا هەڤال و هەڤكارێن منە كو بشێم بەردەوامیێ بكارێ خوە یێ راگەهاندنێ بدەم و خزمەتا مللەتێ خوە بكەم.
