راگەهاندن كارەكێ ب سانەهی نینە بەلێ یێ خۆشە
سندس سالح سلێڤانەیی:
مەدیاكار (رووپەل سەلام سالح) د دیدارەكێ دا بۆ رۆژنامەیا ئەڤرۆ گۆت: دژیەكێ بچووكدا من حەزژ كارێ راگەهاندنێ دكر و هەتا نوكە من ل سێ كەنالان كاركریە و بۆ من دیاربوو كو راگەهاندن كارەكێ ب ساناهی نینە بەلێ یێ خۆشە، ب تایبەت هەكە مرۆڤ ببیتە بێژەرا سیاسی.
هەروەسا گۆت: د ئەزموونا خوە دا ئەز فێری گەلەك تشتان بوویمە و ب دیتنا من كارێ راگەهاندنێ ل كوردستانێ گەلەك یێ ب زەحمەتە، بۆ زانین ل دەستپێكێ من ل كەنالێ دهۆك تیڤی كو ب كەنالێ دایك دهێتە نیاسین كاركریە، ئەو ژی ئەز پێشكێشكارا بەرنامێ زارۆكان بووم ب زمانێ ئنگلیزی، پاشان بۆ دەمێ چەندین سالان من ل كوردستان 24 كاركر و ئەو كەنال بۆ من وەكو قوتابخانەیەكێ بوو، هەردەم ئەز دبێژم گەلەك یا گرنگە ئەو كەسێن د راگەهاندنێ كاردكەن حەزژ كارێ خوە بكەن، بۆ زانین نوكە ئەز مژوولی بزنس ماركێتینكێ مە و ل دەمەكێ نێزیك دێ كارەكێ جوان بینن.
