راگەهاندن كارەكێ پیرۆزە لێ مخابن هندەك كەسان ل بەر دلێ خەلكی ڕەشكریە
دلۆڤان هالۆ:
رۆژنامەڤان (عەمار عەزیز) د دیدارەكێ دا بۆ رۆژنامەیا ئەڤرۆ گۆت: ل سالا 2008 من دەست ب كارێ راگەهاندنێ كریە و وێستگەها من یا ئێكێ ل گۆڤارا (ڤەژەن) بوو، كو ل دهۆكێ دەردكەفت، پاشان ئەز چوومە كەنالێ هەولێر تیڤی یێ ئەسمانی، هەروەسا من ل گەل رۆژنامەیا (وار) و گۆڤارا (سیلاڤ) و هژمارەكا دەزگەهێن دی كاركریە، نوكە ژی پەیامنێرێ (ڤار مەدیامە) ل دهۆكێ، هەروەسا بۆ چەندین ئاژانس و مالپەران كاردكەم.
هەروەسا گۆت: ل دەستپێكێ (د. ئەمین عەبدولقادر) گەلەك هاریكاریا من كریە، هەروەسا خێزانا من ژی یا هاریكارە، چنكو ئەو ژی هەڤیشەیا منە، هەروەسا هەڤالێن مالپەرێ كەركووك ژی گەلەك هاریكاریا من كرینە و باشترین دەزگەهێ راگەهاندنێ یێ كو هەتا نوكە من لێ كاركری مالپەرێ (كەركووك) بوو، چنكو مەدیایەكا سەربەخۆیا تایبەت بوو تایبەت ب دەڤەرێن مادەیێ (140) ڤە، بۆ زانین من پشكداری د هژمارەكا خولان دا كریە و خۆ پێگەهاندیە، من چار خەلات ژی وەرگرتینە، كو ئێك ژوان خەلاتێ باشترین دووفچوونا رۆژنامەڤانی بوو ل كەلار و هیڤیا من ئەوە ئەز كارێن مەزنتر و بهێزتر دبۆارێ راگەهاندنێ دا ئەنجام بدەم، راگەهاندن كارەكێ پیرۆزە لێ مخابن هندەك كەسان ل بەر دلێ خەلكی ڕەشكریە و كەربێن وان ژێ ڤەدبن، ژبەر هندێ گەلەك جاران خەلكەكی نەڤێت بۆ دەزگەهێن راگەهاندنێ باخڤن.
