راھێنەرێ گارە: دێ ب پلانێن نوو پشکداربین
ئەڤرۆ،
ب ئارمانجا مفا وەرگرتن ژ ئەردێ خوە و ڤەگەڕیان بۆ ئەنجامێن باش ئەڤرۆ ھەردو یانێن پارێزگەھا دھۆکێ تیما تەپاپیێ یا یانا گارە و ئاکرێ دێ دەست ب ھەڤڕکیێن قۆناغا دوێ یا خولا کوردستانێ بۆ یانێن پلا ئێک ژ کۆما دوێ کەن.
ل یاریگەھا خوە تیما گارە خودانا پێنچ خالان و رێزبەندیا پێنجێ دھێت دێ مێڤانداریا یانا شەقلاوە کەت ئەوا ب ١٠ خالان رێزا دوێ دھێت، یانا پارێزگەھێ دێ ھەموو بزاڤا کەت مفایی ژ ئەردێ خوە وەربگریت ب ئەنجامەکێ سەرکەفتی ھەروەکو راھێنەرێ وێ داخاز سالح بۆ رۆژناما ئەڤرۆ گوت: یاریا مە ھەمبەری شەقلاوە ب سانەھی نابیت ژبەرکو تیمەکا رێکخستی یە و بھێز ھاتیە دناڤ خولێ دا، ھیڤی و ئۆمێدێن ھەر راھێنەرەکی سەرکەفتنا تیما وی یە لێ شیان و ئاستی جوداھیا ھەیی، دێ بھێز و پلانەکا نوو ھێنە دناڤ یاریێ دا و دڤێت مفایی ژ ئەرد و جەماوەرێ خوە وەربگرین بۆ بدەستڤەئینانا سەرکەفتنێ ژبەرکو ئەم د گەفێن داکەفتنێ داینە ئەگەر دناڤ ئەردێ خوە دا چو خالان کۆم نەکەین.
ژلایەکێ دیڤە نوونەرا دوێ یا پارێزگەھێ یانا ئاکرێ دێ ب ھێزەکا نوو ھێتە د ڤێ یاریێ دا پشتی چەندین گوھۆرین دناڤ کادرێ راھێنانێ و یاریزانان دا کرین ب ھیڤیێن ڤەگەڕیانا بھێز بۆ خولێ و بدەستڤەئینانا پلێتا دەربازبوونێ، یانا ئاکرێ خودانا شەش خالان رێزا چارێ دھێت دێ بیتە مێڤانا یانا ئاسۆ ل ھەولێرا پایتەخت ئەوا ب پێنچ خالان رێزا شەشێ و دووماھیێ دھێت.
ژ یاریێن دی ئەوێن ئەڤرۆ دێ ھێنەکرن، کۆیە× خاک، ھەلەبچەیا شەھید× سەید سادق، ئالتۆن کۆپری× ئاشتی، رزگاری× خانقین.
