رزگاربوويه‌كا ده‌ستێ داعش: داعش سەرێ 25 کەسان ل بەر چاڤێ مە ژێڤە کرن
ئه‌ڤرۆ نيوز:
پشتی ل رۆژا 4/8/2014 ئەم ژ ئالیێ چەکدارێن داعش ڤە ھاتینە گرتن، ئەمیرەکێ داعش ئەز ھەردو زارۆیێن من گەل خوە برینە حەلەبێ، ل وێدەرێ ئەم گەلەک ئەشکەنجە داین رۆژەکێ وی ئەمیری ڤیا بچیتە مەزگەفتێ من ژی دوعا ژ خودی کرن فرۆکا وان بھێتە بۆمبەباراکرن، ب ئاوایەکی وی ئەمیری ھاژێ ھەبوو کو من دوعا کرن، پشتی ھینگێ مە زانی و خودی ژی وەسا حەز کر فرۆکەیان جھێ تیرۆرستان بۆمبەباران کریە و پتر ژ 200 تیرۆرستان کوشتینە، لەورا وی ئەمیرێ داعش ئیکسەر گۆتە من توبە جارەکا دێ تە ئەشکەنجە بدەم ھەروەکی خالیدا دەیکا دو زارۆیان گۆتی.
خالیدایێ خویا ژی کر ئەم ژ تلقەسب رەڤین بەر ب سولاخ چووین، لێ دەمژمێر(12) نێڤرۆ ل سولاخ ئەم ھاتینە دەستەسەرکرن و زەلام جوداکرن و گۆت “ب ترۆمبێلێن مەزن ئەم ڤەگوھاستینە تلەعفەر و ئەم کرینە د قوتابخانەکێ دا، لێ پشتی فرۆکەیان تلەعفەر بوردومانکری تیرۆرستێن داعش ئەم ڤەگوھاستینە زیندانا بادۆش ل مووسلێ و پشتی ئەو جە ژی ھاتیە بوردومانکرن، جارەکا دی ئەم ڤەگوھاستینە تلەعفەر و ئەم خێزان جودا کرین و ل سەر گۆندێن عەرەبان بەلاڤ کرین ئەو ژی ب تنی ژن و زارۆک بەلاڤ کرن بۆ ماوێ سێ ھەیڤان ل گوندێ قزل قیرو ماین و ل وی گوندی کچا من ھاتە سەر دونیایێ و تیرۆرستێن داعش ناڤێ کچا من کرە عائیشە و رۆژەکی تیرۆرستێن داعش ھاتن کچ و ژنێن جوان ھەموو برن و ئەز ژی ل گەل وان برم خەسوویا من گەلەک ھیڤی ژ تیرۆرستان کرن من بھێلن، چونکی ئەز نەساخ بووم ژبەر زارۆبوونی ب زۆرداری تیرۆرستێن داعش رازی بوون ئەز و خەسوویا خوە پێکڤە بمینین ئەم بۆ وەلاتێ سووریا و باژێرێ رەقە ھاتینە ڤەگوھاستن ئەم کرینە د ناڤ باغچەکی دا”.
خالیدایێ ئەو ژی دیار کر کو ئەمیرەکێ تیرۆرستان ئەز و ھەر دو زارۆیێن من گەل خوە برنە حەلەبێ و چ د دەستێ مە دا نەبوو ئەم گەل چووین و ئەز برمە وێستگەھا کارەبێ د بۆ ماوێ چار ھەیڤان ل گەل وی ئەمیری بووم و چار بارەگایێن داعش ل وی جھی ھەبوون ل قاتێ ئێکێ بارەگایێ تیرۆرستێن داعش بوو، قاتێ دویێ ئەز د خانی دا بووم وی تیرۆرستی بەحسێ سەربرینا خەلکی دکر و دگۆتە من ھەر کەسەکێ نەھێتە سەر ئاینێ مە دێ سەرێ وی ژێڤە کەین ھەر دەمێ وی تشتەک شاش دگۆت من ژی بەرسڤا وی دا من دگۆت ھەر پیستر نابیت ھەما بلا من بکوژن وی ئەمیری گۆتە من کەس نەوێریت گەل من باخڤیت ئەز ئەمیرێ داعشێ مە تو گەفا ل من دکەی و سۆز دا ل بەر چاڤێن من تشتەکی بکەت.
ناڤبریێ گۆت ژی “پشتی دو ھەیڤان ل گەل وی تیرۆرستی داعش مایم رۆژەکێ ل مەھا سێ یا سالا 2015 سپێدێ زوو وی ئەمیری ئەز ژ خەو راکرم و داخوازا کورێ من راجی کر، ئەز و راجی برینە قاتێ دویێ و گۆتە من سپرایزەک بۆ تە دروست کریە ئەز گەل خوە برم ل وێدەرێ ئەمیرەکێ دی یێ داعش کورسی و مێزە ئینان و کۆمەکا وەرقا دانانە سەر مێزێ و ئەو ئەمیر ل سەر کورسیێ روونشتە خوارێ ژ ترسا من نەشیا ل سەر پیا راوەستایی بمینم ئەز گێژ دبووم نەھێلا ئەز روونمە خوارێ و گۆتە بمینە سەر پیان ھەتا سپرایزا تە دووماھی دھێت پاشی تەدڤێت خوە د قاتێ دویی دا باڤێژە یان تە چ دڤیت ل خوە بکە ئەز وەسا مام پشتی بێھنەکێ من دیت (25) کەس ئینان پیێت ھەموویان پێکڤە گرێ داینە ب زەنجیرەکی و دەستێن وان ڤەکرینە و جلکین پرتقالی بەر وان بوون و ل بەر چاڤێن من سەرژێکرن و سەرێن وان جودا بن ئاخکرن و لەش جودا ڤەشارتن، ئانکو لەش و سەر پێکڤە نەڤەشارتن، راستی ژی دەمێ ل بەر چاڤێن من سەرێن ڤان کەسان بڕین ئەز دین بووم من ئاگەە ژ خوە نەما بۆ ماوێ چەند رۆژان من نەشیا ئاڤ و نانی و تشتەکی بخۆم دلێ من تێر بوو ئەز گەلەک د ھزرا دا مام ھەتا نھا ژی ژ وان دیمەنان دترسم، چ رەحم د دلێ تیرۆرستێن داعشێ دا نەبوو گەلەک توند بوون”.
ل دووماھیێ خالیدایێ گۆت “گەلەک جاران کڕین و فرۆتن ب مە ھاتیە کرن د ناڤ وەلاتێ سووریا دا و تیرۆرستان کورێن من راجی بۆ ماوێ 40 رۆژان برنە مەشق و راھێنانا سەربازی و فێری چەک و شەری کرن ھەتا نھا ژی زارۆیێ من دترسیت”.