رزگاربوویەكێ پەنجەشێرێ ل دهۆكێ رۆژانێن خۆ كرینە پرتووكەك
زنار تۆڤی:
رۆژهات ئیبراهیم، ئەو گەنجێ تووشی پەنجەشێرێ بووی، پاشی ژێ رزگاربووی، پرتووكەك ب ناڤێ ( ئەز دشێم) بەلاڤكرییە و تێدا بەحسێ ژیان و رۆژانێن خۆ دكەت، كانێ چاوا ژ پەنجەشێرێ رزگاربوویە.
ناڤهاتی، بۆ رۆژناما ئەڤرۆ دبێژیت: پشتی من قوناغێن ب زەحمەت دەربازكرین، من هەست پێكر كو من گەلەك ئەزموون ژ ڤێ ژیانێ دیتن، ژبەر هندێ من حەزكر ئەز نەڤەشێرم و بكەمە پرتووكەك كو ژ (267) بەرپەران پێك دهێت و هەموو روودانین راستی تێدا هاتینە نڤێسین، هەروەسا ژبەر پەنجەشێرێ ئەز سێ سالان ژ خواندنێ دووركەفتم و نوكە ل قووناغا 12 ی ئامادەیی ل پشكا زانستی دخوینم، بۆ زانین ل ئیلۆنا 2018 ێ ئەز تووشی پەنجەشێرا خوینێ بووم، ژجۆێ ( ئەی ئێل ئێل)، پشتی من چارەسەری وەرگرتی بۆ دەمێ هەشت هەیڤان، ئەز ب تەمامی ژێ رزگاربووم، پار من ئەڤ پرتووكە نڤیسایە، دڤێ پرتووكێ دا من بەحسێ چەندین مژارێن گرنگ یێن ژیانێ كرییە، ژ وان ژی باوەری بخۆبوون، ئێكگرتنا خێزانێ، دەست نەداهێلان، بەرب پێشڤەچوون، هەر بابەتەكێ من تێدا بەحس كری، من ژیانا خۆ تێدا كریە نموونە، هەروەسا نوكە ل تۆرێن جڤاكی ئەز چالاكڤانەكێ گەشەپێدانا مرۆڤی مە، ب رێیا سۆشیال میدیایێ شیایمە كارتێكرنەكا باش ل سەدان كەسان بكەم ، كو ئەو كەسە ژی گرنگییێ ب ساخلەمیا خۆ بدەن، دیسان هەكە وان ژی ئارمانجەك هەبیت، دڤێت ئەو خۆ ل هیڤیا كەسێ نەگرن، كو بهێن وان رزگار بكەن، دڤێت ئەو ب خۆ بزاڤێ بكەن و خۆ رزگار بكەن.
