رنگە مرۆڤ هەڤپشکێ ژیانا خوە ژ هەموو لایانڤە بنیاسیت
زاخۆ، دلۆڤان هالۆ:
چالاکڤانەکا جڤاکی د دیدارەکێ دا بۆ ڕۆژنامەیا ئەڤرۆ دیار کر کو هەبوونا ژیانەکا خۆش و ئارام ب کێمترین ئاریشە و گازندە یا گرێدایە ب دەستپێکا بڕیارا مرۆڤی ڤە بۆ دەستنیشانکرنا هەڤپشکێ ژیانا مرۆڤی یا هەڤژینیێ.
دهۆك بارزانی، چالاکڤانا جڤاکی، دیار کر کو دڤێت بەری هەلبژارتنا هەڤپشکێ ژیانێ مرۆڤ خۆ ئێکلا بکەت و هەموو بەرهەڤی کربن بۆ دەستپێکرنا پڕۆسەیا هەڤژینیێ، مەرەم ژ ڤێ بەرهەڤیێ ئەوە کو مرۆڤی ب شێوەیەکێ باش خۆ و کەسێ بەرامبەر ژ هەموو لایانڤە بنیاسیت و گۆت: ژبەرکو ئەڤ چەندە دێ بیتە ئەگەر کو کێمترین ئاریشە د ژیانا مرۆڤی دا دروست ببن، یا ژ هەموویێ گرنگتر ژی ئەوە مرۆڤ بزانیت ئارمانج ژ پێکئینانا ژیانا هەڤژینیێ چییە.
چالاکڤانا جڤاکی دا زانین کو چەندین خالێن گرنگ هەنە بۆ نیاسینا کەسێ بەرامبەر، ئەوژی ژلایێ عەقلی و هزرکرنێ ڤە، کۆڕ و کچان دوو کەسایەتیێن جیاواز یێن هەین ئانکو دێ دوو هزرکرنێن جیاواز ژی هەبن و گۆت: دڤێت مرۆڤ بزانیت هزرکرنا وی کەسی چییە دەربارەی ژیانا هەڤژینیێ و چاوانیا ڕەفتارکرنێ و پاشەڕۆژا خێزانێ و پەروەردەکرنا زاڕۆکان و کا ئەڤ کەسە دێ هەست ب بەرپرسایەتیێ کەت یان نە، و دڤێت مرۆڤ ژلایێ دەروونی ڤە ژی ڤی کەسی بنیاسیت کا کەسەکێ دەروون ساخلەمە یان نەخۆشە، بزانیت ئەڤ کەسە دل پیسە یان نە، ڕەزیلە یان مەردە و ژ هەموو تشتان تۆرە دبیت یان نە و کەسەکێ ڤەکریە یان گرتییە.
دهۆکێ د بەردەوامیا ئاخفتنێن خۆدا دیار کر کو ژلایێ لەشیڤە ژی دڤێت مرۆڤ کەسەکێ هەلبژێریت نێزیکی مرۆڤی بیت و لگەل مرۆڤی بگۆنجیت، ئانکو دڤێت جیاوازیەکا مەزن ژلایێ لەشی و سیمایی ڤە دناڤبەرا وان دا نەبیت و گۆت: هەروەسا ئاستێ تێگەهشتن و ڕەفتارکرنا مالباتان ژی لبەر چاڤ بهێتە وەرگرتن، چونکی هەر مالباتەك خودان هندەك ڕەفتار و ڕەوشت و تیتالە.
