ره‌عه‌د محه‌مه‌د: زاخۆ ب یاریا خوه‌لێگدانێ یا ناڤداره و بێی خودانه
ئه‌ڤرۆ، عه‌لی حاجی
د دیداره‌كێ دا راهێنه‌رێ دێرینی یێ پارێزگه‌ها دهۆكێ و باژێرێ زاخۆ بۆ یاریا خوه‌لێگدانێ ره‌عه‌د محه‌مه‌د دیاركر كو به‌رده‌وام ل زاخۆ باشترین یاریزانێ ڤێ یاریێ سه‌ر ئاستێ ئیراقێ و كوردستانێ دهێنه پێش و ناڤوده‌نگیا خوه هه‌یه لێ مخابن بێی خودانه.
زێده‌تر ناڤهاتی بۆ رۆژناما ئه‌ڤرۆ گوت: ل باژێرێ زاخۆ ئێكه‌م جهه سه‌ر ئاستێ كوردستانێ یاریزانێن خوه‌لێگدانێ یا ئازاد ب باشترین شێوه دهێنه به‌رهه‌ڤكرن بۆ ئاستێ پشكۆژان هه‌تا پێشكه‌فتیان و شیاینه هه‌ڤڕكێن بهێزبن و ناسناڤێن ئیراقێ ب ده‌ستڤه‌ئیناینه و هه‌روه‌سان پشكداری قاره‌مانیێن ئه‌ره‌بی و ئاسیا ژی بووینه، ئه‌ڤه وێ چه‌ندێ رادگه‌هینت كو ل زاخۆ بنیاتێ ڤێ یاریێ هه‌یه سه‌رباری ئاسته‌نگان و ناڤۆده‌نگیا خوه كو ئێك ژ یاریێن تایبه‌تمه‌ندیا خوه هه‌یی و باژێرێ زاخۆ وه‌لاتێ روسیایه ب یاریا خوه‌لێگدانێ لێ مخابن پووته‌دان و پشته‌ڤانی بوو نینه.
ژلایه‌كێ دیڤه ره‌عه‌د محه‌مه‌د گوت: قاره‌مانیا ڤێ دووماهیێ یا ئیراقێ ئه‌وا ل زاخۆ هاتیه ئه‌نجامدان ژبه‌ر نه‌بوونا پشته‌ڤانیێ دو ستێرێن مه و هه‌لبژارتیێ ئیراقێ وه‌لات محه‌مه‌د و شه‌هید حزنی بۆ یانێن به‌غدایی كربوون و یاریزانێن مه رێزێن باش بده‌ستڤه‌ئینان سه‌رباری هه‌موو ئه‌و یاریزان كه‌فتنه هه‌مبه‌ری هه‌ڤڕكێن خوه پیشه‌كارێن بیانی یێن یانێن ئیراقی، هه‌كه پشته‌ڤانی هه‌با نه‌بتنێ سه‌ر ئاستێ ئیراقێ به‌لكو یاریزانێن مه شیانێن هه‌ین ب ئالایێ كوردستانێ سه‌ر ئاستێ نێڤده‌وله‌تی ژی هه‌ڤركبن.
لدووماهیێ ناڤهاتی هیڤی خواست حوكمه‌تا هه‌رێما كوردستانێ پشته‌ڤانیا ئه‌وان بن و نه‌هێلین ئه‌ڤ بنیاته ب هه‌ڕڤیت وه‌رزشا خوه‌لێگدانێ به‌ره ب نه‌مانێ بچیت وجوداهیێ دناڤبه‌را چو یاریان نه‌هێته‌كرن بۆ زانین ئه‌ڤ تیمه شیانێن ناسناڤان ژی هه‌نه.
