ره‌ند ره‌حیم: چه‌ندین سزایێن گران چاڤه‌رێی به‌غدا دكه‌ن
ئه‌ڤرۆ نیوز ، زنار تۆڤی:
ل رۆژا هه‌شتی ڤێ هه‌یڤێ په‌رله‌مانێ عیراقێ ب بریاره‌كێ داخواز ژ حوكمه‌تا عیراقێ كر، كو هێزێن بیانی ژ عیراقێ ده‌ربێخن، ل سه‌ر ڤی بابه‌تی بالیۆزێ به‌رێ یی عیراقێ ل ئه‌مریكا دیار كریه، عیراق دێ تۆشی هنده‌ك سزایێن گران بیت، هه‌كه هێزێن ئه‌مریكا ژ عیراقێ ده‌ر بكه‌ت، پێدڤیه كورد خوه ژ ڤێ بریارا په‌رله‌مانێ عیراقێ بپارێزن.
ره‌ند ره‌حیم بالیۆزا به‌رێ یا عیراقێ ل ئه‌مریكا ل سه‌نته‌رێ ئه‌تلانتیك كاونیل بۆ ڤه‌كولینێن ستراتیژی ل واشنتۆن، ده‌رباره‌ی ره‌وشا عیراقێ گۆت، بریارا په‌رله‌مانێ عیراقێ دێ بیته ئه‌گه‌رێ ژ ده‌ستدانا شیانێن راهێنانێ و هاریكاریێن لۆژستی و ته‌كنیكی و پشكداریا پێزانینێن هه‌والگیریێ، كو هه‌ڤپه‌یمانیا نێڤده‌وله‌تی پێشكێشی له‌شكرێ عیراقێ دكه‌ت، ئه‌ڤه دێ بیته ئه‌گه‌ر كو جاره‌كا دی داعش رێزێن خوه رێكبێخیت، چونكی د نوكه دا هێزێن عیراقی شیانێن روو ب روو بوونا داعشێ نینن.
هه‌روه‌سا گۆت ژی: هه‌كه عیراق هێزێن ئه‌مریكا ده‌ربێخیت، دێ ئه‌مریكا هنده‌ك سزایێن گه‌له‌ك مه‌ترسیدار ل سه‌ر عیراقێ سه‌پینیت، ب تایبه‌تی ژی پشتی هێرشێن دۆنالد تره‌مپی سه‌رۆكێ ئه‌مریكا ل دۆر سه‌پاندنا سزایێن ئابووری یێن گران و ژ ناڤبرنا ره‌وشا دارایی یا عیراقێ ل ناڤخوه و ده‌رڤه ژی، چونكی په‌یوه‌ندیێن عیراقێ نه ب تنێ ل گه‌ل ئه‌مریكا نه، به‌لكو ل گه‌ل وه‌لاتێن رۆژئاڤا ژی یێن هه‌ین و ئه‌و په‌یوه‌ندیه دێ تێكچن و ئه‌ڤه دێ بیته ئه‌گه‌رێ وێ چه‌ندێ كو عیراق روو بكه‌ته هه‌ردو وه‌لاتێن رووسیا و چینێ، هه‌ر چه‌نده ئه‌ڤه دێ هه‌ژموونا ئیرانێ ل سه‌ر ره‌وشا سیاسی و ئابووری یا عیراقێ زێده‌تر لێ كه‌ت.
بالیۆزا به‌رێ یا عیراقێ ل ئه‌مریكا هێشتا دبێژیت: بریارا په‌رله‌مانێ عیراقێ دێ كاریگه‌ریا خوه هه‌بیت ل سه‌ر په‌یوه‌ندیێن د ناڤبه‌را پێكهاتێن سه‌ره‌كی د عیراقێ دا، ب تایبه‌تی ژی بریارا په‌رله‌مانێ عیراقێ ب تنێ ب ئاماده‌بوونا ئالیێن شیعی ب تنێ هاتیه دان بێ پێكهاتێن دی یێن سه‌ره‌ك ل عیراقێ ئه‌وژی سوننه و كورد، د ڤێ قۆناغێ دا دێ كورد خوه ژ بریارا ده‌ركرنا هێزێن ئه‌مریكا ل عیراقێ پارێزن، ئالیێ سوننی ژی ترس یا پێڤه دیاره و چاڤێ وان یێ ل هێزێن هه‌ڤپه‌یمانان ژ پێخه‌مه‌ت كێمكرنا هه‌ژموونا ئیرانێ ل عیراقێ، هه‌ر چه‌نده ئه‌ڤ بریارا په‌رله‌مانێ عیراقێ باوه‌ریێ د ناڤبه‌را پێكهات و هێزێن عیراقێ دا ناهێلیت.
