ره‌وشا ده‌ڤه‌رێ دێ بهایێ به‌رمیله‌كا پترۆلێ گه‌هینیته 200 دۆلاران
ئه‌ڤرۆ نيوز:
بهایێ به‌رمیله‌كا پترۆلی ل بازارێن جیهانی دێ بلند بیت بۆ 200 هه‌تا 250 دۆلاران و ئابوورێ گه‌له‌ك وه‌لاتان دێ تێكچیت ژ ئه‌گه‌رێ گرژیێن دناڤبه‌را ئه‌مریكا و ئیرانێ، ئه‌ڤه بۆچوونێن باقر جه‌بر ئه‌لزوبه‌یدی وه‌زیرێ به‌رێ یێ دارایی ل عیراقێ بوون.
باقر جه‌بر ئه‌لزوبه‌یدی د نڤیسینه‌كێ دا ل به‌رپه‌رێ خوه ل سه‌ر تۆرا فیسبووكی دبێژیت” ده‌ڤه‌ر دێ گرژیه‌كا چاڤه‌رێنه‌كری ب خوه‌ڤه بینیت ژ ئه‌نجامێ هه‌لویستێن ئه‌مریكا و ئیرانێ، پێشبینیێ ژی دكه‌م بهایێ به‌رمیله‌كا پترۆلێ ل بازارێن جیهانێ بگه‌هیته دناڤبه‌را 200 – 250 دۆلاران، د ده‌مه‌كی دا هه‌ست ب ئاماژێن شه‌ری ل هه‌ردو به‌نده‌رێن هورمز و بابولمه‌ندب دهێته كرن”.
ئه‌لزوبه‌یدی زێده‌تر گۆت”ژبه‌ر ڤێ چه‌ندێ داخواز ژ حوكمه‌تا عیراقێ دكه‌م له‌زێ بكه‌ت د زێده‌كرنا هنارتنا په‌ترۆلا عیراقێ ب رێیا به‌نده‌رێ جه‌یهان یێ توركی كو رێژا هنارتنێ بگه‌هیته ئێك ملیۆن و 500 هزار به‌رمیلان د رۆژه‌كێ دا كو ئه‌ڤه دێ پێدڤیێن عیراقێ پركه‌ت”.
ئه‌لزوبه‌یدی گۆت ژی”پێشبینیێ دكه‌م بهایێ پترۆلێ ب رێژه‌كا زۆر بلند ببیت و ببیته ئه‌گه‌رێ ژناڤچوونا ئابوورێ چه‌ندین وه‌لاتێن ئه‌ورۆپی و باشوورێ رۆژهه‌لاتا ئاسیا و ئه‌مریكا و هژماره‌كا وه‌لاتێن دی، هه‌روه‌سا دێ 30% ژ قه‌بارێ گه‌شتێن ئه‌سمانی یێن كۆمپانیێن هێلێن ئه‌سمانی هێته خوار و بهایێ ئێك پلێتێ دێ هه‌شت جاركێ زێده‌بیت و د ئه‌نجامدا دێ داهاتێ وه‌لاتیێن گه‌شتیاری گه‌له‌ك هێته خوار و كارتێكرنه‌كا مه‌زن دێ ل ئابوورێ وان كه‌ت”.
وه‌زیرێ دارایی یێ عیراقێ یێ به‌رێ ئاماژه كر ژی كو هه‌ر گرژیه‌كا ل كه‌نداڤی یان ل بابولمه‌ندب، كو رێیه‌كا سه‌ره‌كی یا بازرگانیا جیهانی یه ب تایبه‌تی یا پترۆلێ، روو بده‌ت دێ كارتێكرنه‌كا گه‌له‌ك مه‌زن ل ئابوورێ جیهانێ كه‌ت و وه‌لاتێن كه‌نداڤی ژی كو په‌ترۆلا خوه ب رێیا ده‌رگه‌هێن هورمز و بابولمه‌ندب دهنێرین، دێ تووشی ئابلۆقه‌كا ئابووری یا ب هێز بن و ئابوورێ وان دێ وه‌كو ره‌وشا نوكه یا ئابوورێ ئیرانێ تێدا لێ هێت.
ژلایێ خوه‌ڤه بێوار خنسی، شاره‌زا د وارێ پترۆل و غاز و ژێده‌رێن سروشتی دا راگه‌هاند”بۆچوونا پتریا شاره‌زایێن وزا جیهانی ئه‌وه هه‌ر كێشه‌ك ل ده‌ڤه‌را كه‌نداڤی دروست ببیت ب جۆره‌كی كارتێكرنێ ل سه‌ر به‌رهه‌مئینان یان هنارتنا په‌ترۆلێ بكه‌ت، دێ بیته ئه‌گه‌رێ بلندبوونا بهایێ پترۆلێ، چونكه رۆژانه ل كه‌نداڤی و ب تایبه‌تی ل ده‌رگه‌هێ هورمز 17 ملیۆن به‌رمیلێن پترۆلێ ژ وێرێ دهێنه هنارتن بۆ وه‌لاتێن جیهانێ، یان ئه‌و كێلگێن زه‌به‌لاح یێن پترۆلێ ل وه‌لاتێن سعودیێ و كوێتێ و عیراقێ و قه‌ته‌رێ هه‌ین دێ تووشی ئالۆزیه‌كا سیاسی یان یا له‌شكری بن، دێ راسته‌وخوه بهایێ په‌ترۆلێ بلند كه‌ت”.
