ره‌وشا سووریێ ئالۆزتر دبیت
ئه‌ڤرۆ، سه‌رجان مه‌حمود:
ل رۆژئاڤایێ حه‌له‌بێ د ناڤبه‌را سه‌ربازێن سووریێ و سوپایێ توركیا دا رۆژا 13/5/2022 شه‌ره‌كی دژوار روو دا و د ئه‌نجام دا ژ هه‌ر دو ئالیان 19 كه‌س هاتنه كوشتن و 23 كه‌س ژی بریندار بوون و رژێما ئه‌سه‌دی هێزێن خوه یێن سه‌ربازی ل رۆژئاڤایێ حه‌له‌بێ زێده كرینه و ل هه‌مبه‌ر دا سوپایێ توركیا و چه‌كدارێن توندره‌و یێن سه‌ر ب توركیا ل گوندێ شێخ سلێمان و هنده‌ك ده‌ڤه‌رێن دی ده‌ست ب ئێرشێن نوو ل دژی هێزێن سووریێ كرن.
د ڤێ مژارێ دا و ل دووڤ ژێده‌رێن هه‌رێمی رژێما ئه‌سه‌دی ئه‌ڤ دو حه‌فتینه به‌رده‌وام هێزێن خوه ل ده‌وروبه‌رێن باژێرێ ئدلبێ و رۆژئاڤایێ حه‌له‌بێ بجه دكه‌ت و فرۆكه‌یێن شه‌ری یێن رۆسیا ژی بنگه‌هێن كۆمێن چه‌كدار یێن سه‌ر ب توركیا ڤه بۆمبه‌باران دكه‌ن و د ئه‌نجاما بۆمبه‌بارانا فرۆكه‌یێن رۆسیا دا هژماره‌ك زێده سه‌ربازێن توركیا و چه‌كدارێن توندره‌و هاتنه كوشتن و رۆسیا ژ توركیا دخوازیت كو كۆمێن چه‌كدار ژ سنورێ حه‌له‌بێ ڤه‌كێشیت و هه‌تا نها ئه‌و یه‌ك ژ ئالیێ توركیا ڤه نه‌هاتیه قه‌بوولكرن، ژ به‌ر هندێ ژی هه‌تا نها شه‌ر و ئالۆزی ل حه‌له‌بێ و ده‌وروبه‌رێن وێ ب دژواری به‌رده‌وامن.
هه‌روه‌سا ل ناڤه‌ندا باژێرێ عه‌فرینێ ژی چه‌كدارێن توندره‌و ئێرشی وه‌لاتیێن كورد كرن و وه‌لاتیێن كورد ژی ب چه‌كان به‌رسڤا وان دان و د ئه‌نجام دا سێ لاوێن كورد و چار چه‌كدارێن توندره‌و هاتنه كوشتن.
