ره‌وشا شانۆ و دراما و سینه‌مایێ ل دهۆكێ گه‌له‌ك لاوازه
سندس سالح سلێڤایی:
ئه‌كته‌رێ به‌رنیاس (كاروان جه‌رگیس) د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: چو پێ نه‌ڤێت هه‌ر كه‌سه‌كی ژمه به‌هره‌یه‌ك یا هه‌ی و حه‌ز دكه‌ت ل پاشه‌رۆژێ بگه‌هیتێ و ب هیڤیا خوه شاد ببیت، له‌ورا به‌هره‌یا من ژی ده‌مێ ئه‌ز زارۆك من حه‌زژ سترانگۆتنێ دكر و هنده‌ك جاران ژی زارڤه‌كرن دكر، پشتی چوویمه قوتابخانێ ده‌لیڤه هات ل هنده‌ك هه‌لكه‌فتان سترانان بۆ ماموستا و هه‌ڤالێن خوه یێن قوتابی بێژم و هه‌كه پێدڤی ببا مه شانۆگه‌ری ژی چێدكرن، هه‌روه‌سا ل تاخێ ئه‌ز لێ دژیام من ستران بۆ هه‌ڤالێن خوه دگۆتن و پشتی چه‌ند سالان به‌هره‌یا من بۆ زارڤه‌كرن له‌ورا ل سالا 2003 ئه‌ز چوومه پشكا شانۆیێ ل په‌یمانگه‌ها هونه‌رێن جوان و ل سالا 2006 بۆ جارا ئێکێ ئه‌ز چوومه سه‌ر ده‌پێ شانۆیێ و هه‌تا نوكه من پشكداری د چه‌ندین شانۆگه‌ری و زنجیره درامایان دا هه‌نه و هیڤیێن من بۆ پاشه‌رۆژێ دگه‌شن، له‌ورا دێ یێ به‌رده‌وامبم.
هه‌روه‌سا گۆت: هه‌ر پشكداریه‌كا من كربیت هه‌موو رۆل بۆ من دگرنگ بووینه و ئه‌ز نه‌شێم دیاربكه‌م كا كیژ بۆ گرنگتر بوویه، چونکۆ وه‌كو من گۆتی هه‌موو رۆل بۆ من گه‌له‌ك دگرنگ بووینه، چنكو هه‌ر ئێكی تاما خوه یا تایبه‌ت هه‌بوویه ، هه‌روه‌سا من گه‌له‌ك خوه زه‌حمه‌ت دایه هه‌تا خوه پێگه‌هاندی و گه‌هشتیمه ڤی ئاستی و ئاسته‌نگ ژی ئه‌و بووینه گه‌له‌ك جاران دا پێدڤی ب په‌رتووكه‌كێ بین ل دۆر ئه‌كته‌ریێ یان شانۆگه‌ریان ب ده‌ستڤه‌ئینانا وان ل په‌رتووكخانه‌یان گه‌له‌كا ب زه‌حمه‌ت بوو، چنكو ئه‌و جۆرێن په‌رتووكان دكێمن، لێ پشتی ئنته‌رنێت هاتی نوكه ب ساناهتر لێ هاتینه.
ل دۆر ره‌وشا شانۆ و دراما و سینه‌مایێ ژی گۆت: ب دیتنا نوكه من ره‌وشا شانۆ و دراما و سینه‌مایێ ل دهۆكێ به‌ر ب خرابیێ ڤه‌یه و گه‌له‌كا لاوازه، دبیت ئه‌ڤ چه‌نده ژبه‌ر هندێ بیت كو هه‌تا نوكه مه چو كۆمپانیێن مه‌زن یێن هونه‌ری ل دهۆكێ نینن كو خوه ل به‌رهه‌مێن خۆمالی بكه‌ته خودان و چێكه‌ت، هه‌روه‌سا حكومه‌ت ژی وه‌كو پێدڤی نه‌یا هاریكاره، له‌ورا دڤێت شۆڕه‌شه‌كا مه‌زن یا هونه‌ری بهێته كرن هه‌تا هونه‌ر رابیته سه‌ر پێن خوه و هه‌ڤڕكیێ بكه‌ت.
ل دووماهیێ گۆت: شیره‌تا من بۆ وان كه‌سان ئه‌وه ئه‌وێن ژنوو دهێنه د ناڤ هونه‌ری دا به‌ری هه‌ر تشته‌كی خوه ره‌وشه‌نبیر بكه‌ت و په‌رتووكان ل دۆر هونه‌ری بخوینن، هه‌روه‌سا باشه بچنه په‌یمانگه‌هێ یان كولیژا هونه‌رێن جوان دا كو ب شێوه‌یه‌كێ ئه‌كادیمی خوه ئاڤا بكه‌ن، هه‌روه‌سا دڤێت به‌هره‌یا هونه‌ری ژی هه‌بیت داكو بشێت به‌رده‌وام خوه پێ بگه‌هینیت، هه‌روه‌سا دڤێت مرۆڤ به‌رده‌وام دانوساندنێ ل گه‌ل خه‌لكه‌كێ بیانی بكه‌ت ژده‌رڤه‌ی وه‌لاتی، چنكو گه‌له‌ك هزرێن نوو بۆ مرۆڤی په‌یدا دبن و ب خۆشحالی ڤه ل سالا 2019 ئه‌ز پشكدارم د فلمه‌كێ بیانی دا كو دناڤبه‌را هه‌رێما كوردستانێ و وه‌لاتێ ئسپانیا و پۆرتۆغال دا و سه‌ربۆره‌كا باش من ژوان وه‌رگرت، بۆ پاشه‌رۆژێ ژی پلانا من ئه‌وه ئه‌ز پتر خزمه‌تا زارۆكان بكه‌م و هنده‌ك به‌رنامه‌یێن په‌روه‌رده‌ی زانستی چێكه‌م و بۆ هه‌یڤا ره‌مه‌زانێ ژی مه به‌رهه‌مه‌ك هه‌بیت، لێ دیسان دێ بێژم هیڤیا من ئه‌وه حكومه‌تا هه‌رێما كوردستانێ پلانه‌ك بۆ باشتر پشته‌ڤانیكرنا به‌رهه‌مێن خۆمالی یێن كوردی هه‌بیت.
