رهوشتێ روژنامهڤانی بهری سیاسهتا دهزگههی
روژنامهڤانی ئهو پیشهیا ههره مروڤایهتی و ئهخلاقی و بهرپرسیار ل سهر ههمی كوژیێن ژیانا خهلكی، ئامرازێن پهیوهندیێن جهماوهری دهێنه هژمارتن ژ خالێن ههره گرنگ د كومهلگههاندا و پیڤهرێن پێشڤهچونا شارستانیهتا وێ كومهلگههێ نه، ئهڤ ئامرازێن پهیوهندیێ دهزگههێن راگههاندنێ نه ئهڤێن رهسهنایهتیا جڤاكی و رهوشت و رهوشهنبیری و كهلتورێ وی دیار دكهن. تایبهتمهندیێن زانستێن مروڤایهتی گهلهك گرنگی ب رهوشتێن پیشهیی دایه و ههر زانستهك ژ وان ل دوڤ تایبهتمهندیا وی و پێشهنگا ڤان زانستا زانستێ میدییایی ئانكوی یێ روژنامهڤانی یه، روژنامهڤانی ئهو پیشهییێ گرنگ و بهێز د ئاراستهكرنا گهلاندا پیشهیهكه مروَڤان فێری هێز و شیان و دلفرههییێ دكهت رهوشتێن كارێ روژنامهگهرییێ گهلهك رامانان ددهت د ئێك دهم دا، راسته ههر دهزگهههكێ روژنامهگهری مولكێ دهولهت یان حزب یان كومپانیهكێ یه لێ ئهو مولكیهت بتنێ د كوژیێ ماددی دایه ژبهركو ئهو نامهیهكا ئاراستهكریه بو مللهتی كهواته ئهو د بنیات دا مولكێ مللهتی یه.
د كاودانێن ههرێما كوردستانێ تیدا دهرباز دبیت رهوشتێن میدیایی و بهرپرسیارهتیا نهتهوهیی ژ ههر بهرژهوهندیهكا بهرتهنگا حزبایهتی و جوداهیا بیرو رایان گرنگ تره ههلویستێ روژنامهڤانان دڤێت مهزنتر بیت ژ ههلویستێ حزب و لایهنێن ئهو دهزگهه مولكێ وان ییێ ماددی، دڤیابا ههر ژ دهست پێكا قهیرانێن ل ههرێما كوردستانێ پهیدا بویین دهزگههێن راگههاندنێ رولێ شیرهتكاری و چاكسازی گێرابا، بهردهوام شارازایێن ئابوری و سیاسی مێڤان كربانه و بهردهوام پێشنیار پێشكێشی حكومهتێ كربانه گرگنیا كارێ میدییایی دیاركربا بو خهلكی و سهنگا وی بو حكومهتی دوپاتكربا ئهركێ كارێ روژنامهڤانی ییێ گرنگ و ب مهترسی ل سهر حكومهتێ و جڤاكی گێرابایه پێگیریكرنا روژنامهڤانییێ وهك پیشه ب پیڤهریێن سهرهكی یێن مللهت پارێزی و پێشڤهچوون و ئاراستهكرنا خهلكی كربایه، ئێدی نوچه د ڤی سهردهمی دا نهمایه ماددهك نڤیسهر كومڤه دكهت و سهرنڤیسهر بهلاڤ دكهت بهلكو نوچه بویه پشكهك ژ ههڤركیا استراتیجی د ناڤبهرا گهلاندا، نوچه نوكه نیڤهكا جهنگی یه ئێدی سیاسهتێن جودا و حزب و لایهن ب رێیا نوچهیان ئاراستهیا خهلكی د گهورن لێ ئهو ئاراسته دێ بهرهڤ كیڤه بیت دڤێت ههر دهزگهههكێ راگههاندنێ شیرهتكارێن جودا جودا ههبن بو شروڤهكرن و خاندنا ههر نوچهیهكی و ئاراستهیێن وی نوچهی یێن نێزیك و دویر، دهزگههێن راگههاندنێ ل ههرێما كوردستانێ ئێدی ب ژمارێ نه ب چهوانی و جوری لهورا ئهڤ فهوزایه دروست كریه.
ئهو كارێ نوكه ل هندهك دهزگههێن راگههاندنێ ل ههرێما كوردستانێ دهێته كرن نه ئازادیا رادهربرینێ یه و نه ئازادیا كارێ روژنامهڤانیه بهلكو تهعدا كرنه ب پیروزیێن خهلكی و یاریكرنه ب ههست و سوزێن خهلكی بهرامبهر دێ ئهنجام تێكدان و قوربانیدان بن و چ خزمهتهكێ پێشكێشی مللهتی ناكهن، لهورا دڤێت حكومهتا ههرێما كوردستانێ پێداچونهكێ د یاسایا كارێ روژنامهڤانی دا بكهت زێدهباری یاسایێن مافێ بدهستڤهئینانا پێزانینان و دهركرنا یاسایێن نوی بو دهزگههێن راگههاندنێ و مهرجێن جوری بو ههر دهزگهههكی دیار بكهت ئێدی نابیت ههر كهسهك ل مالا خوه ئهریهلهكی یان بورجهكی دانیت و یا وی دڤێت پهخش بكهت دڤێت ههر دهزگهههك ئاراسته و ئارمانج و پلانا خوه پێشكێشی لایهنێن پهیوهندیدار بكهت و بهرپرسیار بیت بهرامبهر ههر نهپێگیری كرنهكێ ب تایبهت ئهو بابهتێن گرێدایی ئێمناهیا ههرێما كوردستانێ و تێكدانا رهوشا ئهمنی و یاریكرنێ ب ههست و سوزێن خهلكی.