ره‌وشت بلندیا به‌رگه‌كرتنێ(ته‌حه‌مل)
دیارى بۆ (هه‌ر كه‌سێ بكریار ره‌وشت بلند)
گه‌له‌ك بهێرس كورسیكا خوه لێكزڤراند و به‌رێ خوه ژ تیڤیا بدیوارى ڤه هه‌لاویستى، گوهۆڕى. بۆڵه بۆڵا وى سه‌رنجا كه‌سێن ل وێرێ بۆ خوه راكێشا، لێ سه‌رنجێن تووژێن مێهڤانا چ باندۆر ل سه‌ر ڤێ كریارا وى نه‌كر. ژ روویێ وى دیاربوو كو هێرسا دلێ وى ژ سه‌رنجێن وان بژانتر بوو! له‌رزه‌كا بهێز گیانێ وى دهه‌ژاند و ببوو چیڕه چیڕا كورسیكا لبن. ئه‌فه‌ندیێ لبه‌رامبه‌ر ده‌ست ب جورئه‌تا خوه ڤه‌نا و بده‌نگه‌كێ نه‌رم و بهشیارى نه‌كو ڤۆلكانا هێرسا وى پتر بشاریێت، گۆت:
– مامێ عه‌لۆ خودێ نه‌كه‌ت، ما تشته‌كى روودایه یان نساخیه‌كا گران كه‌سه‌كێ خوه‌شتڤیێ هه‌وه گرتیه كو چاره ل نه‌خوه‌شخانێن مه نه‌بیت و نه‌چار ببى، ببیه ده‌رڤه‌ى وه‌ڵاتى!
– دیاره تۆ یێ د گوهێ گاى دا نڤستى! ما ڤى دارگرانێ لسه‌ر تیڤیێ نابینى چ پیساتى ژده‌ڤى دكه‌ڤیت و ئه‌فه‌ندى ل رۆژا نیڤرۆ یێ پاساوا بۆ داگیركرنا كوردستانێ دده‌ته ئه‌ردۆغانێ هه‌تا حه‌فكێ بخوینا كوردان سۆربووى.
– ماڵا ته، من گۆت كا چ روودایه!
– وه‌ح ما ژڤێ مه‌زنتر هه‌یه؟
– به‌لێ ..
– یا ژمنڤه، ژڤێ مه‌زنتر نینه ژبلى ئه‌گه‌ر تۆ ژى پاساوا بۆ لاوێن په‌ریخانێن كوردستانێ ببینى، ما نه‌هاتیه گۆتن:” سه‌به، ژ قه‌ومێ خوه به”
– ئه‌وێن تۆ ژێ دبێژى، هه‌موو كوردستانێ گورى به‌رووكا خوه دكه‌ن، ما ته ژبیرا خوه بریه، هه‌كو لسه‌ر خوه شرینكرنێ بۆ داگیركه‌ران ملێن هه‌ڤ شكاندین!
– مخابن ئه‌فه‌ندى ژى ببن پاساو ڤه‌گێر ..
– پاساو ڤه‌گێرێن چ ..
– به‌رێ خوه بده ئه‌فه‌ندیێن ئه‌لمانان كانێ چه‌وان دوهى هه‌موویان پێكڤه ده‌رسۆكێن شه‌رڤانێن عه‌فرینێ لستۆیێ خوه ئالاندبوون و تبلا خوه دكرنه د ناڤچاڤێن ئه‌ردۆغانێ دراكۆڵایێ ڤى سه‌رده‌مى و هه‌موو هه‌ڤكار و ده‌ستكیسێن وى.
– ئێه .. ئه‌و دئازادن و ده‌ستێ ئه‌ردۆغانى ناگه‌هت بڕینا مۆچه و گرتنا سنۆرێ وان.
– من گۆت تۆ ژى گه‌هه‌شتیه كاروانێ پاساو ڤه‌گێران، لێ تۆ بهێرس كه‌فتى!
– “ده‌ستێ بن به‌ریه!”
– هه‌ردیسا پاساو ..
– ده‌ردێ ته چیه؟
– ده‌ردێ من ئه‌ڤ په‌رله‌مانه‌یه!
– كیشك، یێ به‌غدا یان یێ ..
– تۆ خودێ به‌حسێ یێ به‌غدا نه‌كه، دلێ من بره‌وشا وان دسۆژیت.
– تێ گه‌هه‌شتم.
– د چ گه‌هه‌شتى؟
– تۆ یێ دترسى!
– ژ چ؟
– نه‌كو خوه بۆ په‌رله‌مانى بهه‌لبژێرى!
– به‌س نه بۆ په‌رله‌مانێ پاساوا بۆ شكه‌ستنان ببینیت و ببێژیته ده‌ستكیسێن داگیركه‌ران ئه‌ز به‌نى.
3.02.2018
دهۆك
