ره‌وشه‌نبیرێن بێ هه‌لویست
ره‌وشه‌نبیر ئه‌و كه‌سه یێ په‌یامێ راستیێ دگه‌هینیت و به‌رگریێ ل مافێن وان كه‌سان دكه‌ت یێ كو ژ لایێ ده‌ستهه‌لاته‌ك توتالیتار و فۆدالی ڤه دهێته چه‌وساندن، ئه‌و كه‌سه یێ كێماسی و شاشیێن ده‌ستهه‌لاتێ ژ بۆ گه‌ل ئاشكه‌را بكه‌ت و قه‌له‌مێ خوه ژ بوونا ئازادیا مرۆڤێن بنده‌ست بكاردئینیت. روه‌شه‌نبیر خودان په‌یامه‌ك پێرۆزه دڤێت وی په‌یامی بئه‌مانه‌ت به‌گه‌هینت بێ به‌رچاڤكرنا به‌رژوه‌ندیێن خوه یێ كه‌ساتی. رۆژنامه‌نڤێسێ ئیتالی (ئه‌نتۆنیۆ گرامشی) دبێژیت”(هه‌موو كه‌س ره‌وشه‌نبیرن، لێ هه‌موو كه‌س نكارن ئه‌ركێ ره‌وشه‌نبیریێ راكه‌ن). واته ئه‌ركێ ره‌وشه‌نبیریێ ئه‌ركه‌ك قورس و گرانه هه‌ر كه‌س نكاره وی ئه‌ركی ب ئه‌مانه‌ت بگه‌هینیت). ره‌وشه‌نبیرێ سه‌ركه‌فتی ئه‌و كه‌سه ده‌ما ناكۆكی و دوبه‌ره‌كی كه‌ڤیته د ناڤبه‌را دو لایه‌نێن سیاسی دا، یان جڤاكیدا بێ لایه‌ن ره‌فتارێ ل گه‌ل بوویه‌ران بكه‌ن، راستیێ به‌رچاڤ بكه‌ن. ژبه‌ر كو ره‌وشه‌نبیر وژدانا گه‌له، دڤێت بێ وژدانیێ ل گه‌ل خه‌لكێ خوه نه‌كه‌ت. پێدڤیه ره‌وشه‌نبیر بێ ترس و به‌رچاڤكرنا به‌رژوه‌ندیێن خوه راستیێ ژ خه‌لكێ دیار بكه‌ت، كا كیژان لایه‌ن سوجدار و تاوانباره. دڤێت ره‌وشه‌نبیر هه‌رتم فاكته‌رێ ئاڤاكرنێ بیت، نه ئالاڤێ تێكدانێ بیت، ژ به‌ر كو ره‌وشه‌نبیر رۆژنامه‌ڤان نوێنه‌ریا گه‌ل دكه‌ن، ل مافێن وان دپرسن، هه‌كه ئه‌و ژی مینا ده‌ستهه‌لاتێ ژ راستیێ دووركه‌تن بوونه گه‌نده‌ل گه‌ل پاش خوه هێلا و په‌سنا پارت و لایه‌نێن سیاسی كرن، وی چاخی گه‌ل بێ خوه‌دی ل ئۆرتێ دمینیت، ئه‌و گه‌ل مینا په‌زێ بێ شڤان بێ خودان ل چۆلان دمینیت. ئه‌و نه ره‌وشه‌نبیره یێ ببیته پارێزه‌ر به‌ره‌ڤانیێ ژ سیاسه‌ت و ئادولۆژیێن پارتیه‌كێ یان لایه‌نه‌ك سیاسی بكه‌ت ژ بوونا پاراستنا به‌رژوه‌ندیێن خوه یێ تایبه‌ت. ئه‌ز دبینم د گه‌رماتیا شه‌ڕێ مانونه‌مانێ دا ل گه‌ل هێزێن تاریپه‌رێس كو كه‌سه‌ك نزانیت دێ ئه‌نجامێن ڤی شه‌ڕی چ قاس ل سه‌ر گه‌لێ كوردان گرانبیت و چاره‌نڤێسێ وان به‌رب كیژان كنار چیت، پڕانیا ره‌وشه‌نبیرێن مه د بێده‌نگن یانژی ل گۆر ئادیۆلۆژیا حزبێن خوه یێن سیاسی هێرشان دكه‌ن ل سه‌ر لایه‌نه‌ك كوردی بێ كو بزانن كا چ روودایه و چ بوویه، ئێكسه‌ر دێ قه‌له‌مێن خوه تیژكه‌ن كێله‌كێن ئێكدو سمن و هه‌ستا ئێكدو برینداركه‌ن، گه‌ل ژی بێ ئءمێد و بێ مورال دبیت. دلێ پارتیزان و شه‌ڕڤانان ژ كار و خه‌باتێ ساڕ دبیت، ئه‌ڤه ژی سه‌ده‌ما وێ ئێكێ یه كو مه ره‌وشه‌نبیرێن بێ لایه‌ن و ئازاد و سه‌ربخوه نینن، یان هه‌كه هه‌بن ژی زۆر دكێمن، له‌وما هه‌یا نها ب ئه‌ركێ خوه‌یێ پیشه‌یی و ره‌وشتی نه‌رابوونه، خاله‌ك ژ پره‌نسیپێن ره‌وشه‌نبیریێ بجهـ نه‌ئینایه. هه‌كه ئیرۆ ره‌وشه‌نبیرێن كورد ب ئه‌ركێ خوه‌یێ نه‌ته‌وه‌یی و نیشتیمانی رابن، دادی و بێدادی ژ ێكجودا بكه‌ن، دێ سنۆره‌ك ژبۆ ده‌ستهه‌لاتێ ژی هێته دانان، دێ گه‌ل ژی ب ئۆمید كه‌ڤیت كو هێزه‌ك ل پشت وان هه‌یه به‌ره‌ڤانیێ ل مافێن وان دكه‌ت. لێ مخابن ئێشا سیاسیان ره‌وشه‌نبیرێن مه‌ژی گرتیه، گه‌ل ژی ب هیڤیا خۆدێ ڤه.
