ره‌ڤانديێن ئێزدى بۆ ڤى جهى هاتنه ڤه‌گوهاستن
ئه‌ڤرۆ نيوز:
رێڤەبەرێ نڤێسینگەھا کاروبارێن رەڤاندیان ل دھۆکێ دیار کر کو تیرۆرستێن داعش گەلەک کچ و ژن و زارۆیێن ئێزدی یێن رەڤاندنی ڤەگوھاستنە باژێرێ رەقە یێ وەلاتێ سووریا و گۆت: “ل دووڤ پێزانینان ژمارەکا زۆر رەڤاندیێن ئێزدی ل مووسلێ ھەنە”.
حسێن قائیدی، رێڤەبەرێ نڤێسینگەھا کاروبارێن رەڤاندیان ل دھۆکێ بۆ رۆژناما ئەڤرۆ دیار کر کو دوھی 17-10-2016 تیرۆرستێن داعش گەلەک رەڤاندیێن ئێزدی بەرەب رەقە ڤەگوھاستن و گۆت: “پتریا رەڤاندیێن ئێزدی د دەستێن تیرۆرستێن داعشی دانە ل باژێری مووسلێ ژ بەر ڤێ چەندێ داخوازێ ژ سەرۆک ھۆز و خەلکێ مووسلێ دکەین رەڤاندیێن ئێزدی د ناڤ مالێن خوە دا ب پارێزن ھەتا مووسل دھێتە کونترۆلکرن و رێ نەھێتە دان تێرۆرستێن داعش رەڤاندیان د رێیا بەعاج را ببەنە وەلاتێ سووریا و سەرەرایی ڤێ چەندێ داخوازێ ژ ھێزێن ھەڤپەیمانان ژی دکەین وان خانی و جھان توپباران نەکەن یێن رەڤاندیێن ئێزدی تێدا و بزاڤ بھێنەکرن ب ساخی بھێنە رزگارکرن”.
ناڤھاتی خویا کر کو تیرۆرستێن داعش ل دەمێ رەڤینێ د رێیا بەعاج را رەڤاندیێن ئێزدی دگەل خوە دبەنە باژێرێ رەقە و گۆت: ” داخوازێ دکەین رێیا رەقە بھێتە کونترۆلکرن داکو مەترسی ل سەر ژیانا رەڤاندیێن ئێزدی زێدەتر دروست نەبیت و بمیننە د ناڤ مووسلێ دا، چونکی ل دووڤ پیزانینان پتریا رەڤاندیان دساخن و ل مووسلێ نە”.
ناڤبری ئاماژە دا وێ چەندێ کو ب پشتەڤانیا راستەوخوە یا سەرۆکێ حوکمەتا ھەرێما کوردستانێ نێچیرڤان بارزانی ھەتا نوکە زێدەتری 2700 رەڤاندیێن ئێزدیان یێن ھاتینە رزگارکرن و ھێشتا زێدەتری 3600 رەڤاندیان ژی ماینە د دەستێن تیرۆرستێن داعش دا.
