ره‌یان عه‌بدولقه‌هار: ژناڤچوونا زمانێ كوردێ ل قوتابخانێت ئه‌هلی زێده‌بوویه
هه‌ولێر، سۆلین سلێمان:
ره‌یان عه‌بدولقه‌هار مامۆستایا زمانێ ئینگلیزی تایبه‌ت بۆ رۆژناما ئه‌ڤرۆ ڕاگه‌هاند، یا ئه‌م دبینین ژناڤچوونا زمانێ ده‌یكێ ل قوتابخانێن ه‌ئهلی به‌ر ب زێده‌بوونێ ڤه دچیتن.
مامۆستا ره‌یان سلێمان گۆت: مان وه‌كی پێناسا جڤاكییه و ئامرازه‌كێ گه‌هاندنێیه دناڤبه‌را مرۆڤاندا، هه‌روه‌سا دیاركر، ئێك ژ ئه‌گه‌رێن ژناڤچوونا زمانێ كوردی ل قوتابخانێت ئه‌هلی ئه‌وه كو ئه‌م هه‌مبه‌ری كلتوور وزمانێ خوه كێم و لاواز دبینین، و ب شاشی سیسته‌مێ په‌روه‌ردا وه‌لاتێن پێشكه‌فتی چاڤلێكرنێ دكه‌ین، ئه‌ڤ جوره ئه‌گه‌ره زۆر د زێده‌بوونێ دایه بۆ نموونه، كه‌سه‌ێن ده‌وله‌مه‌ند زارۆیێ خوه ب كوژمه‌كێ زۆر یێ پاره‌ی ل قوتابخانه‌كا ئه‌هلی دانن به‌ر خواندنێ و ب شانازی ڤێ چه‌ندێ دبینن، كو زارۆریێ وی ب زمانه‌كێ بیانێ فێردبیت و دخوینیتن.
مامۆستایا زمانێ ئێنگلیزی دیسان خوه‌یاكر، ئه‌گه‌ره‌كێ دیتر یێ ژناڤچوونا زمانێ كوردێ خێزانه، كو وه‌سا هزر دكه‌ن هه‌كه زاڕۆیێن وانا ب زمانه‌كێ دیتر باخفیت دێ شێت بسناهی كاره‌كێ بده‌ستخوه‌ڤه ئینیتن، ئانكو زمانێ كوردی بزانیت یان نه‌زانیت چو ئاریشه نابیت، ئه‌ڤ چه‌نده ژی مه‌ترسیه ل سه‌ر زمان و كلتورێ مه، چونكی دێ بیته ئه‌گه‌رێ دروستبوونا به‌ربابه‌كی دبیت چو زانیاری ل سه‌ر كلتور و دیرۆكا خوه نه‌بیتن، هه‌روه‌سا تێكه‌لبوونا وی ل گه‌ل جڤاكێ دێ به‌ر ب كێمبوونێ ڤه چیت.
ژئالیه‌كێ دیتر ڤه ره‌یان خانێ ئاشكراكر وگۆت: ئه‌گه‌ره‌كێ دیتر قوتابخانه‌یێن ئه‌هلی نه، كو د ناڤبه‌را وانا بخوه‌دا هه‌ڤڕكی و پێشبڕكی یه كا كی دێ پتر شێت زمانێ بیانێ باشتر و ب هێزتر قوتابی و شاگردێن خوه پتر فێركه‌ت، كو به‌رۆڤاژی زمانێ كوردێ دهێته پشتگۆه هاڤێتن.
ل دووماهیێ بۆ چاره‌كرنا ڤێ ئاریشێ ره‌یان سلێمان دبێژیتن، بۆ چاره‌سه‌ریا ڤێ چه‌ندێ دڤێت وه‌زاره‌تا په‌روه‌ردێ هه‌ڤسه‌نگییه‌كێ دناڤبه‌را قوتابخانێن ئه‌هه‌لی و حكومی دا په‌یدا بكه‌ت، یان هه‌ر چو نه‌بیتن رێكخستنه‌ك هه‌بیت،چونكی وه‌زاره‌تا ناڤبری بتنێ ئه‌و ده‌ستهه‌لات هه‌یه، یان ژی قانوونه‌ك بۆ ڤێ چه‌ندێ بهێته دانان، یان ژی خوانا ب زمانێ ئینگلیزی ل پۆلێن سه‌ره‌تایی ل قۆناغێن (1،2،3) بهێنه پاشئێخستن، بۆ قۆناغێن سه‌رداتر.
