روسیا: ئدلب دێ ژ تیرۆرستان هێته پاقژ كرن
ب، سه‌رجان مه‌حمود:
روسیا راگه‌هاند كو ئۆپه‌راسیۆنا ل ئدلبێ دێ به‌رده‌وام كه‌ت و مافێ سووریێ یه ئاخا خوه ژ تیرۆرستان پاقژ كه‌ت و به‌ری نها توركیا هاتیه ئاگه‌هدار كرن كو كۆمێن چه‌كدارێن گرێدایی خوه ژ ئدلبێ ڤه‌كێشیت.
دیمیتری پیسكۆڤ په‌یڤدارێ كوچكا سه‌رۆك كۆماریا روسیا سه‌باره‌ت ب ره‌وشا دووماهیێ ل سووریێ راگه‌هاند كو روسیا ب هه‌موو هێزا خوه بۆ دیتنا چاره‌سه‌ریه‌كا گونجایی ل سووریێ كار دكه‌ت و گۆت: (نها سه‌رۆك كۆمارێ توركیا مه ب بنپێكرنا په‌یمانێن سۆچی و ئاستانا تۆمه‌تبار دكه‌ت لێ د راستی دا مه هه‌موو بنه‌مایێن په‌یمانێن سۆچی و ئاستانا بجه كرینه و ئه‌ڤرۆ ده‌مێ پاقژكرنا ئدلبێ ژ تیرۆرستان هاتیه و مافێ سووریێ یه ئۆپه‌راسیۆنا رزگاركرنێ ل ئدلبێ برێڤه ببه‌ت و مه به‌ری ده‌ستپێكرنا ئۆپه‌راسیۆنێ ژی ده‌وله‌تا توركیا ئاگاهدار كریه و پێدڤیه توركیا كۆمێن چه‌كدارێن نێزیكی خوه ژ ئدلبێ ڤه‌كێشیت).
ناڤهاتی راگه‌هاند ژی كو كۆمێن چه‌كدارێن ل ئدلبێ ئاگربه‌ستێ بنپێ دكه‌ن و به‌رده‌وام هێرشی هێزێن سووریێ و بنگه‌هێ وان یێ سه‌ربازی ل گه‌له‌ك ده‌ڤه‌ران دكه‌ن و گۆت: (چه‌كدارێن تیرۆرست ل ئدلبێ مه‌ترسیێ ل سه‌ر هه‌موو سووریێ دروست دكه‌ن و بۆ ڤێ چه‌ندێ ژی ده‌مێ پاقژكرنا وان ژ سووریێ هاتیه و بێگومان دێ ئۆپه‌راسیۆن هه‌تا ژناڤبرنا هه‌موو تیرۆرستان یا به‌رده‌وام بیت و ره‌خنێن توركیا د ڤێ مژارێ دا راست نینن، چونكو ئاشكرایه ئالیێن كو ئاگربه‌ستێ بنپێ دكه‌ن كۆمێن چه‌كدار یێن ل ئیدلبێ نه و وه‌ك مافێ خوه یێ ره‌وا سووریێ ژی ئۆپه‌اسیۆنا رزگاركرنا ئدلبێ ده‌ستپێكریه و ئه‌م ژی پشته‌ڤانیێ ل هێزێن سووریێ دكه‌ین).
ل دووڤ نووچه‌یێن هه‌رێمی و جیهانی ده‌وله‌تا توركیا كۆمێن چه‌كدار ژ ئدلبێ ده‌ردخینیت و به‌ر ب لیبیا ڤه دبه‌ت و هه‌تا نها توركیا ب گه‌می و فرۆكێن نه‌فه‌ر هه‌لگر نێزیكی چار هزار چه‌كدار ژ ئدلبێ و ده‌ڤه‌رێن كو د بن كۆنترۆلا وێ دانه بریه لیبیا و ئه‌و یه‌ك ژ ئالیێ فره‌نسا، یونان، مسر و ئیسرائیلێ ڤه ب به‌لگه هاتیه سه‌لماندن و هژماره‌كا زێده ژ چه‌كدارێن توركیا ژ لیبیا به‌ر ب ئیتالیا ره‌ڤینه و ده‌وله‌تا ئیتالیا ژی بۆ گرتنا وان كه‌سان ئۆپه‌راسیۆنه‌كا به‌رفره‌ه ده‌ستپێكریه.
