روشنبیریا ئێكدو شكاندنێ!!

بزاڤا رزگاریخوازا كوردی ل سالێن شێستان دا تووشی ده‌رزه‌كا مه‌زن بوو و ناف مالا كوردی ب تمامی دابه‌شی دوو به‌ره‌یان بوو و ل وی ده‌می تا ئه‌ڤرۆ روشنبیریه‌ك په‌یدابوویه‌ كو راسته‌وخو و نه‌ راسته‌وخو ب چه‌ندین دروشم و ئاخفتنا و ب رێیا هه‌می جورێن راگه‌هاندنێ لایه‌نێن كوردی بزاڤا ئێك دوو شكاندنێ دكه‌ن تا گه‌هشتیه‌ وی راده‌یی دوژمنێن دوزا كوردی ب سه‌ناهی ئه‌جیندێن خو ب لایه‌نێن كوردی بده‌نه‌ جێبه‌جێكرن و ناهێلێن ب چ ره‌نگا ئه‌ف لایه‌نه‌ نێزیكی هه‌ڤ ببن و ببنه‌ پالده‌ر و پشته‌ڤان بو چاره‌كرنا كێشا كوردی !!
هه‌ر ئه‌ڤ ره‌وشه‌نبیریه‌ بو كو لایه‌نێن كوردی ئێك و دوو قه‌بیل نه‌كه‌ن و توشی شه‌رێ برا كوژیێ بوون و بازرگانیێ ب مێژویا ئێك و دوو بكه‌ن و هه‌ر لایه‌نه‌ك لایه‌نێ دی ب خائین بده‌ته‌ نیاسین و مێژویا پری شوره‌ش و قوربانیدان ره‌شكه‌ن و ئه‌ڤ چه‌نده‌ بو ئه‌گه‌ر كو چه‌ندین سال ژ كیستێ دوزا كوردی برن و چه‌ندین كێشێن مه‌زن و توند په‌یداكرن كو تا نوكه‌ ئه‌ف لایه‌نه‌ نه‌شیاینه‌ خو ژێ قورتال بكه‌ن ئه‌ڤه‌ ژبلی شه‌هیدبونا رێژه‌كا زورا گه‌نجا دڤان شه‌ران دا ئه‌ڤه‌ زێده‌باری چول بونا گوندان و هه‌لوه‌شیانا ژێرخانا ئابوری ب هه‌می ره‌نگان!!
ئه‌ڤێ ره‌وشه‌نبیریێ ئانكو ره‌وشه‌نبیریا ئێكدو شكاندنێ هه‌رێما كوردستانێ دابه‌شی دوو ئیدارا و دوو زونا كر و تا ئه‌ڤرۆ نه‌ حكومه‌ت و نه‌ په‌رله‌مان و نه‌ حزب و لایه‌نێن كوردی نه‌شیاینه‌ به‌ربه‌ستا ڤان دوو ئیدارا راكه‌ن و بكه‌نه‌ ئێك! و قولیا ڤێ كێشێ دیار بوو پشتی چه‌ند حزب و لایه‌نێن كوردی كێشا سه‌روكاتیا هه‌رێمێ خولقاندی و كریه‌ قه‌یران و خه‌لكێ كوردستانێ توشی نه‌رحه‌تیه‌كا مه‌زن كر و ژوان سۆزا لێ ڤه‌بون ئه‌وێن داینه‌ سه‌روكێ هه‌رێمێ كو ژوره‌كا عه‌ملیاتا پێك ئینا بوو ژ بو خو حازركرن بو سه‌ربه‌خویا كوردستانێ و ڤێ ژورێ چه‌ندین ده‌ستهه‌لات پێهاتبونه‌ دان ژ وان دیاركرنا سیسته‌مێ حوكمرانیێ ل كوردستانێ!!
به‌لێ مخابن دیسا ژ به‌ر ڤێ ره‌وشه‌نبیریا سه‌قه‌ت و خراب لایه‌نن كوردی چوینه‌ د سه‌نگه‌رێن راگه‌هاندنێ دا دژی ئێك و دوو و بووینه‌ دار ده‌ستێن ئه‌جیندێن ده‌ره‌كی و نوكه‌ كێشا دوو ئیداره‌یێ قولتر لێكریه‌ و تشتێ سرنج راكێش ئه‌وه‌ هه‌می حزب بناڤێ خه‌لكی و ملله‌تی د ئاخڤن و ئه‌و بخو ده‌لیڤێ ناده‌نه‌ ڤی ملله‌تی ئه‌و بریارێ بده‌ت و چاره‌نڤیسێ خو دیاركه‌ت!!
روژ بو روژێ كێشێن ڤان لایه‌نێن سیاسی قولتر لێدهێن و گه‌هشتیه‌ رادێن مه‌ترسیدار ژ ئه‌گه‌رێ ڤێ ره‌وشه‌نبیریا خه‌له‌ت كو چ سنور نه‌هێلان و ئه‌ف قه‌یرانه‌ هه‌می پێخه‌مه‌ت ده‌ستڤه‌ ئینانا چه‌ند به‌رژه‌وه‌ندیا! ئه‌ڤه‌ ل ده‌مه‌كیه‌ كو خه‌لكێ كوردستانێ چاڤه‌رێی خزمه‌تگوزاریا و چاكسازیا بو ژ ڤان لایه‌نا و چاڤه‌رێی وێ چه‌ندێ بوو كو كێشا مووچا و بێ پاره‌ییێ چاره‌كه‌ن و ئه‌ف لایه‌نه‌ ببنه‌ پشته‌ڤانێن ئێك بو دوویر ئێخستنا مه‌ترسیا داعش سه‌ر هه‌رێمێ! به‌لێ مخابن هنده‌ك لایه‌نا ئه‌ڤ چه‌نده‌ هه‌می ژبیركرن و بتنێ ل ده‌لیڤێ دگه‌ریان كه‌رب و كینا خو و دوژمنكاریا خو دژی لایه‌نێ به‌رامبه‌ر ده‌رئێخن و هوسا هزركر كو ئه‌گه‌ر ئه‌ف كریارا وان سه‌رگرت دێ ئه‌ف لایه‌نه‌ ب ساناهی خو راده‌ستی وان كه‌ت و خه‌لك هوسا ب سه‌ناهی دێ ب ڤان لایه‌ن و كه‌سا رازیبن!! ئه‌و بو پشتی ئه‌ف قه‌یرانه‌ خولقاندی نوكه‌ ب هه‌می ره‌نگا دهێن نزانن ژ ناف ده‌ركه‌ڤن و سه‌ره‌رایی وان هه‌می قه‌یرانا ئه‌ڤێت هه‌ین قه‌یرانه‌كا دی ژی خولقاند!!
ترسا ڤان لایه‌نا هه‌میا ئه‌وه‌ پشتی ئه‌ف قه‌یرانه‌ خولقاندی ژ خه‌لكی و جادا كوردی دترسن و دبینی خو دكه‌نه‌ خودانێن خه‌لكی و پێش هه‌میاڤه‌ د ئاخڤن و چونكی ڤێ ره‌وشه‌نبیریا خراب یا ئه‌ف لایه‌نه‌ په‌یره‌و دكه‌ن به‌رامبه‌ر ئێك و دوو و ئه‌و دروشم و به‌لێنێن داینه‌ خه‌لكی هه‌می راست نه‌ ده‌ركه‌تن له‌ورا هه‌می ترسا وان ئه‌وه‌ خه‌لك ئه‌گه‌ر نوكه‌ چ هه‌لویستا دژی وان وه‌رنه‌گریت ژ به‌ر شه‌رێ داعش و ڤان قه‌یرانا د هه‌لبژارتنا تولا خو ژ ڤان لایه‌نا ڤه‌كه‌ت و توشی شكه‌ستنێن مه‌زن كه‌ت!!
له‌ورا نوكه‌ هنده‌ك لایه‌ن ژ هه‌لبژارتنێن پێشوه‌خت دترسن و ده‌رئه‌نجامێن وێ و یێ هه‌می بزاڤا دكه‌ن ب زیترین ده‌م بگه‌هنه‌ رێكه‌فتنه‌كێ داكو بشێن ب وێ رێكه‌فتنێ جه‌ماوه‌رێ خو یێ مایی رازیكه‌ن و ل هه‌بژارتنێن داهاتی پشتا خو نه‌ده‌نه‌ وان !! به‌لێ زورا فه‌ره‌ خه‌لك ئێدی ب هشیاری و به‌رپسیارنه‌ ره‌فتارێ بكه‌ن و ئێدی ب چ ره‌نگا ده‌لیڤێ نه‌ده‌ته‌ چ لایه‌نا یاریا ب چاره‌نڤیسێ وی بكه‌ت و ئه‌و بخو ب رێیا ده‌نگێ خو رێیا پاشه‌روژا خو دارێژیت و ئێدی ئه‌و ببیته‌ خودانێ بریارێ نه‌ چ حزب و لایه‌ن!!

کۆمێنتا تە