رووباره‌كێ خورت ب عه‌شقێ ڤه هشك دبیت
رووباره‌ك خورت.. كه‌تبوو داڤێن ئه‌ڤینیا سوولاڤه‌كێ
هه‌ر رۆژ سپێدێ، د گه‌ل ئه‌لندێ
خورتیا خوه دكره زڤرۆك ژبۆ دیتنێ و سلاڤه‌كێ
هه‌كو رووبار.. د هه‌مبێزا سوولاڤێ دا د غه‌رقی
چقێن خوه شۆر دكرنه هنداڤ سیتاڤه‌كێ
ئه‌ڤێ چیرۆكێ دۆمكر و بێهن ژێ چوو
كه‌ڤزا رووباری جه‌ده‌ل كر.. كی ره‌سه‌نه؟!
ئاڤا مه‌ندبوویا پشت كه‌ڤران یان پێلێن خورت؟!
خه‌ما كوركبووی ل ناڤ چاڤێن بووینه سه‌یوان
یان بڕیارێن سه‌رپێیی و سرت؟!
ژ جه‌ده‌لێ جه‌ده‌له‌كا كوورتر دبوو، جه‌ده‌له‌ك نوو
كو ڤه‌گریت هه‌موو بیاڤ و بابه‌تێن پاناڤه‌كێ
موتوه‌كه‌لی گوپالێ خوه وه‌شانده سه‌ر هنداڤه‌كێ و
ڤه‌مراندن گوڕی و په‌لێن بزاڤه‌كێ
خه‌ونا مه‌ئموونی عه‌قل بوو
عه‌قل ل ئاقاری چرایه و ل سه‌ر مێزان
كه‌نگرپه‌ڕا ده‌ستێ بایه
بای.. هه‌موو خه‌ونێن مۆرفیۆسی مشتانه‌كرن
هه‌موو داكه‌فتنێن مت و ب ترسی به‌هانه‌كرن
ئێدی نه‌ما.. خه‌ون ئیلهاما شعرێ بیت
یان كراسێ ستاتیكیێ، بكه‌ته به‌ر پێلاڤه‌كێ
چیرۆكبێژی ده‌نگێ خوه دانا به‌ر پێلا و
ركۆیی یا بێ رامانا كه‌لبووی هێلا
دا بیاڤی بده‌ته رووبارێ عاشق و
ئه‌وێ سوولاڤا عاشقتر
كو بێوار كه‌ت مه‌كربازیا شێلاڤه‌كێ
یان بێبار كه‌ت ئه‌وان خه‌ونێن خه‌وخاندی
ژ به‌ر بێهنا گولاڤه‌كێ
گولاڤ.. مامكه‌كا كه‌ڤن و ڤه‌ده‌ر بوو
د خه‌ونێ دا پرسیاره‌كا بێ مه‌هده‌ر بوو
ره‌ڤۆكه‌كا ترسینۆك و بێ مه‌فه‌ر بوو!
ئه‌و ب خوه د خوه‌دا، فێله‌كا كه‌ڤنا رۆمیان
هه‌ر چه‌ند سالان، جاره‌كێ ل خه‌ونا دره‌شینن
ئه‌ڤجاره ژی، كره هیزار بۆ سه‌ر روویێ خوناڤه‌كێ
رووباره‌كێ خورت و عاشق، پێ كه‌ركه‌ر بوو..!
*
میهه‌كێ خوه ژ كه‌ریێ په‌زی ڤه‌ده‌ر كر
گوهداری یا خوه یا ئه‌زه‌ل، پێ دووكه‌ر كر
ئاقار.. پاناڤه‌كێ دیتن دڕه
جاندار ژێ دكه‌ڤنه گومانێ
ئازادی هه‌لوێسته، مرۆڤ پێ دچیته مه‌یدانێ
هه‌می دیتن د گه‌ل هندێ بوون
كو خۆشیه‌ك مسۆگه‌ر كر
گیایێ كه‌سك.. ده‌رفه‌ته‌كه بێ دوباره
شه‌ڤێ دادا و دو چاڤێن زیق
وه‌كو په‌لان دبرسقین ژبۆ ئاهه‌نگا سه‌ربه‌ردانێ
میهه‌ك ب تنێ، غروورا گورگی تێر ناكه‌ت
قازی- به‌زاندن لڤینه‌ك كوفیخواره
شڤانێ ماندی و ته‌نگه‌زار
ل مزگه‌فتێ لاڤا دكه‌ت و سوجدێ دبه‌ت
مه‌لای دگۆت: خودێ ل ئاسمانی ئارامه و
هه‌ر كه‌سه‌كی ل دووڤ ئنیه‌تا وی دده‌تێ
هه‌ر كوتانا بێ شه‌نگسته، په‌رجانێن وێ خلۆله‌نه
ل به‌رێ سپێدێ، زكێ په‌زی دڕاندی بوو
ئوو شڤانێن نڤستی ب ئنیه‌تا خێرێ،
ل به‌هه‌شتێ فه‌لیته‌نه..!
*
