روودانێن كوشتنێ كێم بوینه به‌لێ خوه كوشتن زێده بویه
نه‌وزاد هلۆری:
روودانێن خوه كوشتن و كوشتنێ و خوه سوتنێ ل هه‌رێما كوردستانێ ب گشتی و ل سنورێ پارێزگه‌ها دهۆكێ د زێده‌بوونێ دایه، ئه‌ڤه بویه ئه‌گه‌ر كو كارتێكرنێن نه‌رێنی ل سه‌ر دل و ده‌روونێ وه‌لاتیان په‌یدا بیت، ئه‌ندامه‌كا په‌رله‌مانێ كوردستانێ ژی دیار كر كو پێدڤیه جهێن شوله‌ژێ ب رژدی كار ل سه‌ر ڤان روودانان بكه‌ن.
گولستان نهێلی، ئه‌نداما په‌رله‌مانێ كوردستانێ دیار كر كو روودانێن خوه كوشتن و كوشتنێ و سوتنێ ل هه‌رێما كوردستانێ ب ره‌نگه‌كێ گشتی د زێده‌بوونێ دانه ب تایبه‌تی خوه كوشتن، بۆ نموونه هه‌كه ئه‌م بتنێ روودانێن چاار هه‌یڤێن ده‌ستپێكێ یێن سالا بوری و ئه‌ڤ ساله هه‌ڤبه‌ر بكه‌ین دێ بینین كو خوه كوشتن زور زێده بویه و گۆت: ل چاار هه‌یڤێن ده‌ستپێكێ یێن سالا 2020ێ ل هه‌رێما كوردستانێ هه‌شت كه‌س هاتینه كوشتن، 16 كه‌سان خوه كوشتیه و 20 كه‌سان ژی خوه سوتیه و دو هزار و 548 سكالا هاتینه تومار كرن، به‌لێ د چار هه‌یڤێن ئه‌ڤ ساله دا پێنج كه‌س هاتینه كوشتن و 26 كه‌سان خوه كوشتیه و 24 كه‌سان ژی خوه سوتیه و سێ هزار و 91 سكالا هاتینه تومار كرن، ئه‌ڤ یه‌ك ژی رامانه كو كوشتن كێم بویه و خوه كوشتن زێده بویه و خوه سوتن ژی كێم بویه، به‌لێ رێژا سكالایان د زێده‌بوونێ دایه.
گولستانێ زێده‌تر گۆت: سالا 2019ێ هزار و حه‌فت كه‌یسێن جودا ل پشكا سه‌نته‌رێ راوێژكاریا خێزانی ل رێڤه‌به‌ریا گشتیا توندوتیژیا دژی ئافره‌تان و خێزانێ هاتینه تومار كرن، به‌لێ ل سالا 2020ێ رێژا كه‌یسان بۆ سێ به‌رامبه‌ر زێده بویه كو ئه‌و ژی سێ هزار و 579 كه‌یس بوون.
نهێلیێ دیار كر ژی كو ژبلی روودانێن خوه كوشتن و كوشتن و سوتنێ، هه‌ڤده‌م رێژا جودابوونا ژن و مێران ژی سال بۆ سالێ زێده‌تر دبیت و گۆتژی: ل سالا 2015 ل هه‌رێما كوردستانێ هه‌شت هزار و 105 حاله‌تێن جودابوونا ژن و مێرا هاتینه تومار كرن، به‌لێ ل سالا 2016 و سالا 2017ێ هژمار بۆ شه‌ش هزار و 712 حاله‌ت، و پێنج هزار و 79 حاله‌ت كێم بوو، به‌لێ جاره‌كا دی ل سالێن 2018 بۆ نه‌هـ هزار و 192 حاله‌تان بلند بو و ل سالا 2019 رێژه ب ره‌نگه‌كێ زور جودا بلندتر بو و گه‌هشته 11 هزار و 644 حاله‌تان، ل سالا 2020ێ ژی چار هزار و 564 حاله‌تێن جودابوونا ژن و مێرا هاتینه تومار كرن،
ئه‌نداما په‌رله‌مانێ كوردستانێ گوتژی: هه‌كه ئه‌م به‌رێ خوه بده‌ینه ئامارێن ماره‌برینێ دێ بینین كو ئه‌و ژی ل گوره‌ی سال بلند و نزم دبیت، ل سالا 2015 ل هه‌رێما كوردستانێ 29 هزار و 602 ماره‌برین هاتینه تومار كرن و ل سالا 2016ێ ژی 21 هزار و 183 ماره برین و ل سالا 2017ێ 37 هزار و 507 ماره‌برین هاتینه تومار كرن، دیسان ل سالا 2018ێ 39 هزار و 763 ماره برین و ل سالا 2019ێ 45 هزار و 51 ماره‌برین هاتینه تومار كرن، ل سالا 2020ێ ژی 28 هزار و 548 ماره برین هه‌بوون.
نهێلی ل بارا وه‌رگرتنا ئافره‌تێن ئاریشه‌دار ل جهێن ڤه‌حه‌واندنێ ژی گۆت: ل سالا 2016ێ ل هه‌رێما كوردستانێ 647 ئافره‌ت هاتینه ڤه‌حه‌واندن، ل سالا 2017ێ بۆ 802 ئافره‌تان بلند بوو، ل سالا 2018ێ بلندتر بوو كو ئه‌و ژی بویه 875 ئافره‌ت، دیسان ل سالا 2019ێ رێژه زۆر زێده بو و گه‌هشته هزار و 62 ئافره‌تان، به‌لێ سالا 2020ێ بۆ 661 ئافره‌تان كێم بوو.
