روودانێن ل سووریێ نیشانا لاوازبوونا پێگەهێ ئیرانێ یە
بسپۆرەکێ کاروبارێن رۆژهەلاتا ناڤین دیار دکەت، یا نها ل سووریێ روو ددەت نیشا ددەت ئێدی کاریگەریا ئیرانێ پشتی لوبنانێ و غەزە ل سووریێ ژی گەلەک لاواز بوویە و هەکە رژێما بەشاری ژناڤ بچیت ئەو یەک دێ کاریگەریا خوە ل هەموو رۆژهەلاتا ناڤین کەت.
د رۆژا خوه یا شه‌شێ دا ئێرشێن دەستەیا تەحریر شام و کۆمێن چه‌کدارێن سه‌ر ب تورکیا ل دژی رژیما ئه‌سەدی به‌رده‌وام دکه‌ت و شه‌ر گەهشتیه به‌ر ده‌رگەهێ باژێرێ دیمه‌شق یێ پایته‌تێ سووریێ. هه‌روه‌سا د ره‌وشا نها دا ئدلب، ناڤه‌ندا باژێرێ حه‌ما و ژ بلی تاخێن کوردی باژیرێ حەلەبێ ب ته‌مامی کەفتیە ژێر کۆنترۆلا کۆمێن چه‌کدار. دیسان هێزێن کوردی ژ تل رفعەت هه‌تا تاخێن ئه‌شره‌فیه، شێخ مه‌قسود، سینه‌ئا و پێنج باژێرکێن سه‌ر ب حه‌له‌بێ کۆنترۆل کرینه و هه‌ول دده‌ن منبجێ ب ته‌ل رفعەتێ ڤە گرێ بده‌ن.
د ڤێ دەربارێ دا فه‌هیم تاشته‌کین بسپۆرێ کاروبارێن رۆژهەلاتا ناڤین راگەهاند وه‌سا دیاره کو ل پشت په‌ردەی هێزێن مه‌زن رێککەفتنەکا کری و رژێما ئه‌سەد بێی شه‌ڕ هێزێن خوه ژ ئدلبێ، حه‌له‌بێ و حه‌مایێ ڤه‌کێشا و گۆت: (پشتی شه‌ڕێ ل غەزە و لوبنانێ و شکه‌ستنا حزبوللا و حه‌ماسێ و کۆمێن سه‌ر ب ئیرانێ ل فه‌له‌ستینێ و لوبنانێ نها ژی ل مه‌یدانا سووریێ ده‌ستێ ئیرانێ لاوازتر بوویه. ل ئالیێ دی رۆسیا ژی ژ بلی فرۆکەیێن شه‌ڕی ل ئه‌ردێ هه‌ڤکاریێن پێدڤی نه‌دایه سووریێ و ل دیمه‌شقێ ژی وه‌سا دیاره ئالۆزیێن سیاسی کوور بووینه و ئه‌و هێزا رژێما سووریێ نه‌مایه بشێت خوە راگریت و ژ بەر ڤێ یەکێ ژی گرۆپێن چەکدار شیان د دەمەکێ کورت دا گەلەک دەڤەران کۆنترۆل بکەن).
تاشته‌کین هه‌روه‌سا دیار ژی کر، هزره‌ک دی ژی هه‌یه کو ئه‌و ژی ل ده‌رڤه‌ی سووریێ ل سه‌ر مێزا دانوستاندنان ره‌وشا سووریێ ژ نوو ڤه هاتبیتە دیزاین کرن و به‌شار ئه‌سەد ب نه‌چاری پلانێن زلهێزان قه‌بوول کربیت و گۆت: (چووینا ئه‌سەدی بۆ مۆسکۆ دیارە ل گۆر بەرنامەکێ بوویە و ئه‌و تشتێن ل سووریێ نها روو دده‌ن د چارچۆڤەیێ نه‌خشه‌کی دارێتی دایه. پلانه‌ک دهێته مه‌شاندن و هه‌که رۆسیا ب جددی ده‌ستێوەردانێ نه‌که‌ت رژێما ئه‌سەدی نه‌شێت دیمه‌شقێ ژی بپارێزیت. لێ گەلەک کەس وەسا ژی دبینن کو گەرەنتیا پاراستنا شامێ و چەندین باژێرێن دی بۆ ئەسەدی هاتیە دان).
سەبارەت ب ده‌ستپێکرنا شه‌ڕی د ناڤبه‌را تەحریر شام و کۆمێن چه‌کدارێن سه‌ر ب تورکیا ل گەل هێزێن کوردی ژی ناڤهاتی راگه‌هاند کو هه‌تا نها شه‌ڕەک جددی د ناڤبه‌را تەحریر شام و هێزێن کوردی دا روو نەدایە، لێ ل ده‌ڤه‌را باژێرێ ئه‌لباب کۆمێن چه‌کدارێن سه‌ر ب تورکیا بزاڤا ڤێ یەکێ دکەن ئێرشی باژێرێ منبجێ یێ د بن کۆنترۆلا هێزێن کوردی دا بکه‌ن، لێ هه‌تا نها ئالیێ کوردی ده‌ڤه‌رێن خوه پاراستینه و گۆت: (بێگومان هەکە گرۆپێن چەکدار ب فەرمانا تورکیا بخوازن ئێرشی هێزێن کوردی بکەن وی دەمی دێ رەوشەک نوو هێتە پێش، چونکی هێزێن سووریا دیموکرات هەڤپەیمانێ ئەمریکا نە و د شەڕێ ل دژی داعشێ دا ژی گەلەک قوربانی داینە و خوەدان ئەزموونەک مەزن یا شەڕی نە، ئانکۆ شەرێ ل گەل هێزێن سووریا دیموکرات وەکو شەڕێ ل گەل هێزێن بەشاری نینە و دێ زیانێن خوە یێن گەلەک مەزن بۆ تەحریر شام هەبیت).
ل ئالیێ دی عەباس عێراقچی وەزیرێ دەرڤە یێ ئیرانێ ژی دوهی راگەهاند کو دەستێ ئەمریکا و ئسرائیلێ د روودانێن نها ل سووریێ دا هەنە، هەر دو وەلاتان دڤێت رەوشا دەڤەرێ ئالۆز بکەن، لێ وەکو ئیران ئەو ب هەموو شیانێن خوە پشتەڤانیا بەشار ئەسەدی دکەن و گۆت: (ئەز دێ د زووترین دەم دا سەرەدانا شامێ کەم و دێ ل گەل ئەسەدی کۆمبم، مە وەکو ئیران نەڤێت رەوشا سووریێ و دەڤەرێ ئالۆز بیت، چونکی ئەو یەک د بەرژەوەندیا چو وەلاتەکێ دا نینە، تنێ ئەو هێز نەبن یێن دخوازن هەردەم رەوشا دەڤەرا مە یا ئالۆز بیت و دڤێت ئەم پێکڤە کار بکەین دا نەهێلین یا نها ل سووریێ روو ددەت مەزنتر لێ بهێت).
وەزیرێ دەرڤە یێ ئیرانێ ئەو یەک ژی دیار کر، بۆ مە چو جوداهی د ناڤبەرا ئسرائیلێ و وان گرۆپێن تیرۆرستی دا نینە یێن نها ل حەلەبێ دەست ب تاوانێن مەزن ل دژی وەلاتیێن سڤیل کرینە، ئەم دێ ب هەموو شیانێن خوە پشتەڤانیا سووریێ کەین و دێ کار کەین دا ئالۆزیێن ل حەلەبێ ب دووماهی بهێن و دڤێت هەر زوو رەوشا حەلەبێ و ئدلبێ وەکو بەرێ ئارام بیت و گۆت: (هندەک هێز دخوازن ب رێیا وان گرۆپێن تیرۆرستی رۆژهەلاتا ناڤین تووشی شەڕەکێ مەزن بکەن، دڤێت هەموو وەلاتێن رۆژهەلاتا ناڤین هەست ب پیلانا ئەمریکا و ئسرائیلێ بکەن و نەهێلن ئالۆزیێن نها مەزنتر لێ بهێن).
