رووسیا پێگەهێ خوە ل رۆژئاڤایێ کوردستانێ بهێز دکەت
بەرپرسەکێ رێڤەبەریا خوەسەر دیار دکەت، دەمەکە هێزێن رۆسیا ل قامشلۆ بنگەهێن نوو یێن سەربازی ئاڤا کرینە و هێزێن نوو و چەکێن گران ژی ل وان بنگەهان بجهـ کرینە و پشتی ژناڤچوونا رژێما بەشاری جارا ئێکێ یە رۆسیا کار بۆ بهێزکرنا پێگەهێ خوە ل رۆژئاڤایێ کوردستانێ دکەت.
بەرپرسەکێ رێڤەبەریا خوەسەر کو ناڤێ وی نەهاتیە ئاشکرا کرن بۆ ئاژانسا سپۆتینگ یا رۆسیا دیار کریە، پشتی ژناڤچوونا رژێما بەشاری دەمەک بوو رۆسیا چو بزاڤێن سەربازی ل باکورێ سووریێ نەبوون، لێ حەفتیەکە رۆسیا جارەکا دی فرۆکەخانەیا سەبازی یا قامشلۆ بکار دئینیت و چەند رۆژن ژی رۆسیا بنگەهێن خوە یێن سەربازی کو بەری نها چۆل کربوون جارەکا دی وان بنگەهان بکار دئینیت و چەکێن گران ژی ل وان بنگەهان بجهـ کریە و ئەو یەک ژی نیشا ددەت، رۆسیا دڤێت جارەکا دی ل سووریێ و رۆژئاڤایێ کوردستانێ پێگەهێ خوە بهێز بکەت.
هەمان بەرپرسی ئەو یەک ژی دیار کریە، نها پەیوەندیێن باش د ناڤبەرا هێزێن رۆسیا و هێزێن سووریا دیموکرات دا هەنە و رۆسیا پشتەڤانیێ ل مافێن کوردان ل سووریێ دکەت و رۆسیا پێ باشە کورد و شام پرسێن هەی د ناڤبەرا خوە دا چارەسەر بکەن، بهێزبوونا پێگەهێ رۆسیا ل رۆژئاڤایێ کوردستانێ دشێت ببیتە خالەکا گرنگ دا شام ژی نەچار بیت ل هەمبەر کوردان نەرم بیت.
سەبارەت ب لڤێن نوو یێن رۆسیا ل سووریێ بەرپرسەکێ وەزارەتا دەرڤە یا رۆسیا ژی دیار کریە، هێزێن رۆسیا ل لازقیە و هندەک دەڤەرێن دی یێن سووریێ ماینە و هەبوونا رۆسیا ل باکورێ سووریێ ژی گەلەک گرنگە، رۆسیا پشتەڤانیێ ل مافێن کوردان و هەموو پێکهاتەیێن دی یێن ل سووریێ دکەت و گرنگە شام ژی کار بۆ چارەسەرکرنا پرسێن هەی ل سووریێ بکەت، رۆسیا دڤێت کورد و هەموو پێکهاتەیێن دی د چارچۆڤەیێ سووریایەک نوو و دیموکراتی دا بگەهنە مافێن خوە و هەبوونا هێزێن رۆسیا یێن ل باکورێ سووریێ ژی ل دژی شامێ نینە، بەلکو رۆسیا دڤێت پەیوەندیێن خوە ل گەل دەستهەلاتا نوو یا شامێ ژی باش بکەت.
چاڤدێرێن سیاسی ژی دیار دکەن، رۆسیا ب چو رەنگەکێ دەست ژ سووریێ بەرنادەت، هەرچەندە رژێما بەشاری ژناڤچوو لێ هێزێن رۆسیا ل گەلەک دەڤەرێن ستراتیژی یێن سووریی مان و پشتی سەرەدانا وەزیرێ دەرڤە یێ سووریێ بۆ رۆسیا، نها رۆسیا دڤێت پێگەهێ خوە ل سووریێ و رۆژئاڤایێ کوردستانێ بهێز بکەت و رۆسیا باش دزانیت هەکە سووریێ ب تەمامی ژ دەست بدەت دێ پێگەهێ وێ ل رۆژهەلاتا ناڤین گەلەک لاواز بیت، ژ بەر ڤێ یەکێ ژی نها رۆسیا دەست ب لڤینێن نوو ل سووریێ و رۆژئاڤایێ کوردستانێ کریە.
