روونشتن مرنێ زێدە دکەت
ئه‌ڤرۆ نيوز:
ڤەکولینەکا نوو کو ژلایێ کومەلا پەنجەشێرا ئەمریکی ھاتبوو ئەنجامدان دیارکر کو روونشتن ئێک ژ لایەنێن پەیداکرنا بێئارامیێ یە و کارتێکرنێ ل ساخلەمیێ دکەت، و ھەڤبەندی ب کۆمەکا نەخۆشیان ڤە ھەیە ژوانژی نەخوشیێن دلی و پەنجەشێرا قولونێ و پەنجەشێرا مەمکی، و نەخوشیا شەکرێ و پێتیبوونا ھەستیان و دودلی و خەموکی، ڤەکولەران زەنگا مەترسیێ لێدا و دەنگێن خوە بلندکرن و خواستن کو خەلک بۆ دەمێ درێژ ل سەر کورسیێن خوە روونشتی نەمینن، ژبەرکو روونشتنا زێدە دبیتە ئەگەرێ مرنێ.
ئەنجامێن ڤێ ڤەکولینێ پشتی ١٤ سالان ژ دووڤچۆنا ژمارەیەکا زور یا خەلکی دەرچوون و دیاربوو کو رێژا مرنێ ب ٣٧% زێدەدبیت ل دەڤ وان ژنێن کو رۆژانە شەش دەمژمێران یان پێھەلتر ب روونشتنێ ڤە د بورینن، بەراوەردی ل گەل وان ژنێن سێ دەمژمێران و کێمتر ب روونشتنێ ڤە دبوورینن، ھەروەسان ڤەکولینێ دیارکر کو رەنگە رێژا مرنێ ل دەڤ وان ژنان پتر بیت یێن دەمەکێ درێژتر د روونن و کێمتر وەرزشێ دکەن.
ھندەک ڤەکولینێن دیتر ژی ھەڤبەندیا روونشتنێ ب فشارا خوینێ و زێدەبوونا رێژا گلوکوزی و بلندبوونا روونێن سێیانی و زێدەبوونا کەمەرا مرۆڤی ڤە گرێددەن، ئەڤەژی پتر ل دەڤ وان ژنان پەیدادبیت یێن وەرزشێ ب شێوەیەکێ رێکخستی ئەنجام ددەن، بەلێ ل دەمەکێ درێژ روونشتی دمینن، ڤەکولەر ئەگەرێن ڤێ چەندێ بۆ سستبوونا زەڤلەکان ڤەدگەرینن و دیسان تێکچوونا زەڤلەکان ژی دبیتە ئەگەرێ زێدەمەزاختنا گلوکوزی و ئەوژی دبیتە ھاندەرێ دەرھاڤێتنا ئەنزایمەکی کو ب کریارا نونەراتیا خوارنێ بۆ روونێ، سێیانی رادبت و ل بەر ئەنجامێ ڤان ڤەکولینان پێدڤیە وەرزش ب شێوەیەکێ رێکخستی بھێتە ئەنجام دان و ل دەمێ روونشتنێ دەم بۆ دەمی جھێ مرۆڤی بھێتە گوھارتن و ب تایبەت ل دەمێ بینەریا تێلەفزیونێ یان کارکرن ل سەر کومپیوتەری.
