رویتەرز: ئیدارەیا ترەمپی هۆشداری دایە ئیراقێ
ئاژانسا رویتەرز بەلاڤكر: ئەمریكا هۆشداری دایە ئیراقێ كو ب زووترین دەم هنارتنا پەترۆلا هەرێما كوردستانێ بهێتە دەستپێكرن.
ئاژانسا رویتەرز دیاركر» ئیدارەیا سەرۆكێ ئەمریكی دۆنالد ترەمپ، فشارێ ل ئیراقێ دكەت بۆ وێ چەندێ ب زووترین دەم پەترۆلا هەرێما كوردستانێ ب هنێریت، ئەگەر نە دێ وەكو ئیرانێ تووشی سزایێن گران بیت».
ئاژانسا ناڤبری بەلاڤكر ژی» ئەمریكا دخوازیت ئیرانێ ژ ئابوورێ جیهانی دووربكەت و داهاتێ پەترۆلا وێ بۆ سفرێ بهێتە خوار، هەروەسا ترەمپ دخوازیت محەمەد شیاع سودانی، سەرۆك وەزیرێن ئیراقێ پەیوەندیێن ئابووری ل گەل ئیرانێ ببڕیت».
هەر ل دۆر فشارێن ئەمریكا ل سەر ئیراقێ بۆ هنارتنا پەترۆلا هەرێما كوردستانێ، بەرپرسەكێ كۆچكا سپی بۆ ئاژانسا رویتەرز گۆت» هنارتنا پەترۆلا هەرێما كوردستانێ نەكو تنێ بۆ ئاسایشا دەڤەرێ یا گرنگە، بەلكو دێ هاریكار ژی بیت بۆ داكەفتنا بهایێ پانزینێ».
دهێتە زانین نێزیكی دو سالایە هنارتنا پەترۆلا هەرێما كوردستانێ هاتیە راگرتن، هەتا نوكە نێزیكی 26 ملیار دۆلار زیان یێن گەهشتینە ئیراقێ و هەرێما كوردستانێ و بازارێ وزەیا جیهانی ژی یێ هەڤسەنگ نەبوو».
