رژێما بەشاری دو تاخێن کوردان ل حەلەبێ دۆرپێچ کرینە
بەرپرسەکێ کورد دیار دکەت، رژێما بەشاری دو تاخێن کوردان ل باژێرێ حەلەبێ دۆرپێچ کرینە و ژ بەر هندێ ژی ئەو نەشێن گازا سپی بۆ زڤستانێ بدەنە خەلکێن وان تاخان و هەروەسا خەلکێ هەر دو تاخان نەشێن ب ئازادانە کارێن خوە یێن رۆژانە برێڤە ببەن و ئەو یەک ژی ناهێنتە قەبوول کرن.
بەرپرسەکێ کورد ل رۆژئاڤایێ کوردستانێ ب ناڤێ عەلی رۆژهات دیار کریە، ژ بەر کو وەرزێ زڤستانێ نێزیک دبیت وان دڤێت گازا سپی ل سەر هەموو مالێن کوردان بەلاڤ بکەن، ژ بەر ڤێ یەکێ ژی وان چەند تانکەرێن گازا سپی رەوانەی هەر دو تاخێن کوردان ل باژێرێ حەلەبێ کرینە، لێ هێزێن رژێما سووریێ رێ نەداینە گازا سپی بگەهیتە دەستێ وەلاتیێن کورد یێن هەر دو تاخێن شێخ مەقسود و ئەشرەفیە، ئەو یەک ژی ب چو رەنگەکێ ناهێتە قەبوول کرن، چونکی وان دڤێت خزمەتا خەلکێ خوە بکەن و نابیت رژێما بەشاری ئاستەنگیان ل هەمبەر کارێن خزمەتگوزاریان بۆ وەلاتیێن کورد دروست بکەت.
ناڤهاتی ئەو یەک ژی دیار کریە، دەمەکە هەر دو تاخێن کوردان ل باژێرێ حەلەبێ ژ ئالیێ هێزێن رژێما بەشاری ڤە هاتینە دۆرپێچکرن و خەلک نەشێت کاروبارێن خوە یێن رۆژانە برێڤە ببەن و ئاستەنگی ل هەمبەر کارێن وان یێن رۆژانە دهێنە دروست کرن، ژ بۆ ڤێ یەکێ ژی وان داخواز ژ رێڤەبەریا خوەسەر کرینە ل گەل بەرپرسێن شامێ سەبارەت ب ڤی بابەتی دانوستاندنان بکەن دا ئاستەنگیێن هەی نەمینن، لێ هەتا نها ژی ئەو نەشێن خزمەتا کوردان ل هەر دو تاخان بکەن.
هەژی ئاماژەپێدانێ یە، کو بەری نها ژی چەندین جاران هەر دو تاخێن کوردان ژ ئالیێ هێزێن رژێما بەشاری ڤە هاتینە دۆرپێچکرن و رەوشا وەلاتیێن کورد ل هەر دو تاخێن شێخ مەقسود و ئەشرەفیە باش نینە، ئاستەنگی ل هەمبەر هاتنوچوونا وان دهێنە دروستکرن، ئەو نەشێن ب رەنگەکێ ئاسایی ژیانا خوە یا رۆژانە دەرباز بکەن، ژ بەر ڤێ یەکێ ژی بەری نها وەلاتیێن کورد ل وان هەر دو تاخان داخواز ژ شامێ کربوون چو ئاستەنگیان ل هەمبەر ژیانا وان دروست نەکەن، لێ هەتا نها ژی ئەو دۆرپێچا هەی ل سەر هەر دو تاخان ب رەنگێن جودا جودا بەردەوام دکەت و هێزێن سەربازی یێن رژێما سووریێ ل هەر دو تاخان هەنە، گەلەک جاران ژی ب بەهانێن جودا جودا مالێن وەلاتیێن کورد دپشکینن و ئەو یەک ژی بوویە ئەگەر کوردێن ل هەر دو تاخان نەرازیبوونا خوە ل هەمبەر هەلوەستێ هێزێن سووریێ دیار بکەن.
بەری نها فەرماندارەکێ هێزێن سووریێ ژی دیار کربوو، ئەو ژ بۆ پاراستنا وەلاتیان ل هەر دو تاخان بجه بووینە، چونکی وان نەڤێت چو ئالۆزیێن نوو ل وان هەر دو تاخان روو بدەن.
