رژێما سووریێ يا بەرھەڤ نینە مافێ ئۆتۆنۆمیێ بدەتە کوردان
ئه‌ڤرۆ نيوز:
بەری نھا گەلەک دەزگەھێن راگەھاندنێ بەلاڤکرن کو دانوستاندن د ناڤبەرا رێڤەبەریا خوەسەر یا باکورێ سووریێ ل گەل رژێما شامێ بۆ چارەکرنا پرسا کوردی و ئاڤاکرنا ھەرێمەکا ئۆتۆنۆمی برێڤە دچن، لێ بەرپرسێن کوردی دبێژن ھەتا نھا ژی دانوستاندن د ئاستێ پێدڤی دا نینن و رژێما سووریێ بەرھەڤ نینە نۆتۆنۆمیێ بدەتە کوردان.
ئاژانسا سپۆتینگ یا روسی ھەفتیا بۆری ئاماژە ب ناڤبژیڤانیا روسیا بۆ دانوستاندنێن د ناڤبەرا رێڤەبەریا خوەسەر یا باکورێ سووریێ ل گەل رژێما بەشاری کربوو کو ئارمانج ژ ڤان دانوستاندنان ژی گەرەنتیکرنا مافێ کوردان د دستوورێ نوو یێ سووریێ یە، لێ بەرپرسەکێ کوردی ل باکورێ سووریێ راگەھاند کو ھەتا نھا دانوستاندن د ئاستێ پێدڤی دا نینن و رژێما سووریێ نھا بەرھەڤ نینە و نەشێت مافێ ئۆتۆنۆمیێ بدەتە کوردان.
خەلیل محەمەد چاڤدێرێ سیاسی یێ رۆژئاڤایێ کوردستانێ بۆ رۆژناما ئەڤرۆ دیارکر کو روسیا دخوازیت رژێما بەشاری د چارچۆڤێ ھەرێمەکا ئۆتۆنۆمی بۆ کوردان ل سووریێ بێی کو سووریە بھێتە پارچەکرن پرسا کوردی چارەسەر بکەت و ھندەک بزاڤ ژی د ڤێ دەربارێ دا ھاتینە کرن، ب تایبەتی ژی نھا کار بۆ ئامادەکرنا دستوورەکێ نوو ل سووریێ دھێتەکرن کو کورد ژی تێدا پشکدارن و گۆت: (لێ ئیران و تورکیا ئاستەنگیێن مەزن ل ھەمبەر مافێ کوردان دروست دکەن، تورکیا ب بەھانا مەترسیێن ل سەر ئاسایشا وەلاتێ خوە و ئیران ژی ژ ئاڤابوونا ھەرێمەکا کوردی ل سووریێ دترسن چونکو ئەو یەک دێ کاریگەریا خوە ل کوردێن وان ھەر دو وەلاتان ژی بکەت و ژ بەر ھندێ ژی ئەز دبێژم نھا رژێما سووریێ بەرھەڤ نینە و ھەتا نەشێت ژی مافێ ئۆتۆنۆمیێ بدەتە کوردان).
چاڤدێرێ سیاسی یێ رۆژئاڤایێ کوردستانێ ئەو یەک ژی دیارکر کو رژێما بەشاری نھا گەلەکێ لاوازە، ئیران کاریگەریەکا مەزن ل سووریێ یا ھەی و وەکو ھوون دزانن گەلەک دەڤەرێن سنۆری یێن د ناڤبەرا سووریێ و تورکیا کەفتینە د بن کۆنترۆلا تورکیا دا و ژ بەر ھندێ ژی رژێمەکا لاواز وەکو یا بەشاری نھا نەشێت بێی پشتەڤانیا روسیا، ئیران و ھەتا تورکیا د بابەتێ چارەکرنا پرسا کوردی و ھەرێمەکا ئۆتۆنۆمی دا ب تنێ پێنگاڤان ب ھاڤێژیت و ژ بەر ھندێ ژی ھەکە بزاڤەکا مەزن یا دبلۆماسی د ئاستێ نێڤدەولەتی دا بۆ پشتەڤانی کرنا مافێ کوردان ل سووریێ نەبیت ئەز دبێژم دێ گەلەکا ب زەحمەت بیت کو رژێما شامێ بشێت ب تنێ مافێ کوردان بدەتێ و گۆت: (بەری نھا ژی تورکیا و ئیرانێ گەلەک ئاستەنگی بۆ مافێ کوردان ل عیراقێ دروست کرن و دڤێت ژبیر نەکەین ھەکە تورکیا و ئیران نەبان دا کورد دەولەتا خوە ژی راگەھینن، چونکو عیراق لاواز بوو لێ تورکیا و ئیرانێ ب ھەڤپشکی نەھێلان کورد بگەھنە مافێن خوە، نھا ژی دخوازن ئاستەنگیان ل ھەمبەر مافێ کوردان ل سووریێ دروست بکەن).
ناڤبری ئەو یەک ژی دیارکر کو کورد ژی د ناڤا خوە دا پارچە پارچە بووینە و بێگومان پارچەبوونا کوردان ژی ئێکە ژ ڤان خالێن لاواز کو بوویە ئەگەرێ ھندێ دوژمنێن کوردان بزاڤێ بکەن نەھێلن کورد ل سووریێ بگەھنە مافێن خوە و گۆت: (لێ ئەو یەک ژی ئاشکرایە کو ھەتا کورد ل سووریێ نەگەھنە مافێن خوە رەوشا وی وەلاتی ئارام نابیت، روسیا و ئەمریکا ژی ڤێ راستیێ دزانن و ژ بەر ھندێ ھەکە بەرژەوەندیێن ھەر دو وەلاتێن زلھێز د ھندێ دا بیت کو پشتەڤانیێ ل ھەرێمەکا ئۆتۆنۆمی بۆ کوردان بکەن ئەز باوەرم دێ رەوشا کوردان ل رۆژئاڤایێ کوردستانێ و سووریێ ژی باشتر لێ ھێت).