رۆسـیا ژ هـەلـوەستێ کــوردێن رۆژئـاڤـایێ کـوردستانێ دلـگرانە
بسپۆرەکێ پەیوەندیێن نێڤدەولەتی دیار دکەت، رۆسیا بەری نها ژی گەلەک بزاڤ کرن دا کورد ئێکگرتی بن، لێ مخابن ئەو یەک دروست نەبوو و نها ژی رۆسیا نزانیت کا کوردان ل سووریێ چ دڤێت، چونکی کورد ئێكگرتی نینن و ئەو یەک ژی بۆ رۆسیا بوویە ئاریشەکا نوو، چونکی رۆسیا دڤێت کورد ل سووریێ بگەهنە هندەک مافێن خوە.
د. ئەکرەم ئۆنەن بسپۆرێ پەیوەندیێن نێڤدەولەتی راگەهاند، رۆسیا خوە ب خوەدانا سووریێ دزانیت و دڤێت پرسا سووریێ چارەسەر بکەت، لێ گەلەک ئاستەنگی هەنە، یا ئێکێ مانا هێزێن ئەمریکا ل سووریێ و رۆژئاڤایێ کوردستانێ ئاستەنگیەکا گەلەک مەزنە ل هەمبەر ستراتیژیا رۆسیا و خالا دی ژی رۆسیا دزانیت هەکە پرسا کوردی ل سووریێ نەهێتە چارەسەرکرن و کورد نەگەهنە هندەک مافێن خوە دێ ئالۆزیێن هەی ژی بەردەوام بن، ژ بەر هندێ ژی بەری نها رۆسیا گەلەک کۆمبوون ل گەل هێزێن کوردی کرن، لێ مخابن ژ بەر کو کورد د ناڤا خوە دا ئێکگرتی نەبوون، وەکو پێدڤی حساب ل سەر کوردان نەهاتە کرن و گۆت: (ل گۆر باوەریا من رۆسیا دڤێت کورد بگەهنە هندەک مافێن خوە، رەنگە رۆسیا نەڤێت کورد ل سووریێ بهێز کەڤن لێ رۆسیا نەڤێت کورد بێ ماف ژی بمینن، بەری نها چەندین جاران ل رۆسیا کۆمبوونێن جودا جودا د ناڤبەرا شاندێن کوردی و بەرپرسێن رۆسیا دا هاتنە کرن، گەلەک جاران وەزیرێ دەرڤە یێ رۆسیا ژی دیار کریە، ئاریشا سەرەکی ئەوە هەتا نها ئەو نزانن کا کوردان چ دڤێت، چونکی رێڤەبەریا خوەسەر بەحسێ سووریایەک دیموکرات دکەت، ئەو بەحسێ مافێن کوردان ناکەت، یا راست ل گۆر باوەریا من تشتی رۆسیا دڤێت بدەتە کوردان گەلەک زێدەتر ژ تشتێ کو رێڤەبەریا خوەسەر بۆ کوردان دڤێت).
بسپۆرێ پەیوەندیێن نێڤدەولەتی ئەو یەک ژی دیار کر، نها ناکۆکیێن گەلەک مەزن د ناڤبەرا رۆسیا و ئەمریکا دا ل سووریێ هەنە، ناکۆکی گەلەک زێدەتر لێ هاتینە، ڤێجا ژ بەر هندێ ژی بابەتێ چارەسەریا قەیرانا سووریێ گەلەک گیرو بوویە، رۆسیا دڤێت ل گۆر خوە چارەسەر بکەت و ئەمریکا ژی بەرژەوەندیێن جودا ل سووریێ هەنە و نەڤێت وەسا سووریێ جه بهێلیت، هەر یەک ژ ئیران و تورکیا ژی بێگومان ژ بۆ بەرژەوەندیێن خوە کار دکەن، تورکیا گەلەک پێ باشە نها ئەمریکا هێزێن خوە ژ سووریێ ڤەکێشیت، دا ئەو ئێرشی دەڤەرێن ل ژێر کۆنترۆلا هێزێن سووریا دیموکرات دا بکەت، لێ د رەوشا نها دا ئەمریکا ژی ژ بۆ بەرژەوەندیێن خوە یێن ل سووریێ بەرهەڤ نینە هێزێن خوە ژ وی وەلاتی ڤەکێشیت و گۆت: ( ب کورتی رەوشا سووریێ گەلەک ئالۆز بوویە و هەر ئالیەکێ ژی دڤێت رەوشا هەی بۆ بەرژەوەندیێن خوە بکار بینیت، ژ بەر هندێ ژی د رەوشا نها دا چارەسەرکرنا پرسا سووریێ و ب تایبەتی ژی پرسا کوردی ساناهی نینە).
ناڤهاتی د دووماهیا ئاخڤتنا خوە دا ئەو یەک ژی دیار کر، هەکە کورد سیاسەتەکا راست ل گۆر رەوشا نها برێڤە نەبەن دێ پاشی تووشی زیانێن مەزن بن، راستە کوردان گەلەک دەلیڤە ل سووریێ ژ دەست داینە، لێ دیسان ژی نها دشێن ب سیاسەتەکا راست پێگەهێ خوە ل سووریێ بهێز بکەن، دڤێت کورد ب ناڤبژیڤانیا رۆسیا ل گەل شامێ دەست ب دانوستاندنان بکەن، چونکی چو رێیێن دی ل پێشبەری کوردان ل سووریێ نەماینە.
