رۆسیا: بێی کوردان چو دەمەکێ رەوشا سووریێ ئارام نابیت
ب، سه‌رجان مەحمود:
وەزارەتا دەرڤە یا رۆسیا دیار دکەت، نها رەوشەکا نوو ل سووریێ هاتیە پێش و دڤێت کورد بگەهنە مافێن خوە، هەکە دەستهەلاتا نوو یا سووریێ وانەیان ژ ئەزموونێن بەری نها وەرنەگریت و راستیا کوردان قەبوول نەکەت دێ ئالۆزیێن ل سووریێ بەرفرەهتر لێ هێن.
وەزارەتا دەرڤە یا رۆسیا د داخۆیانیەکێ دا سەبارەت ب رەوشا نها یا ل سووریێ و مافێن گەلێ کورد ل وی وەلاتی دیار کریە، وەکو رۆسیا وان بەری نها ژی دیار کرینە هەتا کورد نەگەهنە مافێن خوە دێ ئالۆزیێن ل سووریێ بەردەوام بن، وان د دەمێ خوە دا داخواز ژ رژێما بەشاری ژی کربوون کو مافێن گەلێ کورد بدەتێ، لێ بەشاری گۆهداریا رۆسیا نەکر و هەکە دەستهەلاتا نها بڤێت رەوشا سووریێ ئارام بیت و ئالۆزیێن هەی نەمینن دڤێت راستیا گەلێ کورد قەبوول بکەت، دڤێت کورد ل سووریێ بگەهنە مافێن خوە، چونکی هەتا کورد نەگەهنە مافێن خوە دێ ئالۆزیێن نها بەردەوام بن و بێگومان دێ کاریگەریا خوە ل سەر پێگەهێ شامێ ژی کەت، چونکی نها دەستهەلاتەک لاواز ل سووریێ هەیە و پێدڤیا وێ ب پشتەڤانیا وەلاتێن جیهانێ هەیە، لێ هێشتا ژی گەلەک وەلات ل دژی دەستهەلاتا ئەحمەد شەرعن و وێ دەستهەلاتێ قەبوول ناکەن.
وەزارەتا دەرڤە یا رۆسیا ئەو یەک ژی دیار کریە، ئاڤاکرنا هەرێمەکا کوردی ل سووریێ مافێ رەوا یێ کوردانە، لێ د هەمان دەمی دا ئەو یەک بابەتەک گەلەک هەستیارە، چونکی دێ کاریگەریا خوە ل سەر هەموو وەلاتێن رۆژهەلاتا ناڤین هەبیت و دبیت گەلەک وەلات ل دژی ئاڤاکرنا هەرێمەکا کوردی ل سووریێ بن، لێ د هەمان دەمی دا هەتا کورد ژی ل سووریێ نەگەهنە مافێن خوە رەوشا وی وەلاتی ژی ئارام نابیت.
ئەو یەک د دەمەکێ دایە کو بەری نها ژی چەندین جاران بەرپرسێن رۆسیا دیار کرینە دڤێت کورد ل سووریێ بگەهنە مافێن خوە، لێ تورکیا ئاستەنگان ل هەمبەر چارەسەرکرنا پرسا کوردی ل سووریێ دروست دکەت، چونکی تورکیا وەسا دبینیت هەکە کورد ل سووریێ بگەهنە مافێن خوە دێ کاریگەریا خوە ل سەر کوردێن تورکیا ژی هەبیت و دێ ئەو یەک بیتە مەترسی ل سەر ئاسایشا تورکیا.
چاڤدێرێن سیاسی ژی دیار دکەن، نها دەستهەلاتەک ل سووریێ هەیە کو ل دژی بەرژەوەندیێن ئیرانێ، رۆسیا و هندەک وەلاتێن دی کار دکەت، رۆسیا و ئیران ژی نها ژ بۆ بەرژەوەندیێن خوە بەحسێ مافێن گەلێ کورد ل سووریێ دکەن، هەکە نیەتا ئیرانێ و رۆسیا یا باش با وان دشیان د سەردەمێ دەستهەلاتا بەشاری دا شامێ نەچار بکەن پرسا کوردی چارەسەر بکەت، لێ وان وی دەمی ژ بۆ بەرژەوەندیێن خوە پشتەڤانیا بەشاری دکرن و نەهێلان شام پرسا گەلێ کورد ل سووریێ چارەسەر بکەت و مافێن کوردان بدەتێ.
