رۆسیا: توركیا نه‌شێت ل هه‌مبه‌ر پێشهاتێن ل سووریێ بێده‌نگ بمینیت
ب، سه‌رجان مه‌حمود:
وه‌زیرێ ده‌رڤه یێ رۆسیا دیار دكه‌ت كو ئه‌مریكا دڤێت ده‌وله‌ته‌كا كوردی ل سووریێ دروست بكه‌ت، ژ به‌ر هندێ ژی توركیا نه‌چاره ل هه‌مبه‌ر پێشهاتێن ل سووریێ بێده‌نگ نه‌مینیت و دڤێت به‌ری هه‌ر تشته‌كێ ئه‌مریكا و هه‌موو هێزێن دی یێن بیانی ژ ئاخا سووریێ ده‌ركه‌ڤن.
سیرگیێ لاڤرۆڤ وه‌زیرێ ده‌رڤه یێ رۆسیا راگه‌هاند كو هێزێن وان ل سه‌ر داخوازا ده‌ستهه‌لاتا ره‌وا یا سووریێ ل وێرێ نه و گۆت: (ئه‌م ل دووڤ بریارا 2254 یا جڤاتا ئاسایشا نه‌ته‌وه‌یێن ئێكگرتی و ل سه‌ر داخوازا فه‌رمی یا حوكمه‌تا ره‌وا یا شامێ ل سووریێ نه و د ره‌وشا نها دا د هه‌ر واری دا هه‌ڤكاری و هاریكاریا سووریێ دكه‌ین و بێگومان هه‌تا هه‌موو ئاخا سووریێ بهێته رزگار كرن و كۆمێن تیرۆرست و چه‌كدار بهێنه ژناڤبرن دێ ل سووریێ مینین و جاره‌كا دی داخواز ژ ئه‌مریكا و هێزێن بیانی دكه‌ین كو رێزێ ل سه‌روه‌ریا سووریێ بگرن و بله‌ز ژ ئاخا سووریێ ده‌ركه‌ڤن).
د پشكه‌كا دی یا ئاخڤتنا خوه دا ژی لاڤرۆڤی راگه‌هاند كو هه‌ڤدیتنێن وان ل گه‌ل كوردان و شامێ به‌رده‌وام دكه‌ن دا كو بگه‌هنه رێككه‌ڤتنه‌كێ و پێكڤه بزاڤێ بكه‌ن لێ د ره‌وشا نها دا پڕانیا رۆژهه‌لاتێ فراتێ ل ژێر كۆنترۆلا ئه‌مریكا دایه و دخوازیت ئاخا سووریێ پارچه بكه‌ت و ده‌وله‌ته‌كا كوردی دروست بكه‌ت و گۆت: (ئه‌مریكا د هه‌مان ده‌مێ دا هه‌ول دده‌ت د ناڤبه‌را كوردێن ئیراقێ و كوردێن سووریێ دا ئێكگرتنه‌كێ دروست بكه‌ت و ئه‌و یه‌ك دبیته سه‌ده‌مێ دروستبوونا هنده‌ك ئالۆزیان و توركیا ژی نه‌شێت ل هه‌مبه‌ر پێشهاتێن ل سووریێ بێده‌نگ بمینیت لێ دڤێت هه‌موو پرسێن هه‌ی ل دووڤ پاراستنا ئێك پارچه‌یا سووریێ بهێنه چاره‌سه‌ر كرن و پێدڤیه كوردێن سووریێ ژبیر نه‌كه‌ن كو ئه‌مریكا سۆزێن داینه وان بجه نه‌ئیناینه).
چاڤدێرێن سیاسی ژی دیار دكه‌ن كو هه‌لوه‌ستێ نها یێ رۆسیا ب ته‌مامی د به‌رژه‌وه‌ندیا توركیا دایه و رۆسیا چو رێگریێ ل هه‌مبه‌ر ده‌ستپێكرنا ئۆپه‌راسیۆنه‌كا نوو ژ ئالیێ توركیا دروست ناكه‌ت، چونكو هه‌لوه‌ستێ توركیا ل دۆر ئه‌ندامه‌تیا هه‌ر یه‌ك ژ وه‌لاتێن سوید و فنله‌ندا د ناڤ رێزێن ناتۆیێ دا ب ته‌مامی د به‌رژه‌وه‌ندیا رۆسیا دایه و ل ئالیێ دی رۆسیا دڤێت كوردان نه‌چار بكه‌ت كو ده‌ستان ژ مافێن خوه یێن ره‌وا ل سووریێ به‌رده‌ن و هه‌موو داخوازیێن شامێ قه‌بوول بكه‌ن، بێگومان ئه‌و یه‌ك ژ ئالیێ كوردان ڤه ناهێته قه‌بوول كرن، چونكو كوردان دڤێت به‌ری هه‌ر تشته‌كێ شام ب فه‌رمی دانپێدانێ ب مافێن وان یێن ره‌وا بكه‌ت.
ل گۆر باوه‌ریا چاڤدێرێن سیاسی هه‌كه ئه‌مریكا ژ به‌ر ئه‌ندامه‌تیا هه‌ر یه‌ك ژ سوید و فنله‌ندا ئاسته‌نگیان ل هه‌مبه‌ر ئۆپه‌راسیۆنا نوو یا توركیا دروست نه‌كه‌ت وی ده‌می چو ئاسته‌نگی نامینن و دێ توركیا ده‌ست ب ئۆپه‌راسیۆنه‌كا نوو ل رۆژئاڤایێ كوردستانێ كه‌ت كو وی ده‌می پڕانیا ئاخا رۆژئاڤایێ كوردستانێ دێ كه‌ڤیته ژێر كۆنترۆلا توركیا و هه‌روه‌سا توركیا دێ ب رێیا بجهكرنا په‌نابه‌رێن سووری دیمۆگرافیا رۆژئاڤایێ كوردستانێ ژی ب ته‌مامی گوهۆڕیت.
