رۆسیا دخوازیت ل قەتەرێ کار بۆ چارەسەرکرنا قەیرانا سووریێ بکەت
سەرۆکێ رۆسیا داخواز ژ ئەردۆغانی کر ئیرشێن گرۆپێن تیرۆرستی ل سووریێ بدەتە راگرتن و ل گەل ئیرانێ پێکڤە کار بۆ چارەسەرکرنا قەیرانا نها ل سووریێ بکەن دا ئەو یەک کاریگەریا خوە یا خراب ل هەموو دەڤەرێ نەکەت و دهێتە چاڤەرێکرن هەفتیا بهێت کۆمبوونەکا گرنگ ل قەتەرێ بهێتە کرن.
کەسەکێ نێزیک ژ سەرۆکێ رۆسیا بۆ دەزگەهێن راگەهاندنا وی وەلاتی دیار کر، پۆتین ب رێیا تەلەفۆنێ ل گەل ئەردۆغانی ئاخڤیە و دیار کریە، دڤێت تورکیا ئێرشێن گرۆپێن تیرۆرستی ل سووریێ بدەتە راگرتن، چونکی بەردەوامیا ئالۆزیێن نها یێن ل سووریێ دێ کاریگەریا خوە یا گەلەک خراب بۆ هەموو دەڤەرێ هەبیت، دڤێت تورکیا رێ نەدەت دەستەیا تەحریر شام بهێز کەڤیت چونکی دێ پاشی وەکو داعشێ بیتە مەترسی بۆ هەموو رۆژهەلاتاڤین و گۆت: (پۆتینی ئەو یەک ژی دیار کریە، وەکو رۆسیا ئەو تنێ حوکمەتا بەشار ئەسەدی ب فەرمی ناس دکەن و هەبوونا چو گرۆپێن دی ژی ل سووریێ قەبوول ناکەن و دێ ل گەل ئیرانێ ب توندی ئێرشی تەحریر شام کەن و دڤێت حەلەب و باژێرێن دی ژ دەستێ تەحریر شام بهێنە ئازاد کرن، چونکی بەردەامیا رەوشا نها دێ بیتە ئەگەرێ قەیرانەکا دی یا مەزن و ئەو یەک دێ کاریگەریا خوە یا گەلەک خراب بۆ هەموو وەلاتێن رۆژهەلاتا ناڤین هەبیت، رۆسیا و ئیران دێ کار بۆ نەهێلانا گرۆپێن تیرۆرستی ل سووریێ کەن و ژ بۆ ڤێ یەکێ ژی هەر دو وەلات دێ ب هەموو شیانێن خوە هاریکاریا حوکمەتا سووریێ کەن).
هەمان بەرپرسی ئەو یەک ژی دیار کر، د پەیوەندیا تەلەفۆنی دا پۆتینی داخواز ژ ئەردۆغان کر ل گەل ئیرانێ پێکڤە ل وەلاتێ قەتەر کۆمبن و کار بۆ چارەسەریەکا گونجای بۆ رەوشا نها یا سووریێ بکەن و سەرۆکێ تورکیا ژی پێشوازی ل هەلوەستێ رۆسیا کریە.
ل ئالیێ دی وەزارەتا دەرڤە یا تورکیا ژی دیار کر د پەیوەندیا تەلەفۆنی یا د ناڤبەرا ئەردۆغانی و سەرۆکێ رۆسیا دا، سەرۆک کۆمارێ تورکیا دیار کریە ئەو ژ رەوشا نها ل سووریێ دلگرانن و ئەو رێزی ل ئێکپارچەیا ئاخا سووریێ دگرن و دڤێت هەموو ئالی کار بکەن دا قەیرانا نها ل سووریێ بهێتە چارەسەرکرن، وەکو تورکیا وان بەری نها گەلەک بزاڤ کرن دا شام یا رازی بیت ل گەل تورکیا دەست ب دانوستاندنان بکەت، لێ هەموو بزاڤێن تورکیا ژ ئالیێ شامێ ڤە بێی بەرسڤ مان و نها ژی بێگومان رەوشەکا نوو هاتیە پێش و دێ کاریگەریا خوە یا گەلەک خراب بۆ هەموو دەڤەرێ هەبیت.
وەزارەتا دەرڤە یا تورکیا ئەو یک ژی دیار کریە، هێزێن وان د ئامادەباشیێ دانە و تورکیا ب چو رەنگەکێ رێ نادەت ئالۆزیێن نها ل سووریێ کاریگەریا خوە ل سەر ئاسایشا تورکیا هەبیت، یا پێدڤی دێ هێتە کرن، چونکی دەمەکە ل سووریێ تیرۆر بوویە مەترسی بۆ تورکیا.
سەبارەت ب ئالۆزیێن ل سووریێ دوهی وەزارەتا دەرڤە یا ئەمریکا ژی دیار کر، ئیران و رۆسیا ئەگەرێن سەرەکی یێن ئالۆزیێن نها ل سووریێ نە، پشتەڤانیا بەردەوام یا ئیرانێ و رۆسیا بۆ بەشاری و بهێزبوونا گرۆپێن چەکدارێن سەر ب ئیرانێ ل سووریێ وەسا کر نها قەیرانەکا دی ل وی وەلاتی دروست ببیت، وەکو ئەمریکا ئەو نابنە پشکەک ژ شەڕێ نها ل سووریێ، بەلکو ژ بۆ ئەمریکا یا هەری گرنگ شەرێ ل دژی داعشێ یە، چونکی ئالۆزیێن ڤێ دووماهیێ ل سووریێ دێ بنە ئەگەرێ بهێزبوونا داعشێ و ئەمریکا دێ ل گەل هەڤپەیمانێن خوە کار کەت دا نەهێلیت جارەکا دی داعش ببیتە مەترسی بۆ بەرژەوەندیێن ئەمریکا.
چاڤدێرێن سیاسی ژی دیار دکەن ئالۆزیێن ڤێ دووماهیێ ل سووریێ و کۆنترۆلکرنا دەڤەرەکا مەزن ژ ئالیێ دەستەیا تەحریر شام کو تورکیا پشتەڤانیێ لێ دکەت دێ چارەسەرکرنا قەیرانا نها ل سووریێ گەلەک ب زەحمەت کەڤیت، چونکی ئەمریکا ب رێیا وەلاتێ ئیماراتێ داخواز ژ بەشار ئەسەدی کریە خوە ژ ئیرانێ دوور بکەت و پشتەڤانیێ ل حزبوللا لوبنانێ نەکەت وی دەمی دێ سزایێن ل سەر شامێ هێنە راکرن و هەروەسا سعوودیێ و ئیمارات ژی بەرهەڤن د دەمەکێ وەسا دا پشتەڤانیا بەشاری بکەن، هەکە بەشار ئەسەد بریارەکا وەسا بدەت دبیت بشێت خوە قورتال بکەت لێ ئەو یەک ژی گەلەک ب زەحمەتە چونکی ئیران وەسا ب ساناهی دەستان ژ سووریێ بەرنادەت.
ل گۆر باوەریا چاڤدێرێن سیاسی ئێدی رەوشا سووریێ وەکو بەری نها نابیت و دبیت دو هەرێمێن سوننە و کورد ل سووریێ ئاڤا ببن یان ژی سیستەمێ سووریێ ببیتە فیدرالی، چونکی هەتا ئەو یەک نەهێتە کرن دێ شەڕێ نها ل سووریێ ب دژواری بەردەوام بیت و بێگومان بەردەوامیا شەڕێ نها ل سووریێ دێ مەترسیا خوە یا مەزن بۆ هەموو رۆژهەلاتا ناڤین ژی هەبیت.
