رۆسیا هۆشداریێ ددەتە هێزێن سووریا دیموکرات
ئاژانسەکا رۆسیا دیار کەت، حەفتیا بۆری شاندەکێ رۆسیا ل قامشلۆ ل گەل فەرماندارێن هێزێن سووریا دیموکرات و بەرپرسێن رێڤەبەریا خوەسەر کۆمبووینە و د کۆمبوونێ دا رۆسیا ب رەنگەکێ ئاشکرا دیار کریە، هەتا هێزێن سووریا دیموکرات خوە ژ ئەمریکا دوور نەکەن، شام سەبارەت ب مافێن کوردان یا بەرهەڤ نینە چو کارەکێ بکەت.
ئاژانسا سپۆتینگ یا رۆسیا د راپۆرتەکێ دا دیار کریە، حەفتیا بۆری شاندەکێ رۆسیا ل باژێرێ قامشلۆ یێ رۆژئاڤایێ کوردستانێ ل گەل فەرماندارێن هێزێن سووریا دیموکرات و بەرپرسێن رێڤەبەریا خوەسەر کۆمبووینە و د کۆمبوونێ دا شاندێ رۆسیا دیار کریە، دڤێت هێزێن سووریا دیموکرات خوە ژ ئەمریکا دوور بکەن، چونکی هەتا پەیوەندیێن سیاسی و سەربازی د ناڤبەرا ئەمریکا ل گەل رێڤەبەریا خوەسەر و هێزێن سووریا دیموکرات دا هەبیت، شام یا بەرهەڤ نینە سەبارەت ب چارەسەرکرنا پرسا کوردی و مافێن کوردان ل سووریێ چو تشتەکێ بکەت، ژ بەر ڤێ یەکێ ژی شاندێ رۆسیا ب رەنگەکێ ئاشکرا داخواز ژ فەرماندارێن هێزێن سووریا دیموکرات و بەرپرسێن رێڤەبەریا خوەسەر کرینە خوە ژ ئەمریکا دوور بکەن.
ل گۆر هەمان ئاژانسێ د کۆمبوونێ دا بەرپرسێن رێڤەبەریا خوەسەر ژی دیار کرینە، هەتا نها وان چەندین کۆمبوون ل گەل بەرپرسێن شامێ هەبووینە و رژێما بەشاری یا بەرهەڤ نینە دانپێدانێ ب مافێن رەوا یێن گەلێ کورد ل سووریێ بکەت و هەروەسا نیەتا شامێ گەلەک یا خرابە و بەرپرسێن نها یێن رژێما سووریێ دخوازن جارەکا دی حوکمی ل هەموو سووریێ بکەن، ژ بەر ڤێ یەکێ ژی ئەو وەکو رێڤەبەریا خوەسەر داخوازیا رۆسیا رەت دکەن و دڤێت رۆسیا فشارێن خوە ل سەر شامێ زێدەتر لێ بکەت دا شام دانپێدانێ ب مافێن رەوا یێن گەلێ کورد ل سووریێ بکەت، چونکی هەتا کورد ل سووریێ نەگەهنە مافێن خوە ئالۆزیێن ل سووریێ ژی دێ بەردەوام بن.
ئەو یەک د دەمەکێ دایە کو بەری نها سیرگێی لاڤرۆڤ وەزیرێ دەرڤە یێ رۆسیا دیار کربوو ئەو پشتەڤانیێ ل مافێن رەوا یێن گەلێ کورد ل سووریێ دکەن، لێ ئەمریکا دڤێت سووریێ پارچە بکەت و ئەمریکا کوردان بۆ هندەک مەرەمێن خوە یێن جودا بکار دئینیت و دڤێت کورد هشیار بن و نەبنە پشکەک ژ پیلانا مەترسیدار یا ئەمریکا.
چاڤدێرێن سیاسی ژی دیار دکەن، رۆسیا ب هەموو رەنگەکێ بزاڤا ڤێ یەکێ کەت دا جارەکا دی پێگەهێ رژێما بەشاری یا بهێز کەڤیت، ژ بەر ڤێ یەکێ ژی رۆسیا نەڤێت کوردان هەرێمەکا وەکو هەرێما کوردستانێ ل سووریێ هەبیت، بەلکو رۆسیا دڤێت کوردان ب هندەک مافێن کێم رازی بکەت، سیاسەتا نها یا رۆسیا د بەرژەوەندیا کوردان ل سووریێ دا نینە، ژ بەر ڤێ یەکێ ژی دڤێت کورد بەرەیەکێ بهێز دروست بکەن و ناکۆکیێن هەی د ناڤبەرا خوە دا چارەسەر بکەن و کار بۆ بدەستڤەئینانا پشتەڤانیا نێڤدەولەتی بکەن، مخابن نها رەوشا کوردان ل رۆژئاڤایێ کوردستانێ و سووریێ یا باش نینە.
