رۆسیا پێگه‌هێ خوه‌ ل رۆژئاڤایێ كوردستانێ بهێز دكه‌ت

رۆسیا پێگه‌هێ خوه‌ ل رۆژئاڤایێ كوردستانێ بهێز دكه‌ت

54

ئه‌ڤرۆ:

جێگرێ وه‌زیرێ ده‌رڤه‌ یێ رۆسیا راگه‌هاند كو وان بۆ به‌رپرسێن توركیا دیار كرینه‌ كو هه‌ر ئۆپه‌راسیۆنه‌كا وان ل باكورێ سووریێ دێ بیته‌ ئه‌گه‌رێ روودانا ئالۆزیێن زێده‌تر و وان داخواز ژ توركیا كرینه‌ ده‌ست ب چو ئۆپه‌راسیۆنان نه‌كه‌ت و هه‌روه‌سا هاته‌ زانین رۆسیا هێزێن زێده‌تر ره‌وانه‌ی رۆژئاڤایێ كوردستانێ دكه‌ت.

میخائیل بۆگدانۆڤ جێگرێ وه‌زیرێ ده‌رڤه‌ یێ رۆسیا راگه‌هاند كو وان به‌ری چه‌ند رۆژان جاره‌كا دی بۆ توركیا دیار كرینه‌ كو نابیت ده‌ست ب چو ئۆپه‌راسیۆنان ل باكورێ سووریێ بكه‌ت، چونكو هه‌ر ئۆپه‌راسیۆنه‌كا توركیا دێ بیته‌ ئه‌گه‌رێ ئالۆزیێن نوو و رۆسیا نها ب هه‌موو ره‌نگه‌كێ كار دكه‌ت كو ب رێیێن دبلۆماسی پرسێن هه‌ی چاره‌سه‌ر بكه‌ت و گۆت: (دانوستاندنێن مه‌ ل گه‌ل توركیا به‌رده‌وامن، ئه‌م ل دژی هندێ نه‌ ره‌وشا باكورێ سووریێ ئالۆز بیت، ژ به‌ر هندێ ژی دڤێت توركیا رێزێ ل ئاگربه‌ستێ بگریت).

ل ئالیێ دی ناڤه‌ندا چاڤدێریا مافێن مرۆڤی یا سووریێ ژی راگه‌هاند كو چه‌ند رۆژن رۆسیا هێزێن زێده‌تر ل بنگه‌هێن سه‌ربازی ل تل ته‌مر و ده‌ڤه‌رێن دی بجه دكه‌ت و هه‌روه‌سا به‌ری چه‌ند رۆژان ب ده‌ستپێشخه‌ریا رۆسیا هه‌ڤپه‌یمانیه‌كا نوو د ناڤبه‌را هێزێن سه‌ر ب ئیرانێ، هێزێن سووریا دیموكرات و شامێ ژی هاتیه‌ ئاڤاكرن و ئه‌و یه‌ك ژی نیشا دده‌ت كو رۆسیا ب هه‌موو ره‌نگه‌كێ كار دكه‌ت دا پێگه‌هێ خوه‌ ل رۆژئاڤایێ كوردستانێ بهێز بكه‌ت، ژ به‌ر هندێ ژی ده‌مه‌كه‌ دانوستاندن د ناڤبه‌را رۆسیا و هێزێن سووریا دیموكرات دا برێڤه‌ دچن و رۆسیا ب چو ره‌نگه‌كێ نه‌ڤێت باكورێ سووریێ بۆ توركیا چۆل بكه‌ت.

چاڤدێرێن سیاسی دیار دكه‌ن كو پشتی گه‌فێن توركیا هێزێن سووریا دیموكرات به‌رێ خوه‌ دانه‌ رۆسیا و شامێ و ب ناڤبژیڤانیا رۆسیا ده‌مه‌كه‌ دانوستاندن د ناڤبه‌را هێزێن سووریا دیموكرات و شامێ دا برێڤه‌ دچن و نها رۆسیا دڤێت ب چو ره‌نگه‌كێ رێ نه‌ده‌ت توركیا و ئه‌مریكا جهێ وێ ل باكورێ سووریێ بگرن، ژ به‌ر هندێ ژی نها هێزێن خوه‌ هه‌م ل ده‌ڤه‌رێن سنۆری یێن ل گه‌ل توركیا بجه دكه‌ت و هه‌روه‌سا ل قامشلۆ و ده‌ڤه‌رێن دی یێن باكورێ سووریێ ژی بنگه‌هێن نوو یێن سه‌ربازی ئاڤا دكه‌ت، ئه‌و یه‌ك ژی نیشا دده‌ت كو رۆسیا ب هه‌موو ره‌نگه‌كێ كار دكه‌ت دا پێگه‌هێ خوه‌ ل باكورێ سووریێ و ده‌ڤه‌رێن كوردی بهێز بكه‌ت، دیاره‌ رێڤه‌به‌ریا خوه‌سه‌ر ژی پێشوازیێ ل وان پێنگاڤێن رۆسیا دكه‌ت.

ئه‌و یه‌ك د ده‌مه‌كێ دایه‌ كو به‌ری نها رۆسیا گه‌له‌ك بنگه‌هێن خوه‌ یێن سه‌ربازی ل رۆژئاڤایێ كوردستانێ چۆل كربوون لێ نها جاره‌كا دی رۆسیا هێزێن سه‌ربازی و چه‌كێ گران ل وان بنگه‌هان بجه دكه‌ت كو ئه‌و یه‌ك ژی بوویه‌ جهێ دلگرانیا توركیا.

کۆمێنتا تە